Ibinabahagi ang Pag-asang Kristiyano sa Senegal

ANG isda ay naging pangunahing pagkain mula pa noong unang panahon. Sa loob ng libu-libong taon, ang mga tao’y nangisda sa mga dagat, lawa, at ilog ng lupa. Ang ilan sa mga apostol ni Jesu-Kristo ay mga mangingisda sa Dagat ng Galilea. Subalit, ipinakilala ni Jesus sa kanila ang ibang uri ng pangingisda. Ito ay espirituwal na pangingisda na hindi lamang ang mga mangingisda ang makikinabang kundi rin naman ang isda.

Sa bagay na ito, sinabi ni Jesus sa mangingisdang si Pedro: “Mula ngayon ay manghuhuli ka ng mga taong buháy.” (Lucas 5:10) Ang uring ito ng pangingisda ay isinasagawa ngayon sa mahigit na 230 lupain, kasama na ang Senegal. (Mateo 24:14) May lakas ng loob na ibinabahagi rito ng makabagong-panahong “mga mangingisda ng mga tao” ang kanilang pag-asang Kristiyano sa iba.​—Mateo 4:19.

Ang Senegal ay nasa pinakadulo sa gawing kanluran ng Aprika. Saklaw nito ang mabuhanging mga dako ng disyerto na nasa hangganan ng Sahara sa hilaga hanggang sa mahalumigmig na kagubatan sa rehiyon ng Casamance sa timog. Ang Senegal ay isang lupaing hinahampas ng nakapapasong hangin ng disyerto gayundin ng malamig at nakarerepreskong simoy ng hangin ng Atlantiko. Dito naninirahan ang mahigit na siyam na milyon katao. Ang mga naninirahan sa Senegal ay kilala sa kanilang pagiging mapagpatuloy. Ang karamihan ay hindi nag-aangking mga Kristiyano. Ang marami ay mga pastol, samantalang ang iba naman ay mga tagapag-alaga ng mga baka, kamelyo, at mga kambing. May mga magsasaka rin, na nagtatanim ng mani, bulak, at palay. Oo, at may mga mangingisda, na nagdadala ng mga lambat na puno ng isda mula sa Karagatang Atlantiko at mula sa ilang malalaking ilog na paliku-liko sa bansa. Ang industriya ng pangingisda ay gumaganap ng mahalagang bahagi sa ekonomiya ng Senegal. Sa katunayan, ang kilalang pambansang pagkain ay ang ceebu jën, isang masarap na pagkain na binubuo ng kanin, isda, at mga gulay.

“Mga Mangingisda ng mga Tao”

May 863 masisigasig na mangangaral ng Kaharian ng Diyos sa Senegal. Ang espirituwal na pangingisda ay nagsimula rito noong mga unang taon ng dekada ng 1950. Isang tanggapang pansangay ng Samahang Watch Tower ang binuksan sa Dakar, ang kabisera, noong 1965. Ang misyonerong “mga mangingisda” ay nagdatingan mula sa maraming malalayong bansa. Nagsimula ang gawaing ‘pangingisda,’ at patuloy na sumulong ang pagbabahagi ng pag-asang Kristiyano sa Senegal. Sa dakong huli, nagtayo ng bagong mga pasilidad ng sangay sa Almadies, sa labas ng Dakar, at inialay ang mga ito kay Jehova noong Hunyo 1999. Isa ngang panahon ng pagsasaya!

Ang Hamon ng Pagtanggap sa Katotohanan

Regular na natatagpuan ang mga tao mula sa iba’t ibang pinagmulan, at ang ilan ay tumugon nang may pagsang-ayon sa mensahe ng pag-asa na masusumpungan sa Salita ng Diyos. Bagaman marami ang walang kaalaman sa Bibliya, masaya silang malaman na ang mga pangakong ginawa ng Diyos na Jehova sa mga tapat na propeta noong una ay malapit nang matupad.

Kadalasan ay nangangailangan ng lakas ng loob upang manindigang matatag sa mga simulaing Kristiyano, lalo na kung ang mga tradisyon at kaugalian ng pamilya ang nasasangkot. Halimbawa, ang poligamya ay malawakang isinasagawa sa Senegal. Isaalang-alang ang kalagayan ng isang lalaki na may dalawang asawa nang siya’y magsimulang mag-aral ng Bibliya. Magkaroon kaya siya ng lakas ng loob na tanggapin ang katotohanang Kristiyano at sundin ang maka-Kasulatang kahilingan na maging asawa lamang ng isang babae? (1 Timoteo 3:2) At pipiliin ba niya ang asawa ng kaniyang kabataan, ang babaing una niyang pinakasalan? Iyan ang ginawa niya, at siya ngayon ay naglilingkod bilang isang masigasig na matanda sa isa sa malalaking kongregasyon sa lugar ng Dakar. Tinanggap din ng kaniyang unang asawa ang katotohanan kasama ng lahat niyang 12 anak, 10 anak mula sa kaniyang unang asawa at 2 mula sa kaniyang dating ikalawang asawa.

