Ezekiel 48:1-35
48 “Ito ang mga tribo, mula sa pinakadulo ng hilaga: Ang bahagi ng Dan+ ay mula sa daan ng Hetlon hanggang sa Lebo-hamat*+ papuntang Hazar-enan, sa may hangganan ng Damasco sa gawing hilaga, sa tabi ng Hamat;+ at mula ito sa silangan hanggang sa kanlurang hangganan.
2 Ang bahagi ng Aser+ ay nasa tabi ng hangganan ng Dan, mula sa silangan hanggang sa kanlurang hangganan.
3 Ang bahagi ng Neptali+ ay nasa tabi ng hangganan ng Aser, mula sa silangan hanggang sa kanlurang hangganan.
4 Ang bahagi ng Manases+ ay nasa tabi ng hangganan ng Neptali, mula sa silangan hanggang sa kanlurang hangganan.
5 Ang bahagi ng Efraim ay nasa tabi ng hangganan ng Manases,+ mula sa silangan hanggang sa kanlurang hangganan.
6 Ang bahagi ng Ruben ay nasa tabi ng hangganan ng Efraim,+ mula sa silangan hanggang sa kanlurang hangganan.
7 Ang bahagi ng Juda ay nasa tabi ng hangganan ng Ruben,+ mula sa silangan hanggang sa kanlurang hangganan.
8 Ang abuloy na ibibigay ninyo ay nasa tabi ng hangganan ng Juda, mula sa silangan hanggang sa kanlurang hangganan, at ito ay dapat na may lapad na 25,000 siko*+ at kasinghaba ng lupain ng ibang tribo mula sa silangan hanggang sa kanlurang hangganan. Ang santuwaryo ay nasa gitna nito.
9 “Ang abuloy na ibibigay ninyo kay Jehova ay may haba na 25,000 siko at lapad na 10,000.
10 Ito ang banal na abuloy para sa mga saserdote:+ 25,000 siko sa hilaga, 10,000 sa kanluran, 10,000 sa silangan, at 25,000 sa timog. Ang santuwaryo ni Jehova ay nasa gitna nito.
11 Para ito sa pinabanal na mga saserdote, ang mga anak ni Zadok,+ na nag-asikaso sa mga iniatas ko sa kanila at hindi lumayo sa akin nang iwan ako ng mga Israelita at mga Levita.+
12 Magkakaroon sila ng bahagi mula sa abuloy, sa lupaing ibinukod bilang isang kabanal-banalang lugar, sa tabi ng hangganan ng mga Levita.
13 “Sa tabi ng teritoryo ng mga saserdote, magkakaroon ng bahagi ang mga Levita na ang haba ay 25,000 siko at ang lapad ay 10,000. (Ang kabuoang haba ay 25,000 at ang lapad ay 10,000.)
14 Hindi nila puwedeng ibenta, ipagpalit, o ibigay sa iba ang alinmang bahagi ng pinakapiling lupaing ito, dahil banal ito para kay Jehova.
15 “Ang natitirang bahagi na 5,000 siko ang lapad at 25,000 siko ang haba ay magagamit ng lunsod+ bilang tirahan at pastulan. Ang lunsod ay nasa gitna nito.+
16 Ito ang sukat ng lunsod: ang hangganan sa hilaga ay 4,500 siko, sa timog ay 4,500, sa silangan ay 4,500, at sa kanluran ay 4,500.
17 Ang sukat ng pastulan ng lunsod ay 250 siko sa hilaga, 250 sa timog, 250 sa silangan, at 250 sa kanluran.
18 “Ang natitirang bahagi ay kasinghaba ng banal na abuloy,+ 10,000 siko sa silangan at 10,000 sa kanluran. Kasinghaba ito ng banal na abuloy, at ang mga ani rito ang magiging pagkain ng mga naglilingkod sa lunsod.
19 Sasakahin ito ng mga naglilingkod sa lunsod na mula sa lahat ng tribo ng Israel.+
20 “Ang buong abuloy ay 25,000 siko kuwadrado, kasama na ang pag-aari ng lunsod. Ibubukod ninyo ito bilang banal na abuloy.
21 “Ang matitira sa magkabilang panig ng banal na abuloy at ng bahaging pag-aari ng lunsod ay mapupunta sa pinuno.+ Nasa tabi ito ng silangan at kanlurang hangganan ng abuloy na may habang 25,000 siko. Ang hangganan ng lupaing para sa pinuno ay katulad ng hangganan ng katabing mga tribo. Ang banal na abuloy at ang santuwaryo ng templo ay nasa gitna nito.
22 “Ang pag-aari ng mga Levita at ng lunsod ay nasa gitna ng lupaing pag-aari ng pinuno. Ang teritoryo ng pinuno ay nasa pagitan ng hangganan ng Juda+ at ng Benjamin.
23 “Ito naman ang natitirang mga tribo: Ang bahagi ng Benjamin ay mula sa silangan hanggang sa kanlurang hangganan.+
24 Ang bahagi ng Simeon ay nasa tabi ng hangganan ng Benjamin,+ mula sa silangan hanggang sa kanlurang hangganan.
25 Ang bahagi ng Isacar+ ay nasa tabi ng hangganan ng Simeon, mula sa silangan hanggang sa kanlurang hangganan.
26 Ang bahagi ng Zebulon ay nasa tabi ng hangganan ng Isacar,+ mula sa silangan hanggang sa kanlurang hangganan.+
27 Ang bahagi ng Gad ay nasa tabi ng hangganan ng Zebulon,+ mula sa silangan hanggang sa kanlurang hangganan.
28 Ang hangganan sa timog, kung nasaan ang hangganan ng Gad, ay mula Tamar+ hanggang sa katubigan ng Meribat-kades,+ papunta sa Wadi*+ at sa Malaking Dagat.*
29 “Ito ang lupaing hahati-hatiin ninyo bilang mana ng mga tribo ng Israel,+ at ito ang magiging bahagi nila,”+ ang sabi ng Kataas-taasang Panginoong Jehova.
30 “Ito ang mga labasan ng lunsod: Ang hilagang panig ay may sukat na 4,500 siko.+
31 “Ang mga pintuang-daan ng lunsod ay isusunod sa pangalan ng mga tribo ng Israel. May tatlong pintuang-daan sa hilaga: pintuang-daan ng Ruben, pintuang-daan ng Juda, at pintuang-daan ng Levi.
32 “Ang silangang panig ay may haba na 4,500 siko, at may tatlong pintuang-daan dito: pintuang-daan ng Jose, pintuang-daan ng Benjamin, at pintuang-daan ng Dan.
33 “Ang timugang panig ay may sukat na 4,500 siko, at may tatlong pintuang-daan dito: pintuang-daan ng Simeon, pintuang-daan ng Isacar, at pintuang-daan ng Zebulon.
34 “Ang kanlurang panig ay may haba na 4,500 siko, at may tatlong pintuang-daan dito: pintuang-daan ng Gad, pintuang-daan ng Aser, at pintuang-daan ng Neptali.
35 “Ang palibot ay may sukat na 18,000 siko. At mula sa araw na iyon, ang ipapangalan sa lunsod ay Naroon si Jehova.”+