Pagtatatag ng Pananampalataya sa Pamamagitan ng Pag-aaral ng Bibliya sa India

MULA sa napakataas at natatakpan-ng-niyebe na Himalaya Mountains sa hilaga hanggang sa mainit na mga baybayin ng Indian Ocean sa timog, ang India ay isang lupain na may pagkakasari-sari, sa paraang heograpiko at relihiyoso. Sa populasyon nito na mahigit sa isang bilyon, mga 83 porsiyento ay mga Hindu, 11 porsiyento naman ay mga Muslim, at ang natitira ay binubuo pangunahin na ng naturingang mga Kristiyano, Sikh, Budista, at mga Jain. Lahat ay pawang nagtatamasa ng kalayaan sa pagsamba. “Ang relihiyon ay gumaganap ng mahalagang papel sa paraan ng pamumuhay ng mga Indian,” ang sabi ng The World Book Encyclopedia.

Ang pamumuhay na kaayon ng kanilang Kristiyanong pananampalataya ay wastong mailalarawan sa mga Saksi ni Jehova, na may bilang na mahigit na 21,200 sa India. Tulad ng kanilang espirituwal na mga kasamahan sa ibang bahagi ng daigdig, minamalas ng mga Saksi sa India na isang pribilehiyo ang pagtulong sa kanilang kapuwa na makapagtatag ng matibay na pananampalataya sa Salita ng Diyos, ang Banal na Bibliya. (2 Timoteo 3:16, 17) Isaalang-alang kung paano nagkaroon ng kaalaman sa katotohanan sa Bibliya ang isang pamilya sa Chennai sa gawing timog ng India.

Bago sila natagpuan ng mga Saksi ni Jehova, ang pamilyang ito ay aktibong nakikibahagi sa mga kilusan ng Katolikong karismatiko, anupat nag-aangkin na sila ay nakakakita ng mga pangitain, nakapagsasalita ng mga wika, at nakapagpapagaling ng mga maysakit. Sila ay kilala sa simbahan at sa komunidad, tinatawag pa nga ng mga tao ang ilang miyembro ng pamilyang ito bilang “swami,” na nangangahulugang “panginoon.” Subalit isang araw, isang Saksi ang dumalaw sa pamilyang ito at ipinakita sa kanila mula sa Bibliya na si Jesus ang Anak ng Diyos, hindi ang Diyos na Makapangyarihan-sa-lahat, gaya ng karaniwang paniniwala. Ipinakita rin sa kanila ng Saksi na ang pangalan ng Diyos ay Jehova at na layunin ni Jehova na gawing isang magandang paraiso ang lupa.​—Awit 83:18; Lucas 23:43; Juan 3:16.

Dahil sa iginagalang nila ang Salita ng Diyos at nagustuhan nila ang kanilang narinig, ang mga miyembro ng pamilyang ito ay sumang-ayon na regular na makipag-aral ng Bibliya sa mga Saksi ni Jehova. Dahil dito ay kinutya sila ng kanilang mga kakilala sa simbahan. Gayunpaman, ang pamilya ay nanatili sa kanilang determinasyon na ipagpatuloy ang kanilang pag-aaral sa Bibliya. Habang lumalago ang kanilang kaalaman at lalong tumitibay ang kanilang pananampalataya, inihinto nila ang kanilang mga huwad na relihiyosong gawain. Sa kasalukuyan, tatlong miyembro ng pamilyang ito ay masisigasig at bautisadong mga Saksi na, at ang ina ay naglilingkod bilang isang auxiliary pioneer kailanma’t maaari.

Pananampalataya Upang Madaig ang mga Kapansanan

Si Sunder Lal, isang kabataang lalaki na naninirahan sa isang nayon sa Punjab, ay nangailangan ng matinding pananampalataya at lakas ng loob upang maibahagi sa iba ang mabuting balita ng Kaharian ng Diyos. (Mateo 24:14) Ito ay dahilan sa iniwan niya ang maraming diyos na pinaniniwalaan ng kaniyang pamilya at nayon upang sumamba sa tunay na Diyos, si Jehova. Bukod dito, walang mga binti si Sunder Lal.