Ang isa pang hadlang sa pagtanggap ng pag-asang Kristiyano ay maaaring ang pagiging hindi marunong bumasa at sumulat. Nangangahulugan ba ito na ang isang taong hindi marunong bumasa’t sumulat ay hindi maaaring tumanggap at magsagawa ng katotohanan? Hindi naman. Isaalang-alang ang halimbawa ni Marie, isang masipag na ina ng walong batang mga anak. Agad niyang naunawaan ang kahalagahan ng pagtalakay ng isang teksto sa Bibliya sa kaniyang mga anak sa bawat araw bago sila pumasok sa paaralan at bago naman siya pumasok sa trabaho. Ngunit paano  niya magagawa ito, yamang hindi siya marunong bumasa? Maaga tuwing umaga, dala niya ang buklet na Pagsusuri sa Kasulatan Araw-Araw at tumatayo siya sa mabuhanging kalye sa harap ng kaniyang bahay. Habang nagdaraan ang mga tao, tinatanong niya sila kung marunong ba silang bumasa. Kapag may matagpuan siyang isa na marunong bumasa, iniaabot niya ang buklet at seryosong sinasabi: “Hindi ako marunong bumasa, kaya maaari bang pakibasa mo ang bahaging ito sa akin ngayon?” Matama siyang nakikinig sa pagbasa. Pagkatapos ay pasasalamatan niya ang nagdaan at agad na pumapasok sa kaniyang bahay upang masiglang talakayin ang teksto sa kaniyang mga anak bago sila pumasok sa paaralan!

Tumutugon ang Lahat ng Uri ng mga Tao

Sa Senegal, ang mga tao’y masusumpungang nakaupo sa mga lansangan na nagtitinda ng mga isda, gulay, o prutas sa palengke o nakasandal sa ilalim ng malaking puno ng baobab na umiinom ng ataya, isang medyo mapait na berdeng tsa. Determinadong ibahagi ang mabuting balita sa lahat ng natatagpuan nila, dalawang kapatid na lalaki ang nakipag-usap sa isang lalaking may kapansanan na namamalimos sa lansangan. Pagkabati sa kaniya, sinabi nila: “Maraming tao ang nagbibigay sa iyo ng pera subalit hindi sila humihinto upang makipag-usap. Pumunta kami upang ipakipag-usap sa iyo ang tungkol sa isang napakahalagang bagay na may kinalaman sa iyong kinabukasan.” Nagulat ang pulubi. “Gusto ka naming tanungin,” patuloy ng mga kapatid na lalaki. “Sa palagay mo, bakit kaya napakaraming paghihirap sa daigdig?” “Kalooban ito ng Diyos,” ang sagot ng pulubi.

Pagkatapos, ang mga kapatid na lalaki ay nangatuwiran sa kaniya mula sa Kasulatan at ipinaliwanag ang Apocalipsis 21:4. Ang pulubi ay lubhang naantig sa mensaheng ito ng pag-asa at sa bagay na may nagpakita sa kaniya ng interes anupat huminto at ipinakipag-usap ang Bibliya. Siya’y naluha. Sa halip na humingi ng pera, nagsumamo siya sa mga kapatid na kunin ang lahat ng barya na nasa kaniyang latang pinaglimusan! Gayon na lamang ang pagpupumilit niya anupat ito’y nakatawag sa pansin ng lahat na nagdaraan. Nahirapan din ang mga kapatid na mahikayat siyang sa kaniya na lamang ang pera. Sa wakas ay sumang-ayon siya subalit iginiit niyang dalawin nila siyang muli.

Ang malaking unibersidad sa Dakar ay nakadaragdag din sa huli ng espirituwal na lambat sa pangingisda. Isang estudyante ng medisina roon na nagngangalang Jean-Louis ang nagsimulang mag-aral ng Bibliya. Agad niyang tinanggap ang katotohanan, inialay ang kaniyang buhay kay Jehova, at nabautismuhan. Hangad niyang maglingkod sa Diyos sa buong-panahong paglilingkod bilang payunir, subalit nasisiyahan din siya sa kaniyang pag-aaral ng medisina. Dahil sa isang kontrata sa kaniyang sariling bansa, obligado siyang tapusin ang kaniyang pag-aaral. Gayunman, kasabay nito ay nagsimula siyang maglingkod bilang isang auxiliary pioneer. Di-nagtagal, pagkatapos tanggapin ang kaniyang diploma bilang isang kuwalipikadong manggagamot, siya’y inanyayahang maglingkod sa isang malaking tahanang Bethel sa Aprika bilang doktor ng pamilya. Isa pang binatang natagpuan sa Dakar University ay naglilingkod din ngayon sa pamilyang Bethel sa kaniyang sariling bansa.

Tunay na kapaki-pakinabang ang espirituwal na pangingisda sa Senegal. Ang literatura sa Bibliya ng mga Saksi ni Jehova ay lubhang pinahahalagahan at ngayo’y ginagawa sa lokal na wikang Wolof. Ang pagkarinig ng mabuting balita sa kanilang katutubong wika ay nagpasigla sa maraming tapat-pusong mga tao na tumugon nang may pasasalamat. Taglay ang pagpapala ni Jehova, walang alinlangang marami pang makasagisag na isda ang mahuhuli, habang ang masisigasig na “mga mangingisda ng mga tao” sa Senegal ay patuloy na ibinabahagi ang pag-asang Kristiyano nang buong-katapatan at lakas ng loob.

[Mapa/Larawan sa pahina 31]

(Para sa aktuwal na format, tingnan ang publikasyon)

SENEGAL

[Larawan]

Ibinabahagi ang pag-asang Kristiyano sa Senegal

[Credit Line]

Mountain High Maps® Copyright © 1997 Digital Wisdom, Inc.