Isang Paraiso na Binawi sa Disyerto

Mula sa manunulat ng Gumising! sa Lithuania

NOONG huling bahagi ng ika-18 siglo, nabatid ng mga naninirahan sa isang maliit na pangisdaang nayon na mawawasak ang mga tahanan nila. Sa paglipas kasi ng mga taon, isang gabundok na bunton ng buhangin ang papalapit nang papalapit sa kanilang nayon. Sinikap nilang ilihis ang bunton ng buhangin sa pamamagitan ng pagtatayo ng isang tatsulok na harang na kahoy ngunit wala rin itong saysay. Kaya pagsapit ng 1797, lubusang natabunan ng bunton ng buhangin ang kanilang nayon.

Isa lamang ito sa mga pangyayaring naganap sa loob ng 80 taon, na sa panahong iyon ay nilamon ng mga bunton ng buhangin ang mahigit sa 12 nayon anupat naging disyerto  ang Curonian Spit, isang pahabang lupain na 100 kilometro ang haba at matatagpuan malapit sa Baybayin ng Baltic sa tinatawag ngayong Russia at Lithuania. Ang mga sanhi ng pagkawasak na iyon at ang pagkakasauli ng rehiyon sa dating kalagayan nito​—na ngayon ay isa nang pangunahing pasyalan ng mga turista​—ay isang kawili-wiling kuwento.

Biktima ng Maling Pangangasiwa at Pananakop

Ang buhanginan sa Curonian Spit ay dating punô ng malalagong pananim sa loob ng maraming siglo. Naglaan ang kagubatan ng saganang pinangasong hayop sa mga tagaroon. Pagsapit ng unang mga taon ng ika-18 siglo, ang lugar ay naging mahalagang bahagi ng ruta ng koreo sa pagitan ng Kanlurang Europa at ng Imperyo ng Russia. Nang dumami ang populasyon noong panahon ng kapayapaan, pinabayaang manginain nang labis-labis ang mga alagang hayop sa maselan at luntiang pananim, at masyadong maraming punungkahoy ang pinutol ng mga tao sa mga kagubatan. Hindi natanto ng mga naninirahan doon na napakadaling maubos ng mga pananim na kanilang inaasahan.

Lubusan nang hindi nakabawi ang kagubatan nang manakop ang hukbo ng Russia noong 1757 at putulin ang mga punungkahoy upang makagawa sila ng daan-daang balsa para kubkubin ang Königsberg (Kaliningrad), isang mahalagang lunsod sa Prussia. Nang sumunod na mga dekada, tinipon ng hangin ang mga bunton ng buhangin at ito ang naging sanhi ng kapahamakang binanggit sa pasimula.

Maisasauli pa kaya ang dating kalagayan ng nawasak na lupaing ito? Si Georg David Kuwert, isang determinadong empleado ng koreo, at ang kaniyang amang si Gottlieb ay kabilang sa mga naniniwala na maisasauli pa ito. Noong 1825, sinimulan nilang muling buhayin ang kagubatan sa spit. Isa itong matagal at nakapapagod na pakikipagpunyagi. Sa loob ng mahigit na isang siglo, daan-daang tao ang nagpagal para sa proyektong ito. Una, kailangan nilang ikondisyon ang lupa sa pamamagitan ng pagtatanim ng natatanging uri ng damo na tumutubo sa buhanginan at nag-uugat nang malalim. Pagkatapos, tinamnan naman nila ng iba’t ibang uri ng matitibay na punong pino at birch ang libu-libong ektarya ng  lupa. Sa wakas, nagbunga ang kanilang pagsisikap. Mga 70 porsiyento ng tuyong lupain ngayon ay kagubatan na. Ano na ang hitsura ng spit ngayon kung mamasyal ka rito?

Paraiso Para sa mga Turista

Sa ngayon, nagiging puntahan ng 8,000 turista araw-araw ang Curonian Spit, at hindi iyon nakapagtataka, yamang sari-sari ang magagandang tanawin sa spit. Ikaw man ay naglalakad, nagbibisikleta, o nakasakay sa kotse habang naglilibot, iba’t iba ang makikita mong tanawin. Sa mga kagubatan ay may malalaki at maliliit na usa, mga sorra, at mga baboy-ramo. Namumugad doon ang mga sandaang uri ng mga ibon, at halos isang milyong nandarayuhang ibon ang dumaraan sa spit taun-taon. May 900 iba’t ibang uri ng halaman doon, at marami pa ring mga bunton ng buhangin, bagaman 12 porsiyento na lamang ng lupain ang mayroon nito.

