Mga Awit 96:1-13
96 Umawit kayo kay Jehova ng isang bagong awit.+
Buong lupa, umawit kayo kay Jehova!+
2 Umawit kayo kay Jehova; purihin ninyo ang pangalan niya.
Ihayag ninyo araw-araw ang mabuting balita ng pagliligtas niya.+
3 Isaysay ninyo sa mga bansa ang kaluwalhatian niya,Sa lahat ng bayan ang kaniyang kamangha-manghang mga gawa.+
4 Si Jehova ay dakila at karapat-dapat sa lahat ng papuri.
Mas dapat siyang katakutan kaysa sa lahat ng iba pang diyos.
5 Ang lahat ng diyos ng mga bansa ay walang-silbing mga diyos,+Pero si Jehova ang gumawa ng langit.+
6 Napapalibutan siya ng dangal at kaluwalhatian;+Nasa santuwaryo niya ang lakas at kagandahan.+
7 Ibigay ninyo kay Jehova ang nararapat sa kaniya, kayong mga pamilya ng mga bayan,Ibigay ninyo kay Jehova ang nararapat sa kaniya dahil sa kaniyang lakas at kaluwalhatian.+
8 Ibigay ninyo kay Jehova ang kaluwalhatiang nararapat sa pangalan niya;+Magdala kayo ng kaloob at pumasok sa mga looban niya.
9 Yumukod* kayo kay Jehova nang may banal na kasuotan;*Manginig kayo sa harap niya, buong lupa!
10 Ihayag ninyo sa mga bansa: “Si Jehova ay naging Hari!+
Matibay ang pagkakagawa sa lupa,* hindi ito magagalaw.*
Hahatol siya nang patas sa mga bayan.”*+
11 Magsaya ang langit, at magalak ang lupa;Umugong ang dagat at ang lahat ng naroon;+
12 Magsaya ang mga parang at ang lahat ng naroon.+
Kasabay nito, ang mga puno sa kagubatan ay humiyaw sa kagalakan+
13 Sa harap ni Jehova, dahil dumarating* siya,Dumarating siya para hatulan ang lupa.
Hahatulan niya ang lupa* ayon sa katuwiran+At ang mga bayan ayon sa kaniyang katapatan.+
Talababa
^ O posibleng “dahil sa karilagan ng kabanalan niya.”
^ O “Sumamba.”
^ O “mabungang lupain.”
^ O “mayayanig.”
^ O “Ipaglalaban niya ang usapin ng bayan ayon sa katuwiran.”
^ O “dumating na.”
^ O “mabungang lupain.”
