Ikadalawampung-Siglong “Fax”

MULA sa New York hanggang sa Toronto nang wala pang isang minuto. Iyan ang bilis ng fax. Ano ba ito? Simpleng inilalarawan​—ito’y isang malayong pagkopya ng larawan​—komunikasyon nang walang salitaan. Sa Estados Unidos lamang, mahigit na isang daang libong mga makinang tagakopya ang binibili buwan-buwan.

Ang mga doktor ay nagpapadala ng medikal na mga report, inililipat ng mga abugado ang legal na mga kopya, pinupunan ng mga mamimili sa groseri ang mga pidido, at ang mga istasyon ng radyo ay tumatanggap ng mga kahilingang awit buhat sa mga tagapakinig​—pawang sa pamamagitan ng fax. Sa loob lamang ng isang oras pagkasilang ng kaniyang sanggol, kinopya pa nga ng isang ina sa California ang bakas ng paa ng sanggol sa pamamagitan ng fax at ipinadala ito sa mga lolo’t lola sa ibang estado.

Papaano Ito Umaandar?

Napakasimple nito. Ang kailangan mo lamang ay isang telepono, isang plag ng koryente sa dingding, at isang makinang fax. Ang dokumento ay ipinapasok sa makina, kung saan binabasa ng scanning device ang lahat ng maiitim na kulay sa pahina, binabago ito tungo sa elektrikal na mga impulso, at inihahatid ito sa pamamagitan ng linya ng telepono. Isinasaling-muli ng tagatanggap na fax ang mga impulso tungo sa maiitim na kulay at iniimprenta ang eksaktong kopya.

Saan Nagmula ang Teknolohiyang Ito?

Noong 1843 isang relohero at imbentor na taga-Scotland na nagngangalang Alexander Bain ay gumawa at ipinapatente ang unang fax. Isa itong di-kompletong scanning device kung ihahambing sa mga pamantayan ngayon. Isang stylus na nakatali sa koryente na nakakabit sa dulo ng isang umuugoy na pendulo ang paroo’t paritong umuugoy sa isang bloke ng tipong metal, na naghahatid ng elektrikong mga pulso sa mga pahatirang-kawad. Isa pang tinaliang pendulo ang nagsasalin ng bawat pulso tungo sa maitim na dako sa elektrosensitibong papel.

Noong 1907 ay nakagawa ng mga fax na gumagamit ng isang umiikot na drum at isang photoelectric cell na makababasa ng ordinaryong titik mula sa isang piraso ng papel na nakabalot sa palibot ng  drum. Gayunman, ang paghahatid sa pamamagitan ng mga hudyat ng radyo ay mabagal at kadalasang napasasailalim ng mga interference.

Ang teknolohiya ng 1980’s, na gumagamit ng mga fiber optic, digital transmission, at signal compression, ay ginawang posible ang mga fax na makababasa at makapaghahatid ng dokumento na kasimbilis ng tatlong segundo sa bawat pahina sa ilalim ng pantanging mga kalagayan. Sa kasalukuyan, ang pinakamalaganap na ginagamit na grupo ng mga makina ay may praktikal na bilis ng paghahatid na 45 segundo sa bawat pahina.

Paano Ginagamit ang Fax?

Ang mga impormasyong sensitibo sa panahon ay karaniwan nang inihahatid sa magdamag ng mensahero o ng koreo ay maaari na ngayong ihatid sa loob lamang ng ilang minuto. Ang mahahalagang dokumento ay maaaring ipadala sa pamamagitan ng fax at tatanggapin ng pinadalhan na halos kaparehong panahong gugugulin mo upang lagyan ng direksiyon ang sobre, lagyan ng selyo, at ihulog ito.

Sa Canada isang bata ang narikonosi kamakailan na may malubha, nagsasapanganib-buhay na medikal na komplikasyon na nangangailangan ng paggagamot na ginagamitan ng dugo. Bilang mga Saksi ni Jehova, ang mga magulang ay matatag sa kanilang relihiyosong paniniwala na sa ilalim ng anumang kalagayan ay hindi gagamitan ng dugo. Ang mga mananaliksik sa medisina ay nakilala, at sa loob lamang ng ilang minuto ang mga artikulo ay ipinadala sa pamamagitan ng fax sa nangangasiwang doktor upang tumulong sa pangkat ng mga doktor sa pagtaya sa kahaliling mga paraan na hindi gumagamit ng dugo. Ang kahilingan ng mga magulang ay iginalang, at ang sanggol ay matagumpay na ginamot. Ang pamilya ay humanga na ang mga pangkat ng mga doktor sa ospital ay gumagamit ngayon ng fax na pinaka-behikulo upang ibahagi ang medikal na protokol.

Kahit ang news media ay mabisang gumagamit ng fax. Noong 1989, nang supilin ng hukbong Intsik ang isang paghihimagsik ng mga estudyante sa Plasa ng Tiananmen sa Beijing, Tsina, pinagbawalan ng gobyerno ang pag-uulat ng telebisyon, radyo, at pahayagan. Ang mga kawad ng telepono ay iniwang bukás upang panatilihin ang internasyonal na kalakalan, kaya ipinadala ng mga reporter ang balita at mga larawan sa pamamagitan ng fax sa mga tao sa loob ng Tsina at sa iba pang bahagi ng daigdig.

Sinamantala rin ng industriya ng pag-aanunsiyo ang teknolohiyang ito. Sinabi ng isang marketing manedyer na kapag ang mga anunsiyo sa pamamagitan ng fax ang ipinadadala, “ang mga mensahe ay may diwa ng pagmamadali at pagkaapurahan. Ang mga ito’y agad na binabasa.” Subalit kung tatanungin naman ang maraming may-ari ng makinang fax, ang basurang fax na ito ay nakakagulo lamang sa kanilang kagamitan, humahadlang sa kanilang pagtanggap ng impormasyon na mahalaga sa kanilang negosyo.

Gaya ng ipinakikita sa itaas, ang gamit ng fax ay natatakdaan lamang ng ating guniguni. Gayunman, gaya ng karamihan ng bagong teknolohiya, mayroong aabuso rito.

Ano ang Kinabukasan ng Fax?

Nakikini-kinita ng isang computer engineer na ang mga fax ay bibilis at huhusay pa. Habang ang mga makina sa ibabaw ng mesa ay nagiging pangkaraniwan sa mga negosyo, hahalinhan ng panloob na paggamit ng mga makinang fax ang panloob na paghahatid ng sulat. Ang buong-kulay na mga kopya, gayundin ng nabibitbit na mga makina ng fax, ay ginagawa na. Isang tagakopya/nag-iimprenta/na makinang fax na inuugitan ng isang personal na computer ay inaasahan din sa hinaharap. Inihuhula pa nga ng isang pangunahing manggagawa na makukuha na ang $100 na personal na mga makinang fax na kasinlaki ng isang memo pad.

Bagaman ang telepono ay nagbibigay pa rin ng kagyat na berbal na komunikasyon, ang gayong mga mensahe kung minsan ay maling nasisipi o namamali ng interpretasyon. Maaaring ihatid ng fax ang aktuwal na mensahe sa limbag​—at mabilis. Isa na ito ngayong mahalagang aparato sa komunikasyon sa ating buhay. Ang fax ay masulong na at mananatili.