Lumilitaw na hindi pa nakarating si Pablo sa Colosas nang isulat niya ang liham na ito. Posibleng si Epafras ang nagtatag ng kongregasyon doon. (Col 1:7, 8; 2:1; 4:12) Pero maraming kilalang Kristiyano si Pablo sa Colosas. Binanggit niya ang mga pangalan nina Arquipo, Filemon, at Apia. Binanggit din niya ang bagong kumberteng si Onesimo, na mula sa Colosas.—Col 4:9, 17; Flm 1, 2, 10.

Lumilitaw na isinulat ni Pablo ang liham niya sa mga taga-Colosas noong patapos na ang unang pagkabilanggo niya sa Roma, o noong mga 60-61 C.E. Ipinadala niya ang liham na ito kasabay ng liham niya kay Filemon. (Col 4:7-9; Flm 10-12) Nagbilin si Pablo na ang liham niya sa mga taga-Colosas ay ipabasa rin sa kalapít na kongregasyon ng Laodicea at na basahin din ng mga taga-Colosas ang liham na ipinadala niya sa mga taga-Laodicea.—Col 4:16.

Idiniin ni Pablo ang napakahalagang papel ni Kristo sa kaayusan ng Diyos. Si Kristo “ang panganay sa lahat ng nilalang” at “ang ulo ng katawan, ang kongregasyon.” “Sa pamamagitan din niya,” naipagkasundo sa Diyos “ang lahat ng iba pang bagay”; at dahil sa haing pantubos ni Kristo, ‘ang sagradong lihim ay naisiwalat.’ (Col 1:13-22, 26-28; 2:2, 3) Kung palalaguin ng mga Kristiyano sa Colosas ang kaalaman nila tungkol sa papel ni Kristo, titibay ang determinasyon nilang tanggihan ang maling mga turo, mapandayang pilosopiya, Judiong tradisyon, at pagsamba sa mga anghel.—Col 2:8, 13-23.

Malaki ang pagkakatulad ng liham ni Pablo sa mga taga-Colosas sa liham niya sa mga taga-Efeso. Halos sabay isinulat ang dalawang liham na ito, at posibleng pareho ang kalagayan sa dalawang lunsod na ito. Ihambing ang sumusunod na mga teksto:

• Ang ministeryo ni Pablo alang-alang sa mga tao ng ibang mga bansa—Efe 3:1-7; Col 1:24-29.

• Napawalang-bisa ang Kautusang Mosaiko dahil sa kamatayan ni Kristo sa pahirapang tulos.—Efe 2:1-5, 13-16; Col 2:13, 14.

• Ang pagkakaisa ng katawan, ang kongregasyong Kristiyano, sa ilalim ng ulo, ang Kristo—Efe 4:16; Col 2:19.

• Ang luma at bagong personalidad—Efe 4:20-25, 31, 32; Col 3:8-10, 12, 13.

• Pagpapasigla na umawit ng papuri sa Diyos—Efe 5:19; Col 3:16.

• Payo sa pamilyang Kristiyano—Efe 5:21-23; 6:1-9; Col 3:18-25; 4:1.

• Isinugo ni Pablo si Tiquico, na minamahal na kapatid at tapat na lingkod, sa Efeso at sa Colosas.—Efe 6:21, 22; Col 4:7, 8.

Ang liham sa mga taga-Colosas ay kasama ng iba pang liham ni Pablo na nasa papirong codex na tinatawag na P⁴⁶, na pinaniniwalaang mula pa noong mga 200 C.E. Ipinapakita nito na para sa sinaunang mga Kristiyano, ang liham ni Pablo sa mga taga-Colosas ay isinulat sa patnubay ng banal na espiritu. Pinatunayan din ng sinaunang mga manunulat na si Pablo ang sumulat ng liham na ito. Ang ilan sa kanila ay sina Clemente ng Alejandria, Irenaeus, Origen, at Tertullian.