Ekstrabagansa ng mga Naglalayag na Barko

I-PLAY

Ekstrabagansa ng mga Naglalayag na Barko

NG KABALITAAN NG GUMISING! SA PRANSIYA

NAGTAGPO NOONG HULYO 1999 ANG MARAMI SA PINAKAMAGAGANDANG NAGLALAYAG NA BARKO SA DAIGDIG SA ROUEN, SA GAWING HILAGA NG PRANSIYA, PARA SA ISANG MARINGAL NA KAPISTAHANG TINATAWAG NA ANG ARMADA NG DANTAON. TATLUMPUNG MALALAKING NAGLALAYAG NA BARKO ANG NAKAPUWESTO SA KAHABAAN NG PITONG KILOMETRONG DAUNGAN NA INIHANDA PARA SA OKASYON.

Ang pagdiriwang ay inianunsiyo bilang “ang ekstrabagansang maritima ng milenyo.” Nakaiskedyul sa panahon ng pagdiriwang ang mga konsiyerto, kuwitis, pagdiriwang sa dagat, at mga eksibisyon ng mga ipinintang larawan at mga litrato tungkol sa paglalayag.

Ang Biyernes, Hulyo 9, ay kinakitaan ng maringal na pagdating ng naglalayag na mga barko. Sa sumunod na sampung araw, milyun-milyong bisita mula sa Pransiya at sa iba pang mga bansa sa Europa ang dumagsa sa mga daungan.

Ang ilan sa mga barko—gaya ng Dar Młodziezy (Poland), ang Khersones (Ukraine), ang Statsraad Lehmkuhl (Norway), at ang Libertad (Argentina)—ay mga dambuhalang sasakyang pandagat na may sukat na 100 metro ang haba at may pinakamataas na palo na umaabot nang 50 metro mula sa ibabaw ng tubig.

Naroroon ang matataas na barko mula sa 16 na bansa, kasali na ang Alemanya, Belgium, Ireland, Portugal, Russia, Uruguay, at Venezuela. Ang Netherlands ang bansang may pinakamaraming itinanghal, na may anim na barko. Kasama rito ang magandang barko na Europa na may tatlong palo at ang matandang Oosterschelde, isang barko na may tatlong palo na kinalalagyan ng pang-itaas na layag na inilunsad noong 1918, at dati’y nagdadala ng kahoy, inasnang tunsoy, luwad, binutil, dayami, at prutas sa pagitan ng Aprika, Mediteraneo, at hilagang Europa.

Ang Armada ay nagbigay ng natatanging pagkakataon para sa mga bisita na mag-usyoso. Ibinaba ang mga andamyo, at ang lahat ay madaling makapupunta sa mga kubyerta, nang walang bayad.

Ang ilan sa mga barko ay naitampok na sa mga pelikula. Halimbawa, ang Norwegong barko na Christian Radich ay may mahalagang papel na ginampanan sa pelikulang Windjammer noong 1958. Ang lumang barkong yari sa kahoy na Kaskelot (“sperm whale” sa wikang Danes) ay lumabas sa ilang pelikula, kasali na ang pelikulang Pranses na Beaumarchais l’insolent at isang muling pagsasapelikula ng Treasure Island.

Ang Polakong Iskra na may tatlong palo ay natatangi sapagkat ang tatlong palo nito ay may iba’t ibang kagamitan sa pagmamaniobra ng palo at layag. Ang palo ng layag sa unahan ay square-rigged, ang gitnang palo ay may gaff (hugis trapezoid) rig, at ang palo sa hulihan ay may Bermuda (tatsulok) na layag.

Ang ilan sa matatandang barko na naroon sa Rouen ay nailigtas mula sa katubigan kung saan nalibing ang mga ito. Halimbawa, sinagip ng determinadong mga manlalayag ang Capitán Miranda ng Uruguay sa pamamagitan ng pagkukumpuni upang maibalik sa dati ang magandang sasakyang pandagat na ito. Ang Étoile Molène, na lumubog noong maagang mga taon ng dekada ng 1980 sa daungan ng Douarnenez, Brittany, ay muling pinalutang at nagkaroon ito ng pagkakataon na muling maglayag, dahil sa maraming maibiging pangangalaga.

Isang lokal na samahan ng bagitong mga opereytor ng radyo ang nagpasiyang maglagay ng isang koneksiyon upang makapagtalastasan sa pagitan ng barkong Mir at ng umiinog na Rusong istasyong pangkalawakan, ang Mir, sa pamamagitan ng radyo sa panahon ng kapistahan. Sa wakas, noong alas-10:27 n.g., noong Hulyo 17, naikonekta ang barkong may tatlong palo sa kaniyang “kapangalan na sasakyan” sa kalawakan. Nakausap ni Kapitan Zorokhov si Komander Afanassiev, na nasa istasyong pangkalawakan mga 350 kilometro sa itaas.

Umabot sa sukdulan nito ang Armada noong Linggo, Hulyo 18, sa pamamagitan ng isang parada sa Ilog Seine, mula sa Rouen patungo sa laot. Daan-daang libong tao ang nasa kahabaan ng 120-kilometrong ruta, na kumakaway sa mga tripulante sa mga barko habang ang mga ito’y nagdaraan sa matatandang nayon, monasteryo, at mga kastilyo na istilong Norman.

Pagkatapos, ang magagandang naglalayag na barko ay umalis upang makibahagi sa isang regata, pelikula, o iba pang ekstrabagansa sa isang malayong daungan. Ang mga daungan ay nagbalik sa kanilang regular na gawain. Subalit magugunita ng Rouen na, sa paano man sa loob ng sampung araw, ito ang naging sangandaan ng mga naglalayag na barko sa daigdig.

[Mapa sa pahina 10]

(Para sa aktuwal na format, tingnan ang publikasyon)

Honfleur

Seine

Rouen

[Credit Line]

[Larawan sa pahina 10]

Ang barkong “Cuauhtemoc” ng Mexico na may tatlong palo

[Larawan sa pahina 10]

Ang magandang “Étoile Molène” ay iniahon mula sa katubigang pinaglibingan nito

[Credit Line]

[Larawan sa pahina 10]

Isang ipinintang larawan ng daungan ng Rouen noong 1855, nang ang mga naglalayag na barko ay naglayag sa Seine

[Credit Line]

[Larawan sa pahina 11]

Rouen, “ang lunsod ng isang daang tore,” ay nagmistulang isang kagubatan ng mga palo

[Credit Line]

GUMISING!