Mga Bilang 23:1-30
23 At sinabi ni Balaam kay Balak: “Magtayo ka rito ng pitong altar,+ at ipaghanda mo ako ng pitong toro at pitong lalaking tupa.”
2 Ginawa agad ni Balak ang sinabi ni Balaam. At naghandog sina Balak at Balaam ng isang toro at isang lalaking tupa sa bawat altar.+
3 Sinabi ni Balaam kay Balak: “Aalis ako, pero maiwan ka sa tabi ng iyong handog na sinusunog. Baka makipag-usap sa akin si Jehova. Sasabihin ko sa iyo ang anumang sabihin niya sa akin.” Kaya pumunta si Balaam sa tuktok ng isang burol.
4 At nakipag-usap ang Diyos kay Balaam.+ Sinabi ni Balaam sa kaniya: “Pinaghanay-hanay ko ang pitong altar, at naghandog ako ng isang toro at isang lalaking tupa sa bawat altar.”
5 Inilagay ni Jehova ang salita niya sa bibig ni Balaam at sinabi:+ “Bumalik ka kay Balak, at ito ang sabihin mo.”
6 Kaya bumalik siya, at nakita niya si Balak at ang lahat ng opisyal ng Moab na nakatayo sa tabi ng handog na sinusunog.
7 Binigkas niya ang makatang pananalitang ito:+
“Ipinatawag ako ni Balak na hari ng Moab mula sa Aram,+Mula sa mga bundok sa silangan:
‘Halika, sumpain mo ang Jacob para sa akin.
Sumama ka para tuligsain ang Israel.’+
8 Paano ko susumpain ang mga hindi naman isinumpa ng Diyos?
At paano ko tutuligsain ang mga hindi naman tinuligsa ni Jehova?+
9 Nakikita ko sila mula sa tuktok ng mga bato,At nakikita ko sila mula sa mga burol.
Bilang isang bayan, naninirahan sila roon nang bukod;+Itinuturing nila ang kanilang sarili na iba sa nakapalibot na mga bansa.+
10 Sino ang makakabilang ng mga butil ng alabok ng Jacob+O ng sangkapat man lang ng Israel?
Mamatay sana akong* gaya ng mga matuwid,At ang kawakasan ko sana ay maging gaya ng sa kanila.”
11 Kaya sinabi ni Balak kay Balaam: “Ano itong ginawa mo sa akin? Dinala kita para sumpain ang mga kaaway ko, pero pinagpala mo pa sila.”+
12 Sumagot siya: “Hindi ba ang inilagay lang ni Jehova sa bibig ko ang puwede kong sabihin?”+
13 Sinabi ni Balak: “Pakiusap, pumunta tayo sa ibang lugar kung saan puwede mo silang makita. Isang bahagi lang ng kampo ang makikita mo; hindi mo sila makikitang lahat. Mula roon, sumpain mo sila para sa akin.”+
14 Kaya isinama niya ito sa parang ng Zopim, sa itaas ng Pisga,+ at nagtayo siya ng pitong altar at naghandog ng isang toro at isang lalaking tupa sa bawat altar.+
15 Sinabi ni Balaam kay Balak: “Maiwan ka rito sa tabi ng iyong handog na sinusunog. Aalis muna ako para makipag-usap sa Kaniya.”
16 At nakipag-usap si Jehova kay Balaam. Inilagay niya ang salita niya sa bibig ni Balaam at sinabi:+ “Bumalik ka kay Balak, at ito ang sabihin mo.”
17 Kaya bumalik siya at nakita itong naghihintay sa tabi ng handog na sinusunog, kasama ang mga opisyal ng Moab. Tinanong siya ni Balak: “Ano ang sinabi ni Jehova?”
18 Binigkas niya ang makatang pananalitang ito:+
“Bumangon ka, Balak, at makinig.
Pakinggan mo ako, O anak ni Zipor.
19 Ang Diyos ay hindi gaya ng tao na nagsisinungaling,+O gaya ng anak ng tao na nagbabago ng isip.*+
Kapag may sinasabi siya, hindi ba gagawin niya iyon?
Kapag nagsasalita siya, hindi ba isasagawa niya iyon?+
20 Narito ako para bumigkas ng pagpapala;Pinagpala na niya sila,+ at hindi ko na iyon mababago.+
21 Hindi niya hahayaang may gumamit ng anumang mahika laban sa Jacob,At hindi niya papayagang dumanas ng kapahamakan ang Israel.
Ang Diyos nilang* si Jehova ay sumasakanila,+At ipinagbubunyi siya bilang hari sa gitna nila.
22 Diyos ang naglabas sa kanila sa Ehipto.+
Siya ay gaya ng mga sungay ng torong-gubat para sa kanila.+
23 Dahil walang mahiwagang tanda ng kapahamakan laban sa Jacob,+O anumang hula laban sa Israel.+
Masasabi ngayon may kinalaman sa Jacob at Israel:
‘Tingnan ninyo ang ginawa ng Diyos!’
24 Narito ang isang bayan na babangon na gaya ng leon,At gaya ng leon ay tatayo ito.+
Hindi ito hihiga hangga’t hindi nito nakakain ang biktima nitoAt naiinom ang dugo ng mga napatay nito.”
25 Kaya sinabi ni Balak kay Balaam: “Kung hindi mo siya kayang isumpa, huwag mo naman siyang pagpalain.”
26 Sumagot si Balaam: “Hindi ba sinabi ko na sa iyo, ‘Gagawin ko ang lahat ng sinabi ni Jehova sa akin’?”+
27 Sinabi ni Balak kay Balaam: “Pakiusap, sumama ka sa akin at lumipat ulit tayo sa ibang lugar. Baka doon ay pumayag na ang tunay na Diyos na sumpain mo siya para sa akin.”+
28 Kaya isinama ni Balak si Balaam sa tuktok ng Peor, na nakaharap sa Jesimon.*+
29 At sinabi ni Balaam kay Balak: “Magtayo ka rito ng pitong altar, at ipaghanda mo ako ng pitong toro at pitong lalaking tupa.”+
30 Kaya ginawa ni Balak ang sinabi ni Balaam, at naghandog siya ng isang toro at isang lalaking tupa sa bawat altar.