Ang Inyong Anak ay Nanganganib!

Ang pang-aabuso sa mga bata ay isang karima-rimarim na pangyayari sa buktot na sanlibutang ito. Ganito ang sabi ng magasing Lear’s: “Naaapektuhan nito ang mas marami sa atin kaysa kanser, kaysa sakit sa puso, kaysa AIDS.” Kaya naman ang Gumising! ay nakadama ng pananagutan na babalaan ang mga mambabasa nito sa panganib na ito at kung ano ang magagawa tungkol dito.​—Ihambing ang Ezekiel 3:17-21; Roma 13:11-13.

SA NAKALIPAS na mga taon ay bumangon ang isang pandaigdig na pagkabahala hinggil sa pang-aabuso sa mga bata. Subalit ang tuon ng pansin ng media, na punô ng kilalang mga tao na hayagang nagsiwalat ng kani-kanilang mga karanasan tungkol sa pang-aabuso sa bata, ay humantong sa ilang karaniwang maling palagay. Inaakala ng ilan na ang lahat ng usap-usapang ito tungkol sa mga pang-aabuso sa mga bata ay isang kausuhan lamang. Bagaman, ang totoo ay hindi na bago ang tungkol sa gayong panghahalay. Ito’y kasintanda na ng kasaysayan ng tao.

Isang Sinaunang Suliranin

Mga 4,000 taon na ang nakalipas, kilala ang mga siyudad ng Sodoma at Gomorra sa kasamaan nito. Ang panghahalay sa mga bata ay maliwanag na kasama sa maraming masamang hilig ng rehiyon. Inilalarawan ng Genesis 19:4 ang grupo ng mga Sodomitang haling sa sekso na mula sa “batang lalaki hanggang sa matanda” na nagnanais na halayin ang dalawang lalaking panauhin ni Lot. Isaalang-alang: Bakit napukaw ang mga batang lalaki ng kaisipan na manghalay ng mga lalaki? Maliwanag na sila’y nalantad na sa homoseksuwal na kahalayan.

Pagkalipas ng mga dantaon, lumipat ang bansang Israel sa rehiyon ng Canaan. Ang lupaing ito ay tigmak ng insesto, pakikipagtalik sa kasekso, pakikipagtalik sa hayop, prostitusyon, at maging ng rituwal na pag-aalay ng mga bata sa mga diyos na demonyo anupat ang lahat ng masasamang gawaing ito ay tahasang ipinagbawal sa Kautusang Mosaico. (Levitico 18:6, 21-23; 19:29; Jeremias 32:35) Sa kabila ng mga babala, buhat sa Diyos tinularan ng mapaghimagsik na mga Israelita, pati na rin ng ilan sa kanilang mga pinuno, ang kasuklam-suklam na mga gawaing ito.​—Awit 106:35-38.

Gayunman, mas grabe pa ang kasamaan ng sinaunang Gresya at Roma kaysa sa Israel sa bagay na ito. Ang pagpatay sa mga bata ay karaniwan sa dalawang bansa, at sa Gresya ay malaganap na tinatanggap ang gawain ng matatandang lalaki na makipagtalik sa mga batang lalaki. Ang mga bahay aliwan na kinaroroonan ng mga batang lalaki na nagbibili ng aliw ay naglipana sa bawat sinaunang lungsod ng Gresya. Sa Imperyo ng Roma, laganap ang prostitusyon ng bata anupat pantanging isinaayos ang espesyal na mga buwis at pista opisyal para sa negosyong iyan. Sa mga arena, ang mga batang babae ay hinalay at pinuwersang gumawa ng mistulang hayop na pakikipagtalik. Ang katulad na mga gawang kasamaan ay palasak sa maraming ibang sinaunang bansa.

Kumusta naman sa modernong panahon? Ang sangkatauhan ba ay napakasibilisado na upang lumaganap  pa sa ngayon ang gayong karima-rimarim na mga pakikipagtalik? Hindi matanggap ng mga Estudyante ng Bibliya ang paniwalang ito. Batid nila na inilarawan ni apostol Pablo ang ating kapanahunan bilang ang “mapanganib na mga panahon na mahirap pakitunguhan.” Inisa-isa niya ang laganap na pag-ibig sa sarili, pag-ibig sa kalayawan, at panlalamig ng likas na pag-iibigan sa pamilya na karaniwan sa modernong lipunan at nagsusog pa: “Ang mga taong balakyot at mga magdaraya ay lalong sasamâ.” (2 Timoteo 3:1-5, 13; Apocalipsis 12:7-12) Ang pang-aabuso ba sa bata, na kalimitang ginagawa ng “mga taong balakyot at mga magdaraya,” ay lumubha?