Ang ilan sa mga bunton ng buhangin ay may taas na 50 metro. Isang di-malilimutang karanasan na makakita ng puro buhangin at kalangitan sa palibot mo. Habang umaakyat ka rito, makikita mo na ang ilang bunton ng buhangin ay may klasikong hugis na parang mangkok, na hinubog ng hangin. Kapag nakarating ka na sa matarik na taluktok nito, kung saan dumadausdos pababa ang buhangin na hinihipan ng hangin anupat dahil dito’y umaabante ito, tatambad sa iyo ang isang makapigil-hiningang tanawin. Makikita mo ang makitid at pahabang lupaing kinatatayuan mo na napakalayo ng abot, at napapalamutian ng mga nayon, kagubatan, kaparangan, at mga parola. Makikita rin sa isang panig ang paghampas ng mga alon mula sa Dagat ng Baltic; nasa kabilang panig naman ang mas panatag na katubigan ng Curonian Lagoon.

Nakarerepresko sa mga bisita ang malamig na hihip ng hangin sa dagat. Marami ang nasisiyahang mag-windsurfing at sumakay sa yate; ang iba naman ay namamasyal nang tahimik sa isa sa lumang-istilong mga nayon. Ipinagugunita ng mga bahay na pinintahan ng matitingkad na kulay at binubungan ng pawid o tisa ang mas tahimik na kapaligiran noong nakalipas na panahon. Ang masangsang na amoy ng daing na isda at ang nakabilad na mga lambat ay nagpapaalaala sa mga bakasyunista na noon pa man ay pangunahin nang hanapbuhay sa spit ang pangingisda. Karaniwan doon ang mga girimpula (kasangkapang nagtuturo ng direksiyon ng hangin), yamang interesadung-interesado ang mga mangingisda sa direksiyon ng hangin. Pagandahan sa paggawa ng girimpula ang mga tao rito, at kawili-wiling pag-aralan ang mga ito. Palibhasa’y nakapalamuti sa palo ng bawat naglalayag na sasakyang-dagat, nagsisilbing pagkakakilanlan ang mga ito ng nayong pinagmulan ng sasakyang-dagat. Kawili-wili rin ang mga piraso ng amber na napapadpad kung minsan sa dalampasigan. Lalo na kapag maulap, pinapasyalan ng mga bisita ang mga museo na nagtatanghal ng mga alahas na amber. Kitang-kita sa loob ng ilang amber ang fosil na mga halaman o insekto.

Hindi nga nakapagtataka, kung gayon, na ilarawan ng kinatawan ng Lithuania sa United Nations Educational, Scientific, and Cultural Organization na isang paraiso ang Curonian Spit. Isa itong paraiso na binawi mula sa lupaing sinira ng maling pangangasiwa at digmaan. Sabihin pa, maraming lugar sa buong daigdig ang patuloy na nasisira. Ngunit tinitiyak sa atin ng Bibliya na sa ilalim ng Kaharian ng Diyos, ang ating buong planeta ay malapit nang maging isang magandang paraiso na pananahanan magpakailanman ng matuwid na mga tao.​—Isaias 65:17, 21-25; 2 Pedro 3:13, 14.

[Mga mapa sa pahina 16]

(Para sa aktuwal na format, tingnan ang publikasyon)

DAGAT NG BALTIC

LITHUANIA

CURONIAN SPIT

Curonian Lagoon

RUSSIA

Kaliningrad

[Mga larawan sa pahina 16, 17]

May mga ibon, halaman, at mga bunton ng buhangin sa Curonian Spit

[Credit Lines]

Tatlong isiningit na larawan sa ibaba: Gedimino Graz̆ulevic̆iaus nuotrauka

Ibon at damo: Gedimino Graz̆ulevic̆iaus nuotrauka; background: UAB „Laiko spalvos“

FOTO: A. VARANKA

[Mga larawan sa pahina 18]

Mga baboy-ramo

Mga “mute swan”

“Amber”

[Credit Line]

Tatlong larawan sa itaas: Gedimino Graz̆ulevic̆iaus nuotrauka

[Larawan sa pahina 18]

Umaakit ng libu-libong turista ang Curonian Spit araw-araw