Ang Hanbok​—Pambansang Kasuutan ng Korea

Mula sa manunulat ng Gumising! sa Republika ng Korea

PARA sa mga Koreano, hindi lamang basta panakip sa katawan ang mga damit. Ang isang halimbawa nito ay ang tradisyonal na kasuutan ng Korea na tinatawag na hanbok.

Natatanging Disenyo

Ang hanbok ay binubuo ng blusang istilong bolero at isang mahabang saya, na may natatanging proporsiyon. * Kung minsan, mas mahaba nang apat na beses ang saya kaysa sa blusa. Kaya, nagtitinging matangkad kahit na isang maliit na babae ang nagsusuot nito.

May bahagyang mga kurba at simpleng tabas ang hanbok. Nakabukang gaya ng mga pakpak ang manggas ng blusa nito, samantalang ang saya nito ay nagsisimulang lumuwang mula sa dibdib at kaakit-akit na sumasayad sa sahig. Upang gawing kapansin-pansin ang breastline nito, pinapalamutian ito ng naiibang uri ng laso, na ang magkabilang dulo ay nakalaylay mula sa pagkakabuhol nito hanggang sa harapan ng blusa at halos umaabot na sa may bukung-bukong. Maraming hanbok ang burdado ng magagandang hugis at disenyo ng mga bulaklak sa palibot ng punyos at neckline ng blusa, at sa saya. Oo, ang mga proporsiyon, tabas, at kulay ng hanbok ay talagang nakapagpapaganda rito!

Kasuutang Madaling Ibagay

Ang hanbok ay lalo pang pinaganda ng praktikal na disenyo nito. Yamang karaniwan nang yari sa likas na mga hibla ang hanbok, madali itong maisusuot sa buong santaon. Halimbawa, ang hanbok na yari sa hibla ng mga halaman na gaya ng ramí o abaka ay malamig sa katawan, na nakatutulong para manatiling presko ang pakiramdam ng nagsusuot nito sa panahon ng tag-araw, bagaman natatakpan ng hanbok ang kalakhang bahagi ng katawan. Kinukulong naman ng ibang uri ng tela ang init sa katawan, kaya mas angkop itong isuot sa taglamig.

Maginhawa ring isuot ang hanbok.  Ang katangiang ito ng hanbok ay walang kaugnayan sa kausuhan kundi resulta ng praktikal na pangangailangang umiral daan-daang taon na ang nakalilipas nang malawakan pang ginagamit ang kabayo sa rehiyon. Ganito ang sabi ng magasing Culture & I: “Ginawa ang damit na ito upang bumagay sa malamig na klima at sa pangangaso at mga gawain ng mga pagala-galang tao.” Kaya, ang mga mangangabayo sa Korea ay hindi nagsusuot ng anumang damit na nakahahadlang sa malayang pagkilos. Oo, ang mga taga-Korea na nasisiyahang magsuot ng hanbok sa ngayon ay may utang na loob sa kanilang mga ninuno dahil sa pisikal na ginhawang naibibigay nito!

Ang isa pang kawili-wiling katangian ng hanbok ay ang sinaunang tradisyon ng paggamit ng mga kulay bilang mga sagisag. Noon, kadalasan ay magaganda ang kulay na isinusuot ng mga tagapamahala sa Korea, samantalang puti naman ang karaniwang isinusuot ng mga magbubukid. Gayundin, makikilala ang isang dalaga dahil sa pagsusuot ng kombinasyong dilaw at pula. Matapos ikasal, ipahihiwatig ng kulay ng kaniyang hanbok ang katayuan sa lipunan ng kaniyang asawang lalaki. Sa ngayon, kulay-rosas ang inaasahang isusuot ng ina ng kasintahang babae sa kasalan, samantalang asul naman ang karaniwang isusuot ng ina ng kasintahang lalaki. Tiyak na madali silang makilala dahil sa kaugaliang ito.

Ang Hanbok sa Ngayon

Pagkatapos ng Digmaan sa Korea (1950-53), pinasimulan ang kampanya ng modernisasyon. Dahil dito, nawala na sa uso ang hanbok pagsapit ng dekada ng 1970 at napalitan ng pananamit na istilong Kanluranin. Kaya, ang dating pang-araw-araw na kasuutan ay itinago na lamang sa aparador at inilalabas lamang kapag may kasalan, kapistahan, at iba pang pantanging mga okasyon.

Gayunman, kamakailan lamang ay muling naging popular ang hanbok. Halimbawa, noong 1996, gumawa ng pagsisikap na muling gawing popular ang gayong istilo nang ideklara ang unang Sabado ng bawat buwan bilang “ang araw upang magsuot ng hanbok.” Naglabas ang mga pagawaan ng damit ng bagong mga hanbok na pantanging dinisenyo upang makaakit sa mga kabataan. Tila nagugustuhan nga ng mga tao na balikan ang matatandang kaugalian, yamang nagiging lubhang popular ang modernong hanbok. Sa panahon na nauuso ang mga istilong nakapupukaw sa sekso, ang hanbok ay isang mainam na halimbawa ng kaakit-akit at mahinhing pananamit.​—1 Timoteo 2:9.

[Talababa]