Isang Malubhang Suliranin

Ang mga panghahalay sa mga bata ay kalimitang inililihim, anupat ang mga ito’y tinatawag na marahil ang pinakadi-naiuulat na mga krimen. Gayunpaman, ang gayong mga krimen ay maliwanag na lumubha sa nakalipas na mga dekada. Sa Estados Unidos, isang surbey tungkol sa suliraning ito ang isinagawa ng Los Angeles Times. Natuklasan nito na ang 27 porsiyento ng kababaihan at 16 na porsiyento ng kalalakihan ay hinalay noong sila’y mga bata pa. Bagaman nakagugulat ang mga estadistikang ito, ang ibang maingat na mga pagtantiya sa Estados Unidos ay lalong tumaas.

Sa Malaysia, ang mga ulat ng pang-aabuso sa bata ay tumaas nang apat na ulit sa nakalipas na dekada. Sa Thailand, mga 75 porsiyento ng kalalakihan sa isang surbey ang umamin na nakikipagtalik sa mga batang nagbibili ng aliw. Sa Alemanya, tinataya ng mga opisyal na kasindami ng 300,000 bata ang hinahalay taun-taon. Ayon sa pahayagang Cape Times ng Timog Aprika, ang dami ng ulat sa gayong panghahalay ay tumaas nang 175 porsiyento sa nakalipas na tatlong taon. Sa Netherlands at Canada, natuklasan ng mga mananaliksik na halos sangkatlo ng lahat ng kababaihan ay hinalay noong sila’y mga bata pa. Sa Pinlandya, 18 porsiyento ng mga babaing nasa ika-siyam na baitang (15 o 16 na taóng gulang) at 7 porsiyento ng mga lalaki ay iniulat na nakipagtalik sa isa na halos mas matanda sa kanila ng limang taon.

Sa iba’t ibang bansa ang nakababahalang mga ulat ay lumabas tungkol sa relihiyosong mga kulto na may kalupitang nang-aabuso ng mga bata sa pamamagitan ng pakikipagtalik at pagpapahirap. Kalimitan, ang mga nag-uulat na sila’y mga biktima ng gayong mga krimen ay pinakitunguhan nang may pag-aalinlangan, hindi nang may kaawaan.

Kaya ang panghahalay sa bata ay hindi na bago ni bihira man; ito’y malaon nang suliranin na laganap sa ngayon. Ang epekto nito ay nakasisira ng loob. Maraming naging biktima ang nakararanas ng matinding damdamin ng kawalang-halaga at mababang pagtingin sa sarili. Itinala ng mga may kaalaman sa bagay na ito ang ilang karaniwang mga epekto ng insesto sa mga babae, gaya ng paglalayas, pag-abuso sa droga at alkohol, panlulumo, pagtatangkang magpatiwakal, delingkuwensiya, pagkagahaman sa sekso, di-pagkatulog, at mga kahinaan sa pagkatuto. Kalakip sa nagtatagal na mga epekto ay ang mahinang kakayahan sa pagiging magulang, pagkawalang sigla sa pakikipagtalik, di-pagtitiwala sa mga lalaki, pakikipag-asawa sa isang pedophile, pagiging tomboy, prostitusyon, at pang-aabuso sa bata mismo.

Ang mga epektong ito ay maaaring maiwasan ng isang biktima; ni makatuwirang mapagpapaumanhinan ang sinuman sa lisyang paggawi dahil lamang sa siya’y hinalay noon. Hindi itinatakda ng pang-aabuso ang mga biktima nito na maging imoral o delingkuwente; ni inaalis nito ang lahat ng pansariling pananagutan sa mga pagpapasiya na ginagawa nila sa buhay sa dakong huli. Subalit ang karaniwang mga epektong ito para sa mga biktima ay totoong mapanganib. Ginagawa nitong mahalaga ang katanungan na, Paano natin maiingatan ang mga bata mula sa panghahalay?