Pagpapakita ng Pag-ibig sa Panahon ng Kabagabagan

MULA SA MANUNULAT NG GUMISING! SA NIGERIA

ANG Linggo, Enero 27, 2002, ay tinawag na Itim na Linggo sa Lagos, Nigeria. Isang pagsabog sa armeriya sa ilalim ng lupa ang nagdulot ng malalakas na pagyanig sa buong lunsod at naging sanhi upang magliwanag ang kalangitan sa gabi. Sa loob ng ilang oras, nagliparan ang mga bala ng kanyon at pira-pirasong labí sa layong tatlong kilometro sa palibot dahil sa pagsabog, na ikinasindak ng buong lunsod.

Ang walang-saligang usap-usapan ay pumukaw ng takot. Humugos ang pagkarami-raming tao sa mga lansangan, na di-nalalaman kung ano ang tinatakasan nila o kung saan sila patungo. Sa madilim na gabi, daan-daang tao, lakip na ang maraming takot na takot na mga bata, ang nagtakbuhan sa maputik na katubigan ng isang kanal at nalunod. Nawasak ang mga bahay, paaralan, at mga lugar ng negosyo, anupat libu-libo ang nawalan ng tahanan at trabaho. Tinatayang 1,000 katao ang namatay sa trahedya. Mas mataas pa nga ang pagtaya nang dakong huli.

Mga 1,350 di-sumabog na bomba, rocket, at mga granada ang nakuha nang maglaon sa residensiyal na mga lugar sa paligid ng kampo ng militar kung saan naganap ang mga pagsabog. Nakasumpong ang isang lalaki ng bagay na metal sa loob ng kaniyang sala. Palibhasa’y hindi natatanto na iyon ay isang bomba, pinulot niya ito, inilagay sa likuran ng kaniyang kotse, at ibinalik ito sa mga awtoridad.

Nang marinig ang balita hinggil sa pagsabog, kaagad na nakipag-ugnayan ang tanggapang pansangay ng mga Saksi ni Jehova sa Nigeria sa isang elder sa Lagos at tinagubilinan ang 16 na naglalakbay na tagapangasiwa sa lugar na iyon upang alamin ang situwasyon ng 36,000 Saksi sa Lagos. Isang milyong naira (mga $10,000 U.S.) ang ipinadala ng sangay, lakip na ang mga tagubilin na bumuo ng isang komite sa pagtulong upang sumaklolo.

Sa mga Saksi, isang matanda ang malubhang napinsala ng mga  piraso ng bomba; nakalulungkot, dalawang kabataang babae ang namatay; at dalawang Kingdom Hall at ang mga tahanan ng 45 pamilya ang nasira.

Anim na araw pagkatapos ng mga pagsabog ng mga munisyon, noong Pebrero 2, 2002, sumiklab ang alitang etniko sa ibang lugar sa lunsod. Ayon sa Red Cross, ang labanan ay kumitil ng 100 katao, puminsala sa 430, at 3,000 ang mga lumikas, gayundin natupok ang 50 bahay. Kaagad na hinanap ng komite sa pagtulong na nag-aasikaso sa mga pangangailangan ng mga biktima ng “Itim na Linggo” ang kanilang mga kapatid na Kristiyano sa lugar na iyon.

Walang namatay na Saksi sa pagkakataong ito, yamang ang karamihan sa kanila ay dumalo sa pansirkitong asamblea nang magsimula ang labanan. Gayunman, maraming miyembro ng limang kongregasyon sa lugar na iyon ang wala nang bahay na mauuwian. Kusang-loob silang pinatuloy ng kanilang mga kapatid na Kristiyano. Isang doktor na Saksi at ang kaniyang asawa ay naglaan ng tuluyan para sa 27 katao na lumikas.

Ang mga Saksi sa Lagos na hindi naapektuhan ng mga pagsabog at ng labanang etniko ay bukas-palad na nag-abuloy ng pagkain, mga damit, at mga gamit sa bahay. Ganito ang ulat ng tagapangasiwa sa lunsod: “Ang iniaabuloy ng mga kapatid sa Lagos ay higit pa kaysa sa kinakailangan ng mga naapektuhan.” Kinailangan ng tanggapang pansangay na sumulat sa mga kongregasyon upang hilingin sa kanila na huwag nang magpadala pa ng karagdagang mga kontribusyon. Tatlong trak ng mga bagay na hindi nagamit ang ipinadala sa tanggapang pansangay para itago.

Dinalaw ng matatanda sa kongregasyon ang maraming biktima at mga miyembro ng pamilya ng mga namatay. Sinikap nilang makapagbigay ng maka-Kasulatang kaaliwan. Inorganisa ng komite sa pagtulong ang mga pagkukumpuni sa nasirang mga tahanan. Pinaglaanan nila ang mga biktima ng parehong kasakunaan ng mga gamit sa tahanan, mga damit, at mga pagkain at tinulungan nila ang mga lumikas na makahanap ng mga matutuluyan. May kabuuang 90 pamilya at mga indibiduwal ang natulungan ng komite.

Hindi makapaniwala ang maraming biktima sa tulong na kanilang tinanggap. Isang Saksi ang bumulalas sa komite sa pagtulong: “Habang ako ay nabubuhay, gagawin kong aking ‘kanlungan at kalakasan’ si Jehova!”​—Awit 46:1, 2.

Napansin ng mga di-Saksi ang paraan ng pag-aasikaso ng mga Saksi ni Jehova sa isa’t isa sa panahon ng mga krisis na ito. Sinabi ng tiyuhin ng isa sa mga namatay na Saksi sa matatanda ng kongregasyong kinauugnayan ng kaniyang pamangkin: “Babalik ako para pasalamatan talaga kayo at matuto pa nang higit.” Ganito ang sinabi niya sa kaniyang pamilya: “Kahanga-hanga ang nakita ko sa Lagos. Hindi nagawa maging ng mga kamag-anak ang naisakatuparan ng mga taong ito.”

[Larawan sa pahina 13]

Isang trak na may kargang mga materyales na pantulong

[Larawan sa pahina 13]

Ilan sa mga natulungan

[Larawan sa pahina 14]

Ang mag-asawang ito ay naglaan ng tuluyan para sa 27 katao na lumikas

[Larawan sa pahina 14]

Mga Saksing gumagawa ng nasirang bahay

[Picture Credit Line sa pahina 13]

Itaas: Sam Olusegun-The Guardian