Hanggang noong 1992, ang buhay ni Sunder Lal ay isa lamang rutin. Nagtatrabaho siya bilang isang katulong ng doktor at nakikisama sa kaniyang pamilya sa pagsamba sa iba’t ibang diyos sa ilalim ng pamamatnubay ng kanilang piniling guru. Subalit isang gabi, natumba siya habang tumatawid sa isang riles ng tren. Nasagasaan siya ng isang tren at naputol ang kaniyang dalawang binti hanggang sa hita. Bagaman nabuhay siya, gumuho naman ang kaniyang mundo. Sabihin pa, labis na nanlumo si Sunder Lal at nagtangka pa nga siyang magpakamatay. Naging mapagkalinga  naman ang kaniyang pamilya, ngunit ang kaniyang kinabukasan ay waring wala nang pag-asa.

Pagkaraan, isang Saksi ni Jehova ang dumalaw kay Sunder Lal at ipinakita sa kaniya mula sa Bibliya na nangangako ang Diyos na gagawin niyang isang napakagandang paraiso ang lupa at pagkakalooban niya ng sakdal na kalusugan ang lahat ng umiibig at natatakot sa kaniya. Sumang-ayon si Sunder Lal na mag-aral ng Bibliya, at sa loob ng isang taon ay masigasig siyang nag-aral. Inanyayahan siyang dumalo sa mga Kristiyanong pagpupulong at sa wakas ay sumama siya at nakiangkas sa likod ng bisikleta ng isang kaibigan. Bagaman masakit ang paglalakbay na iyon, malaki naman ang gantimpala. Ang kaniyang natutuhan sa kaniyang personal na pag-aaral sa Bibliya ay napatunayang totoo nang makilala niya ang iba na tunay na naniniwala sa mga pangako ng Salita ng Diyos at namumuhay kasuwato ng mga turo ng Bibliya.

Sinimulang ibahagi ni Sunder Lal sa kaniyang mga kapitbahay ang mabuting balita, at noong 1995, siya ay nabautismuhan. Sa simula, nakibahagi siya sa ministeryo sa pamamagitan ng pag-usad patungo sa mga bahay sa kanilang nayon, na siyang karaniwang paraan niya ng paglibut-libot. Ngunit ngayon ay may regalo siya buhat sa kaniyang espirituwal na mga kapatid​—isang bisikletang tatlo ang gulong na may pantanging kagamitan upang “mapedal” ng kamay. Sa tulong ng kaniyang bisikleta, siya ngayon ay higit na nakapagsasarili at nakapaglalakbay na mag-isa nang labindalawang kilometro para makadalo sa mga pulong sa kongregasyon. Kung minsan ay nagbibisikleta siya kahit napakalakas ang ulan na dulot ng habagat; at sa ibang pagkakataon naman, ang temperatura ay mahigit sa 43 digri Celsius.

Bukod sa pagdalo sa mga pulong, si Sunder Lal ay nagdaraos ng maraming pag-aaral sa Bibliya sa iba na gustong magpatulong upang makapagtatag ng matibay na pananampalataya sa tunay na Diyos, si Jehova. Sa katunayan, pito sa kaniyang dating mga estudyante sa Bibliya ay bautisado na ngayon, gayundin ang tatlong iba pa na nasumpungan niya ngunit pinagdausan ng pag-aaral sa Bibliya ng kaniyang mga kapuwa Saksi.

Ang “pananampalataya,” ayon sa Bibliya, “ay hindi taglay ng lahat ng tao.” (2 Tesalonica 3:2) Ngunit para sa mga “wastong nakaayon para sa buhay na walang-hanggan,” ang regular na pag-aaral ng Salita ng Diyos ay makapagtatatag ng matibay na pananampalataya. (Gawa 13:48) Ang gayong pag-aaral ay nagpapangyari rin na magningning ang mga mata sa pag-asa sa isang kahanga-hangang kinabukasan​—isang bagay na sinasampalatayanan ng dumaraming tao sa India.

[Mapa sa pahina 30]

(Para sa aktuwal na format, tingnan ang publikasyon)

AFGHANISTAN

PAKISTAN

NEPAL

BHUTAN

TSINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.