Mga Awit 45:1-17
Sa direktor; sa himig ng “Mga Liryo.” Awit ng mga anak ni Kora.+ Maskil.* Isang awit ng pag-ibig.
45 Ang puso ko ay napukaw ng isang mabuting bagay.
Sinasabi ko: “Ang awit* ko ay tungkol sa isang hari.”+
Ang dila ko nawa ay maging panulat+ ng isang dalubhasang tagakopya.*+
2 Ikaw ang pinakamakisig sa mga anak ng tao.
Kahali-halina ang mga salitang lumalabas sa mga labi mo.+
Kaya ang pagpapala sa iyo ng Diyos ay magpakailanman.+
3 Isukbit mo sa tagiliran mo ang iyong espada,+ O makapangyarihan,+Taglay ang iyong dangal at karilagan.+
4 At sa karilagan mo ay humayo ka at magtagumpay;+Sakay ng iyong kabayo ay ipakipaglaban mo ang katotohanan at kapakumbabaan at katuwiran,+At ang kanang kamay mo ay makagagawa* ng kamangha-manghang mga bagay.
5 Ang mga palaso mo ay matutulis at nagpapabagsak sa mga nasa harapan mo;+Tumatagos ang mga ito sa puso ng mga kaaway ng hari.+
6 Ang Diyos ang trono mo magpakailanman;+Ang setro ng iyong kaharian ay setro ng katuwiran.*+
7 Inibig mo ang katuwiran+ at kinapootan ang kasamaan.+
Kaya naman ang Diyos, ang iyong Diyos, ay nagpahid sa iyo+ ng langis ng kagalakan+ nang higit kaysa sa mga kasamahan mo.
8 Ang lahat ng damit mo ay pinabanguhan ng mira at aloe at kasia;Pinasasaya ka ng mga instrumentong de-kuwerdas mula sa maringal na palasyong garing.*
9 Ang mga anak na babae ng mga hari ay kabilang sa mga pinararangalang babae sa palasyo mo.
Tumayo sa kanan mo ang reyna, na may mga palamuting ginto ng Opir.+
10 Dinggin mo, O anak na babae, magbigay-pansin ka at makinig;Kalimutan mo ang bayan mo at ang sambahayan ng iyong ama.
11 At ang hari ay mananabik sa kagandahan mo.Siya ang panginoon mo,Kaya yumukod ka sa kaniya.
12 Darating ang anak na babae ng Tiro na may dalang regalo;Susuyuin ka* ng pinakamayayamang tao.
13 Sa loob ng palasyo,* ang anak na babae ng hari ay napakaganda;Ang damit niya ay napapalamutian ng ginto.
14 Ihahatid siya sa hari suot ang damit na maganda ang pagkakahabi.*
Ang mga kasamahan niyang dalaga na sumusunod sa kaniya ay dadalhin sa harap mo.
15 Ihahatid sila nang may pagsasaya at kagalakan;Papasok sila sa palasyo ng hari.
16 Ang mga anak mo ang hahalili sa iyong mga ninuno.
Aatasan mo sila bilang matataas na opisyal* sa buong lupa.+
17 Ipaaalam ko ang pangalan mo sa lahat ng darating na henerasyon.+
Kaya pupurihin ka ng mga bayan magpakailanman.
Talababa
^ Lit., “mga gawa.”
^ O “eskriba.”
^ Lit., “magtuturo sa iyo.”
^ O “katarungan.”
^ Sa Ingles, ivory.
^ Lit., “Ang mukha mo ay palalambutin.”
^ Lit., “Sa loob.”
^ O posibleng “damit na may burda.”
^ O “bilang mga prinsipe.”
