“Taon ng Bibliya”

Sa Alemanya, Austria, Pransiya, at Switzerland, ang taóng 2003 ay itinalagang “Taon ng Bibliya.” Ang pahayagang Frankfurter Allgemeine Zeitung ng Alemanya ay nagsabi: “Kagaya noong una at huling pagkakataon na ipinagdiwang iyon noong 1992, tunguhin [ng mga simbahan] na pasidhiin ang kabatiran ng mga tao sa ‘aklat na ito ng buhay’ at idiin ang kahalagahan ng Banal na Kasulatan sa kultura.”

Ayon sa Bibelreport ng Hunyo 2002, ang Bibliya ay naisalin na sa 2,287 wika​—kahit mga bahagi lamang nito. Ipinakikita rin ng mga pagtantiya na sa kasalukuyan ay mga limang bilyong Bibliya na ang naipamamahagi. Maliwanag na ipinakikita ng gayon kalaking pagsisikap ang malaking paggalang ng mga tao sa aklat na ito.

Sa ngayon, maaaring ang karamihan ng mga tao ay hindi kumbinsido na praktikal ang Bibliya. Sa katunayan, ipinapalagay ng marami na ang mga pamantayan sa Bibliya ay makaluma at malayo sa katotohanan. Gayunman, sa Taon ng Bibliya, inaasahang matatamo ng mga simbahan sa Alemanya ang dalawang bagay​—himukin ang mga tao na higit na mamuhay ayon sa Bibliya at pukawin ang pananabik sa Bibliya ng mga napapalayo sa simbahan.

Ang pagbabasa ng Bibliya mula sa pasimula hanggang sa katapusan ay isang pambihirang gawa, subalit tiyak na ito ang mabisang paraan upang maunawaan ang pangunahing mga punto ng Kasulatan. Gayunman, dapat isaisip ng isang taong ibig makinabang nang lubos sa Bibliya ang sinabi sa 2 Timoteo 3:16, 17: “Ang lahat ng Kasulatan ay kinasihan ng Diyos at kapaki-pakinabang sa pagtuturo, sa pagsaway, sa pagtutuwid ng mga bagay-bagay, sa pagdidisiplina sa katuwiran, upang ang tao ng Diyos ay maging lubos na may kakayahan, lubusang nasangkapan ukol sa bawat mabuting gawa.”

Ganito ang sinabi ng makatang Aleman na si Johann Wolfgang von Goethe (1749-1832): “Kumbinsido ako na ang Bibliya ay lalong gumaganda habang lalo itong nauunawaan ng isa.” Tunay nga, sa Salita ng Diyos lamang natin matutuklasan ang makatuwirang paliwanag kung saan tayo nagmula, kung bakit tayo narito, at kung ano ang magiging kinabukasan natin!​—Isaias 46:9, 10.

[Picture Credit Line sa pahina 31]

Mula sa aklat na Bildersaal deutscher Geschichte