Mga Kawikaan 20:1-30
20 Ang alak ay manunuya,+ ang inuming de-alkohol ay magulo;+Ang naliligaw dahil sa mga ito ay hindi marunong.+
2 Ang pagkatakot sa* hari ay gaya ng pagkatakot sa ungal ng leon;+Ang gumagalit sa kaniya ay nagsasapanganib ng sariling buhay.+
3 Kapuri-puri ang taong umiiwas sa pakikipagtalo,+Pero madaling mapaaway ang mangmang.+
4 Ang tamad ay hindi nag-aararo sa taglamig,Kaya mamamalimos siya sa panahon ng pag-aani dahil walang-wala siya.*+
5 Ang laman* ng puso ng tao* ay gaya ng malalim na tubig,Pero nasasalok ito ng taong may kaunawaan.
6 Marami ang nagsasabi na may tapat na pag-ibig sila,Pero mahirap makakita ng totoong tapat.
7 Ang matuwid ay lumalakad nang tapat.+
Magiging maligaya ang mga anak niya.+
8 Kapag ang hari ay umuupo sa trono para humatol,+Sinasala ng mga mata niya ang lahat ng kasamaan.+
9 Sino ang makapagsasabi: “Nilinis ko ang puso ko;+Malinis na ako at walang kasalanan”?+
10 Ang madayang panimbang at ang maling panukat*Ay parehong kasuklam-suklam kay Jehova.+
11 Kahit bata* ay makikilala sa kilos niya,Kung ang ugali niya ay malinis at matuwid.+
12 Ang taingang nakaririnig at ang matang nakakakita—Ang mga iyon ay parehong ginawa ni Jehova.+
13 Huwag kang tulog nang tulog, dahil maghihirap ka.+
Buksan mo ang mga mata mo, at mabubusog ka sa tinapay.+
14 “Ang pangit, ang pangit!” ang sabi ng bumibili;Pagkatapos, umaalis siya at nagyayabang.+
15 Nariyan ang ginto at maraming korales,*Pero mas mahalaga ang mga labi ng kaalaman.+
16 Kunin mo ang damit ng isang tao kung nanagot siya para sa estranghero;+Kunin mo ang prenda niya kung nanagot siya para sa babaeng banyaga.*+
17 Masarap para sa isang tao ang tinapay na nakuha sa pandaraya,Pero sa bandang huli, mapupuno ng graba ang bibig niya.+
18 Magtatagumpay* ang mga plano kapag napag-uusapan,*+At makipaglaban ka nang may mahusay na patnubay.+
19 Ang maninirang-puri ay gumagala para magbunyag ng mga sekreto;+Huwag kang makisama sa mahilig magkalat ng tsismis.*
20 Ang sinumang sumusumpa sa kaniyang ama at ina,Papatayin ang lampara niya pagsapit ng dilim.+
21 Ang mana na nakuha dahil sa kasakimanAy hindi magiging pagpapala sa bandang huli.+
22 Huwag mong sabihin: “Gaganti ako ng masama!”+
Umasa ka kay Jehova,+ at ililigtas ka niya.+
23 Ang madayang panimbang* ay kasuklam-suklam kay Jehova,At ang di-tapat na timbangan ay hindi mabuti.
24 Pinapatnubayan ni Jehova ang mga hakbang ng tao,+Dahil paano malalaman ng tao kung saan siya pupunta?*
25 Nagiging bitag sa isang tao ang pagsigaw niya nang padalos-dalos, “Banal!”+
At pagkatapos na lang niya pag-iisipan ang panata niya.+
26 Sinasala ng marunong na hari ang masasama,+At pinadadaanan niya sila sa gulong na panggiik.+
27 Ang hininga ng tao ang lampara ni Jehova,Ang nagsisiwalat sa kaloob-looban ng tao.
28 Ang tapat na pag-ibig at katapatan ang nag-iingat sa hari;+Napananatili niya ang kaniyang trono dahil sa tapat na pag-ibig.+
29 Ang karangalan ng mga kabataang lalaki ay ang lakas nila,+At ang kaluwalhatian ng matatandang lalaki ay ang puting buhok nila.+
30 Ang mga pasa at sugat ay nag-aalis ng* kasamaan,+At dinadalisay ng mga hampas ang kaloob-looban ng tao.
Talababa
^ O “Ang pagiging nakakatakot ng.”
^ O posibleng “Maghahanap siya sa panahon ng pag-aani pero walang makikita.”
^ O “intensiyon.” Lit., “payo.”
^ O “Ang kaisipan ng tao.”
^ O “Ang dalawang klase ng batong panimbang at dalawang klase ng takalan.”
^ O “ang isang batang lalaki.”
^ O “para sa banyaga.”
^ O “Magiging matatag.”
^ O “dahil sa mga payo.”
^ O “sa nanghihiyakat sa pamamagitan ng mga labi niya.”
^ O “Ang dalawang klase ng batong panimbang.”
^ O “Dahil paano maiintindihan ng tao ang sarili niyang lakad?”
^ O “ay kumakayod sa.”
