Kung Paano Naipakilala ang Pangalan ng Diyos

UMAWIT ang salmista ng Bibliya na si David: “Pupurihin ko ang pangalan ng Diyos sa pamamagitan ng awit.” Alam ni David ang pangalan ng Diyos, at ganito ang kaniyang paghimok sa isang awit: “Pagpalain nawa [si] Jehova . . . Pagpalain nawa ang kaniyang maluwalhating pangalan.” (Awit 69:30; 72:18, 19) Ang karaniwang ginagamit na anyo ng pangalan ng Diyos sa wikang Tagalog ay Jehova, na isinalin mula sa Hebreo na יהוה, na lumilitaw ng halos 7,000 ulit sa Bibliya.

Nitong nakalipas na mga siglo, ang pangalan ng Diyos ay ginamit sa maraming lugar bukod sa Bibliya. Halimbawa, ang mga salitang Latin na Benedictus Sit Iehova Deus,  na nangangahulugang “Purihin Nawa ang Diyos na Jehova,” ay masusumpungan sa mga baryang ginto na ginawa sa loob ng maraming taon sa Switzerland [1]. Sa katunayan, sa loob ng nakalipas na ilang dantaon, ang pangalan ng Diyos sa wikang Hebreo at Latin ay makikita sa mahigit sanlibong iba’t ibang uri ng mga barya, token, medalya, at mga jeton (isang uri ng token).

Bakit gayon na lamang kalawak ang paggamit sa pangalan ng Diyos, gaya ng makikita sa mga halimbawa rito at sa kasunod na pahina?

Bakit Ginamit ang Pangalan ng Diyos?

Simula noong ika-16 na siglo, sumiklab ang mga digmaan sa pagitan ng mga Romano Katoliko at mga Protestanteng Repormador sa buong Kanlurang Europa. Humiwalay ang ilang probinsiyang sakop ng Espanya mula sa Simbahang Romano Katoliko, na siyang pangunahing relihiyon noon, at pinili nila sa halip ang Reformed Church. Humantong ito sa gera sibil dahil sa relihiyon. Ginamit ang mga barya at ang nakatatak ditong mga larawan upang ipakita na sinusuportahan ng Diyos ang isang panig o ang kabilang panig.

Kung Paano Ginamit ang Pangalan ng Diyos

Ginamit ng mga tagaukit ng molde ang apat na letrang Hebreo na kilala bilang Tetragrammaton upang kumatawan sa pangalan ng Diyos, na Jehova. Isinulat ito sa alpabetong Ingles na JHVH o YHWH. Karaniwan na, hindi marunong bumasa ng wikang Hebreo ang mga tagaukit o ang mga tao sa pangkalahatan. Kaya nang paulit-ulit na kopyahin ang Tetragrammaton, ang apat na letrang Hebreo ng pangalan ng Diyos ay naisulat sa iba’t ibang paraan.

Ang Sweden ay gumawa ng barya na may nakatatak na pangalan ng Diyos noong mga taon ng 1568 [2], at ang Scotland naman noong mga 1591. Noong mga 1600, inilagay ni Haring Charles IX ng Sweden ang pangalan ng Diyos​—na iba-iba ang baybay gaya ng Ihehova, Iehova, at Iehovah​—sa pera [3]. May ipinagawa siyang isang uri ng baryang ginto na kahanga-hanga at nagkakahalaga ng mahigit na apat na buwang sahod ng isang obrero!

Mahigit 60 iba’t ibang barya na may pangalang Jehova ang nakilala mula noong panahon ni Christian IV, ang hari ng Denmark at Norway, na namahala mula 1588 hanggang 1648. Noong kalagitnaan ng ika-17 siglo, gumawa rin ng gayong mga barya sa Poland at Switzerland, gayundin sa Alemanya.

 Noong panahon ng tinatawag na Tatlumpung Taóng Digmaan, na ipinaglaban sa Europa mula 1618 hanggang 1648 at nagsimula bilang isang digmaan dahil sa relihiyon, lubhang dumami ang mga baryang iyon. Pagkatapos ng matagumpay na Digmaan ng Breitenfeld noong 1631, nagpagawa si Haring Gustav II Adolph ng Sweden ng mga baryang may nakatatak na Tetragrammaton [4]. Ginawa ito sa mga bayan ng Erfurt, Fürth, Mainz, at Würzburg. Halos kasabay nito, ang mga estadong nakipag-alyansa sa hari ng Sweden ay gumawa rin ng mga baryang may nakatatak na pangalan ng Diyos.

Mga 150 taon pagkatapos ng nakapanghihilakbot na Tatlumpung Taóng Digmaan, patuloy na makikita ang pangalan ng Diyos sa mga barya, medalya at mga token. Ang mga baryang iyon ay ginawa sa Austria, Mexico, Pransiya, at Russia, gayundin sa ibang mga bansa. Pero noong unang mga taon ng ika-18 siglo, hindi na gaanong ginamit ang pangalan ng Diyos sa mga barya. Nang bandang huli, halos nawala na ito sa mga molde at pantatak.

Pagpapakilala sa Pangalan ng Diyos

Bagaman hindi na nakikita ang pangalan ng Diyos sa mga barya at perang papel na ginagamit ngayon, ipinahahayag naman ito sa paraang wala pang katulad. Malaon nang pumili ang Diyos ng isang bayan na maglilingkod sa kaniya at sinabi niya sa kanila: “Kayo ang aking mga saksi, . . . at ako ang Diyos.” (Isaias 43:12) Hindi iyan magagawa ng anumang barya. Sa katunayan, ang mga gumagamit ng pangalan ng Diyos sa kanilang mga barya ay nagbibigay ng maling patotoo tungkol sa kaniya, sapagkat sinasabi nilang sinusuportahan niya ang kanilang malulupit na digmaan. Gayunman, ipinakikilala ng ilang tao sa ngayon ang pangalan ng Diyos sa paraang sinasang-ayunan niya.

Pinasisigla ka ng mga Saksi ni Jehova na matuto nang higit pa tungkol sa tunay na Diyos, si Jehova, at kung ano ang kinakatawan ng kaniyang pangalan. Isang salmista ng Bibliya ang sumulat tungkol kay Jehova: “Upang malaman ng mga tao na ikaw, na ang pangalan ay Jehova, ikaw lamang ang Kataas-taasan sa buong lupa.” (Awit 83:18) Napakahalaga ng kaalaman tungkol kay Jehova, gaya ng sinabi ng Kaniyang mahal na Anak sa panalangin: “Ito ay nangangahulugan ng buhay na walang hanggan, ang kanilang pagkuha ng kaalaman tungkol sa iyo, ang tanging tunay na Diyos, at sa isa na iyong isinugo, si Jesu-Kristo.”​—Juan 17:3.

[Larawan sa pahina 20, 21]

Mga kasangkapan ng tagaukit ng molde sa paggawa ng barya

[Picture Credit Lines sa pahina 20]

Barya 1 at mga kasangkapan: Hans-Peter-Marquardt.net; barya 2: Mit freundlicher Genehmigung Sammlung Julius Hagander

[Picture Credit Line sa pahina 21]

Mga barya 3 at 4: Mit freundlicher Genehmigung Sammlung Julius Hagander