Ezekiel 25:1-17
25 Dumating ulit sa akin ang salita ni Jehova:
2 “Anak ng tao, tumingin ka sa direksiyon ng mga Ammonita+ at humula laban sa kanila.+
3 Sabihin mo tungkol sa mga Ammonita, ‘Pakinggan mo ang mensahe ng Kataas-taasang Panginoong Jehova. Ito ang sinabi ng Kataas-taasang Panginoong Jehova: “Dahil sinabi mo, ‘Buti nga!’ nang lapastanganin ang aking santuwaryo at nang maging tiwangwang ang lupain ng Israel at nang ipatapon ang sambahayan ng Juda,
4 ibibigay kita sa mga taga-Silangan bilang pag-aari. Magtatayo sila ng mga kampo* sa loob mo at ng mga tolda sa gitna mo. Kakainin nila ang iyong mga bunga at iinumin ang iyong gatas.
5 Gagawin kong pastulan ng mga kamelyo ang Raba+ at pahingahan ng kawan ang lupain ng mga Ammonita; at malalaman ninyo na ako si Jehova.”’”
6 “Ito ang sinabi ng Kataas-taasang Panginoong Jehova: ‘Dahil pumalakpak ka+ at pumadyak at tuwang-tuwa ka sa masamang nangyari sa lupain ng Israel,+
7 gagamitin ko ang kapangyarihan* ko laban sa iyo at ibibigay kita sa ibang bansa para samsaman. Papawiin kita bilang isang bayan at lilipulin kita sa mga lupain.+ Pupuksain kita, at malalaman mo na ako si Jehova.’
8 “Ito ang sinabi ng Kataas-taasang Panginoong Jehova: ‘Dahil sinabi ng Moab+ at Seir,+ “Ang sambahayan ng Juda ay katulad na lang ng lahat ng ibang bansa,”
9 gagawin kong hantad ang mga lunsod ng Moab na nasa hangganan nito, na nasa dalisdis nito, ang pinakamagagandang lunsod nito,* ang Bet-jesimot, Baal-meon, at hanggang sa Kiriataim.+
10 Ibibigay ko sila sa mga taga-Silangan bilang pag-aari kasama ang mga Ammonita,+ at hindi na maaalaala ang mga Ammonita bilang isang bansa.+
11 At ilalapat ko ang hatol sa Moab,+ at malalaman nila na ako si Jehova.’
12 “Ito ang sinabi ng Kataas-taasang Panginoong Jehova: ‘Naghiganti ang Edom sa sambahayan ng Juda, at nakagawa sila ng malaking pagkakasala dahil dito;+
13 kaya ito ang sinabi ng Kataas-taasang Panginoong Jehova: “Gagamitin ko rin ang kapangyarihan* ko laban sa Edom at lilipulin ko ang mga tao at alagang hayop dito, at gagawin ko itong tiwangwang.+ Mula Teman hanggang Dedan, mamamatay sila sa espada.+
14 ‘Maghihiganti ako sa Edom sa pamamagitan ng aking bayang Israel.+ Ibubuhos nila sa Edom ang aking galit at poot para matikman nito ang paghihiganti ko,’+ ang sabi ng Kataas-taasang Panginoong Jehova.”’
15 “Ito ang sinabi ng Kataas-taasang Panginoong Jehova: ‘Dahil sa hindi mawala-walang galit ng mga Filisteo, lagi silang naghahanap ng pagkakataon na maghiganti at magpahamak.+
16 Kaya ito ang sinabi ng Kataas-taasang Panginoong Jehova: “Gagamitin ko ang kapangyarihan* ko laban sa mga Filisteo,+ at lilipulin ko ang mga Kereteo+ at ang mga naiwang nakatira sa baybaying dagat.+
17 Maglalapat ako sa kanila ng napakatinding mga parusa bilang paghihiganti, at malalaman nila na ako si Jehova kapag naghiganti ako sa kanila.”’”
Talababa
^ O “napapaderang kampo.”
^ Lit., “kamay.”
^ O “ang dekorasyon ng lupain nito.”
^ Lit., “kamay.”
^ Lit., “kamay.”