Pagsilang sa Isang Daigdig na Salat sa Damdamin!

ISANG sanggol ang isinilang sa isang daigdig na malupit at salat sa damdamin, isang daigdig na lipos ng kaigtingan. Bagaman hindi maibulalas ng bata ang kaniyang damdamin, naniniwala ang ilang siyentipiko na bago pa man ipanganak, batid na ng di-pa-naisisilang na sanggol kung ano ang nangyayari sa kaniyang paligid.

Ang aklat na The Secret Life of the Unborn Child ay nagsabi: “Alam na natin ngayon na ang di-pa-naisisilang na bata ay isang tao na may kabatiran at may pakiramdam, may aktibong emosyonal na buhay mula anim na buwan patuloy (o baka mas maaga pa rito).” Bagaman hindi matatandaan ng sanggol, iniisip ng mga siyentipiko kung talaga nga bang may epekto sa kaniyang buhay sa dakong huli ang nakaiigting na karanasan ng pagsilang niya.

Pagkasilang, nagpapatuloy ang kaigtingan. Sa labas ng bahay-bata ng ina, hindi na kusa ang pagpapakain sa sanggol. Ang talimpusod na naghahatid ng oksiheno at sustansiya ay naputol na. Para mabuhay, kailangan na niyang huminga at kumain sa ganang sarili niya. Kailangang may magpakain sa kaniya at mangalaga sa iba pang pisikal na mga pangangailangan niya.

Kailangan ding sumulong sa mental, emosyonal, at espirituwal na paraan ang bagong-silang na sanggol. Kaya kailangang may mag-aruga sa munting batang ito. Sino ang nasa pinakamabuting kalagayan para gumawa nito? Ano ba ang kailangan ng isang sanggol mula sa kaniyang mga magulang? Paano pinakamahusay na matutugunan ang mga pangangailangang ito? Ang susunod na mga artikulo ay tutulong sa pagsagot sa mga katanungang ito.