Mga Bilang 10:1-36
10 At sinabi ni Jehova kay Moises:
2 “Gumawa ka ng dalawang trumpeta;+ pinukpok na pilak ang gagamitin mo sa paggawa, at gamitin mo ang mga iyon para tipunin ang kapulungan at para ipaalám na aalis na ang kampo.
3 Kapag dalawa ang hinipan, ang buong bayan ay dapat magtipon sa harap mo sa pasukan ng tolda ng pagpupulong.+
4 Kung isa lang ang hinipan, ang magtitipon lang sa harap mo ay ang mga pinuno, ang mga ulo ng libo-libo sa Israel.+
5 “Kapag humihip kayo sa mga trumpeta ng isang pabago-bagong tunog, dapat umalis ang mga nagkakampo sa silangan.+
6 Kapag humihip kayo sa mga trumpeta ng isang pabago-bagong tunog sa ikalawang pagkakataon, dapat umalis ang mga nagkakampo sa timog.+ Sa ganitong paraan nila patutunugin ang mga trumpeta tuwing aalis ang isa sa mga pangkat.
7 “Kapag titipunin ninyo ang kongregasyon, hipan ninyo ang mga trumpeta,+ pero hindi dapat pabago-bago ang tunog.
8 Ang mga anak ni Aaron, na mga saserdote, ang dapat humihip sa mga trumpeta,+ at ang paggamit sa mga iyon ay magiging isang batas hanggang sa panahong walang takda para sa inyo, sa lahat ng henerasyon ninyo.
9 “Kung makikipagdigma kayo sa inyong lupain laban sa isang kaaway* na nagpapahirap sa inyo, magpatunog kayo sa mga trumpeta ng isang panawagan sa pakikipagdigma,+ at maaalaala kayo ng Diyos ninyong si Jehova at maililigtas kayo mula sa inyong mga kaaway.
10 “Gayundin, sa masasayang okasyon ninyo+—sa inyong mga kapistahan+ at sa pasimula ng inyong mga buwan—hihipan ninyo ang mga trumpeta sa harap ng inyong mga handog na sinusunog+ at mga haing pansalo-salo;+ ang mga iyon ay magsisilbing paalaala sa harap ng inyong Diyos para sa inyo. Ako ang Diyos ninyong si Jehova.”+
11 Nang ikalawang taon, noong ika-20 araw ng ikalawang buwan,+ ang ulap ay pumaitaas mula sa ibabaw ng tabernakulo+ ng Patotoo.
12 Kaya ang mga Israelita ay umalis sa ilang ng Sinai ayon sa itinakdang paraan ng kanilang pag-alis,+ at tumigil ang ulap sa ilang ng Paran.+
13 Ito ang unang pagkakataong umalis sila ayon sa mga tagubiling ibinigay ni Jehova sa pamamagitan ni Moises.+
14 Kaya ang unang umalis ay ang tatlong-tribong pangkat ng kampo ng mga anak ni Juda, ayon sa kanilang mga grupo,* at si Nason+ na anak ni Aminadab ang namamahala sa grupo nito.
15 Ang namamahala sa grupo ng tribo ng mga anak ni Isacar ay si Netanel+ na anak ni Zuar.
16 Ang namamahala sa grupo ng tribo ng mga anak ni Zebulon ay si Eliab+ na anak ni Helon.
17 Nang makalas na ang tabernakulo,+ umalis ang mga anak ni Gerson+ at mga anak ni Merari,+ na tagabuhat ng tabernakulo.
18 Kasunod na umalis ang tatlong-tribong pangkat ng kampo ni Ruben, ayon sa kanilang mga grupo,* at si Elizur+ na anak ni Sedeur ang namamahala sa grupo nito.
19 Ang namamahala sa grupo ng tribo ng mga anak ni Simeon ay si Selumiel+ na anak ni Zurisadai.
20 Ang namamahala sa grupo ng tribo ng mga anak ni Gad ay si Eliasap+ na anak ni Deuel.
21 Pagkatapos, umalis ang mga Kohatita na tagapagdala ng mga kagamitan sa santuwaryo.+ Dapat na naitayo na ang tabernakulo pagdating nila roon.
22 Kasunod na umalis ang tatlong-tribong pangkat ng kampo ng mga anak ni Efraim, ayon sa kanilang mga grupo,* at si Elisama+ na anak ni Amihud ang namamahala sa grupo nito.
23 Ang namamahala sa grupo ng tribo ng mga anak ni Manases ay si Gamaliel+ na anak ni Pedazur.
24 Ang namamahala sa grupo ng tribo ng mga anak ni Benjamin ay si Abidan+ na anak ni Gideoni.
25 Kasunod na umalis ang tatlong-tribong pangkat ng kampo ng mga anak ni Dan, ayon sa kanilang mga grupo,* at sila ang nagsilbing bantay sa likuran ng buong kampo, at si Ahiezer+ na anak ni Amisadai ang namamahala sa grupo nito.
26 Ang namamahala sa grupo ng tribo ng mga anak ni Aser ay si Pagiel+ na anak ni Ocran.
27 Ang namamahala sa grupo ng tribo ng mga anak ni Neptali ay si Ahira+ na anak ni Enan.
28 Ganito ang pagkakasunod-sunod ng mga Israelita at ng kanilang mga grupo* kapag umaalis sila.+
29 At sinabi ni Moises kay Hobab na anak ni Reuel*+ na Midianita, na biyenan ni Moises: “Papunta na kami sa lugar na ipinangako ni Jehova. Sinabi niya, ‘Ibibigay ko iyon sa inyo.’+ Sumama ka sa amin,+ at magiging mabuti kami sa iyo, dahil nangako si Jehova ng mabubuting bagay para sa Israel.”+
30 Pero sumagot ito: “Hindi ako sasama. Babalik ako sa sarili kong lupain at mga kamag-anak.”
31 Kaya sinabi niya: “Pakiusap, huwag mo kaming iwan, dahil alam mo kung saan kami puwedeng magkampo sa ilang, at maituturo mo sa amin ang daan.*
32 At kung sasama ka sa amin,+ anumang kabutihang ipakita sa amin ni Jehova ay ipapakita rin namin sa iyo.”
33 Kaya mula sa bundok ni Jehova+ ay sinimulan nila ang tatlong-araw na paglalakbay, at sa tatlong-araw na paglalakbay na iyon ay nauuna sa kanila ang kaban+ ng tipan ni Jehova para maghanap ng lugar kung saan sila puwedeng magkampo.+
34 At ang ulap ni Jehova+ ay nasa itaas nila kung araw kapag naglalakbay sila.
35 Tuwing inililipat ang Kaban, sinasabi ni Moises: “Bumangon ka, O Jehova,+ at pangalatin mo ang iyong mga kaaway, at tumakas nawa mula sa harap mo ang mga napopoot sa iyo.”
36 At kapag inilalapag ito, sinasabi niya: “Bumalik ka, O Jehova, sa di-mabilang* na libo-libo ng Israel.”+
Talababa
^ O “maniniil.”
^ Lit., “hukbo.”
^ Lit., “hukbo.”
^ Lit., “hukbo.”
^ Lit., “hukbo.”
^ Lit., “hukbo.”
^ Si Jetro.
^ Lit., “at ikaw ang magiging mata namin.”
^ O “laksa-laksa.”
