Mga Kawikaan 15:1-33
15 Ang mahinahong sagot ay nakapapawi ng galit,+Pero ang masakit na salita ay nakagagalit.+
2 Ang dila ng marurunong ay mahusay sa paggamit ng kaalaman,+Pero kamangmangan ang lumalabas sa bibig ng mga mangmang.
3 Nakikita ni Jehova ang lahat ng bagay;*Binabantayan niya ang masasama at mabubuti.+
4 Ang mahinahong* dila ay punongkahoy ng buhay,+Pero ang mapandayang dila ay nagdudulot ng pighati.*
5 Binabale-wala ng mangmang ang disiplina ng kaniyang ama,+Pero ang marunong ay tumatanggap ng pagtutuwid.*+
6 Maraming kayamanan sa bahay ng matuwid,Pero ang ani* ng masamang tao ay nagdadala sa kaniya ng problema.+
7 Ang mga labi ng marurunong ay namamahagi ng kaalaman,+Pero hindi gayon ang puso ng mangmang.+
8 Kasuklam-suklam kay Jehova ang hain ng masasama,+Pero kalugod-lugod sa kaniya ang panalangin ng mga matuwid.+
9 Napopoot si Jehova sa lakad ng masama,+Pero mahal niya ang nagsisikap na maging matuwid.+
10 Para sa lumilihis ng landas, malupit* ang disiplina,+Pero ang napopoot sa saway ay mamamatay.+
11 Kitang-kita ni Jehova ang Libingan* at ang lugar ng pagkapuksa,*+
Gaano pa kaya ang puso ng mga tao!+
12 Ayaw ng mayabang sa nagtutuwid* sa kaniya.+
Hindi siya hihingi ng payo sa marurunong.+
13 Nagpapaaliwalas ng mukha ang masayang puso,Pero nakasisira ng loob* ang kirot sa puso.+
14 Ang pusong may unawa ay naghahanap ng kaalaman,+Pero ang bibig ng mga mangmang ay tumatangkilik* sa kamangmangan.+
15 Laging pangit ang araw ng napipighati,+Pero laging may pagdiriwang ang taong masaya* ang puso.+
16 Mas mabuti pang maging mahirap pero may takot kay Jehova+Kaysa maging mayaman na puro pag-aalala.*+
17 Mas mabuti pang gulay lang ang pagkain pero may pagmamahalan+Kaysa sa pinatabang toro* pero may pagkakapootan.+
18 Nagkakaroon ng away dahil sa taong mainitin ang ulo,+Pero dahil sa taong hindi madaling magalit, tumitigil ang pagtatalo.+
19 Ang daan ng tamad ay parang may matitinik na harang,+Pero ang landas ng mga matuwid ay gaya ng patag na daan.+
20 Ang marunong na anak ay nagpapasaya sa kaniyang ama,+Pero ang mangmang ay humahamak sa kaniyang ina.+
21 Nasisiyahan sa kamangmangan ang kulang sa unawa,*+Pero lumalakad sa tamang landas ang taong may kaunawaan.+
22 Nabibigo ang plano kapag hindi napag-uusapan,*Pero nagtatagumpay ito kapag marami ang tagapayo.+
23 Masaya ang taong nagbibigay ng tamang sagot,*+At ang salitang sinabi sa tamang panahon—napakabuti nito!+
24 Paakyat sa landas ng buhay ang may kaunawaan,+Palayo sa Libingan* sa ibaba.+
25 Gigibain ni Jehova ang bahay ng mapagmataas,+Pero iingatan niya ang hangganan ng lupain ng biyuda.+
26 Nasusuklam si Jehova sa mga pakana ng masama,+Pero ang mabuting pananalita ay kalugod-lugod sa Kaniya.+
27 Ang nandaraya para sa pakinabang ay nagdadala ng problema* sa pamilya niya,+Pero ang napopoot sa suhol ay mananatiling buháy.+
28 Ang puso ng matuwid ay nag-iisip muna bago sumagot,*+Pero inilalabas agad ng bibig ng masama ang masasamang bagay.
29 Malayo si Jehova sa masasama,Pero pinakikinggan niya ang panalangin ng mga matuwid.+
30 Ang nagniningning na mga mata* ay nagpapasaya ng puso;Ang magandang balita ay nagpapalakas* ng mga buto.+
31 Kabilang sa marurunongAng taong nakikinig sa nagbibigay-buhay na saway.+
32 Ang tumatanggi sa disiplina ay namumuhi sa buhay niya,+Pero ang nakikinig sa saway ay nagkakaroon ng unawa.*+
33 Ang pagkatakot kay Jehova ay nagsasanay sa isang tao na maging marunong,+At ang kapakumbabaan ay umaakay sa karangalan.+
Talababa
^ O “lugar.”
^ O “nagpapagaling na.”
^ Lit., “ay dumudurog ng espiritu.”
^ O “saway.”
^ O “kita.”
^ O “masama.”
^ O “ang Abadon.”
^ O “sumasaway.”
^ O “dumudurog ng espiritu.”
^ O “nabubusog.”
^ O “mabuti.”
^ O “kalituhan.”
^ Lit., “sa torong pinakakain sa sabsaban.”
^ Lit., “kapos ang puso.”
^ O “kapag walang masinsinang usapan.”
^ Lit., “ng sagot ng bibig niya.”
^ O “kahihiyan.”
^ O “nagbubulay-bulay muna bago magsalita; nag-iisip na mabuti kung paano sasagot.”
^ O “Ang tingin na may kasamang ngiti.”
^ Lit., “nagpapataba.”
^ Lit., “puso.”