Unang Cronica 19:1-19
19 Nang maglaon, namatay si Nahas na hari ng mga Ammonita, at ang anak niya ang pumalit sa kaniya bilang hari.+
2 Kaya sinabi ni David: “Magpapakita ako ng tapat na pag-ibig+ kay Hanun na anak ni Nahas, dahil nagpakita ng tapat na pag-ibig sa akin ang kaniyang ama.” Kaya nagsugo si David ng mga mensahero para makiramay sa pagkamatay ng ama nito. Pero pagdating ng mga lingkod ni David sa lupain ng mga Ammonita+ para makiramay kay Hanun,
3 sinabi ng matataas na opisyal ng mga Ammonita kay Hanun: “Sa tingin mo ba, pinararangalan ni David ang iyong ama sa pagsusugo niya ng mga makikiramay sa iyo? Hindi kaya pumunta rito ang mga lingkod niya para mag-espiya sa buong lunsod at ibagsak ito?”
4 Kaya kinuha ni Hanun ang mga lingkod ni David at inahitan sila+ at pinutol hanggang sa pigi ang mga damit nila at pinaalis sila.
5 Nang sabihin kay David ang nangyari sa mga lalaki, nagsugo siya agad ng mga tauhan para salubungin sila, dahil ang mga lalaki ay napahiya nang husto; at sinabi sa kanila ng hari: “Doon muna kayo sa Jerico+ hanggang sa tumubo ulit ang balbas ninyo, saka kayo bumalik.”
6 Nang malaman ng mga Ammonita na galit na galit sa kanila si David, nagpadala si Hanun at ang mga Ammonita ng 1,000 talento* ng pilak para umupa ng mga karwahe at mga mangangabayo mula sa Mesopotamia,* Aram-maaca, at Zoba.+
7 Umupa sila ng 32,000 karwahe, kasama ang hari ng Maaca at ang bayan niya. Pagkatapos, pumunta sila sa harap ng Medeba+ at nagkampo roon. Nagtipon-tipon ang mga Ammonita mula sa mga lunsod nila at naghanda para makipagdigma.
8 Nang mabalitaan ito ni David, isinugo niya si Joab+ at ang buong hukbo, kasama ang pinakamalalakas niyang mandirigma.+
9 At ang mga Ammonita ay lumabas at humanay sa pasukan ng pintuang-daan para makipagdigma, samantalang ang mga haring dumating ay magkakasama sa parang.
10 Nang makita ni Joab na sumasalakay ang mga kalaban sa harapan at likuran niya, pumili siya ng pinakamahuhusay na sundalo sa Israel, at ang mga ito ang iniharap niya para makipaglaban sa mga Siryano.+
11 Ang iba pang sundalo ay inilagay niya sa pangunguna* ng kapatid niyang si Abisai,+ at humanay sila para makipagdigma sa mga Ammonita.
12 Pagkatapos, sinabi niya: “Kapag natatalo ako ng mga Siryano,+ tulungan mo ako; pero kapag natatalo ka ng mga Ammonita, tutulungan kita.
13 Magpakatatag tayo at lakasan natin ang ating loob+ para sa ating bayan at para sa mga lunsod ng ating Diyos, at gagawin ni Jehova ang mabuti sa paningin niya.”
14 Pagkatapos, umabante si Joab at ang mga tauhan niya para makipagdigma sa mga Siryano, at tumakas ang mga ito mula sa harap niya.+
15 Nang makita ng mga Ammonita na tumakas ang mga Siryano, tumakas din sila mula sa kapatid niyang si Abisai at pumunta sa lunsod. Pagkatapos, pumunta si Joab sa Jerusalem.
16 Nang makita ng mga Siryano na natalo sila ng Israel, nagsugo sila ng mga mensahero para tawagin ang mga Siryano na nasa rehiyon ng Ilog,*+ at si Sopac na pinuno ng hukbo ni Hadadezer ang nanguna sa mga ito.+
17 Nang ibalita ito kay David, agad niyang tinipon ang buong Israel at tumawid sila ng Jordan at pumunta sa mga Siryano at humanay para makipagdigma sa mga ito. Humanay si David para makipagdigma sa mga Siryano, at nakipaglaban sa kaniya ang mga ito.+
18 Pero tumakas ang mga Siryano mula sa Israel; at 7,000 tagapagpatakbo ng karwahe at 40,000 sundalong Siryano ang napatay ni David, at pinatay niya si Sopac na pinuno ng hukbo.
19 Nang makita ng mga lingkod ni Hadadezer na natalo sila ng Israel,+ agad silang nakipagpayapaan kay David at naging mga sakop niya;+ at ayaw nang tulungan ng Sirya ang mga Ammonita.