Kalinisan​—Ano ba Talaga ang Kahulugan Nito?

DAHIL sa nakagigitlang di-malinis na mga kalagayan sa Europa at sa Estados Unidos noong ika-18 at ika-19 na siglo, ipinangaral ng mga misyonero noong yugtong iyon ang matatawag na “doktrina ng kalinisan.” Inihambing ng doktrinang ito ang karumihan sa kasalanan, samantalang ang kalinisan ay sinasabing naglalapit sa isa sa Diyos. Marahil ito ang nagpatanyag sa kasabihang “Ang kalinisan ay kabanalan.”

Ito ang naging pangmalas ng Salvation Army, na itinatag nina William at Catherine Booth. Ayon sa aklat na Health and Medicine in the Evangelical Tradition, ang isa sa pinakauna nilang islogan ay: “Soap, Soup, and Salvation” (Sabon, Sopas, at Kaligtasan). Pagkatapos, nang maipakita nang may katiyakan ni Louis Pasteur at ng iba pa ang kaugnayan ng karamdaman at baktirya, lalo lamang itong nagpasigla at naging isang makasiyensiyang saligan para sa mas mabuting mga programa sa kalusugang pambayan.

Kabilang sa ilang kagyat na mga hakbang na isinagawa ay ang hindi paghiling sa isang saksi sa korte na hagkan ang Bibliya at ang pag-aalis sa tasang iniinuman ng lahat sa mga paaralan at mga istasyon ng tren. Sinikap pa ngang halinhan ang karaniwang kalis ng indibiduwal na mga kopa sa relihiyosong mga serbisyo. Oo, ang mga tagapangunang ito noon ay waring nagkamit ng malaking tagumpay sa pagbabago sa mga saloobin ng mga tao ukol sa kalinisan. Gayon na lamang ang epekto nito sa saloobin ng mga tao anupat tinawag ng isang manunulat ang resulta nito na “pagkahilig sa kalinisan.”

 Gayunman, ang “pagkahilig [na ito] sa kalinisan” ay maliwanag na mababaw lamang. Hindi nagtagal at ginawa ng mga negosyante ang karaniwang sabon na isang produktong pampaganda. Ang malikhaing mga anunsiyo ay umakay sa mga parokyano upang maniwala na ang paggamit ng partikular na mga produktong para sa personal na kalinisan ay magbibigay sa gumagamit ng katayuan sa lipunan na kaiinggitan ng iba. Pinananatili ng telebisyon ang pantasiyang ito. Ang matagumpay at kahali-halinang mga tao na itinatampok sa mga patalastas at sa mga soap opera ay bihirang nakikitang naglilinis ng bahay, nagwawalis ng bakuran, namumulot ng basura, o dinadakot ang dumi ng kanilang alagang mga pusa at aso.

Nariyan din yaong mga nangangatuwiran na ang pagtatrabaho sa labas ay nagbabayad sa mga gastusin, samantalang ang gawaing bahay o iba pang mga gawaing paglilinis ay walang pinansiyal na pakinabang. At yamang walang gantimpalang salapi na nasasangkot, bakit naman sila magmamalasakit sa kapaligiran? Ang isang resulta nito ay na ilang tao sa ngayon ang nag-iisip na ang kalinisan ay kumakapit lamang sa personal na kalinisan.

Ang Pangmalas ng Diyos sa Kalinisan

Walang alinlangan na ang naunang mga pagsisikap na iyon na ituro ang kalinisan ay nakatulong upang bumuti ang kalagayan ng pamumuhay ng mga tao. At marapat naman, sapagkat ang kalinisan ay isang katangian na taglay at nagmula sa banal at malinis na Diyos, si Jehova. Tinuturuan niya tayo upang makinabang tayo sa pamamagitan ng pagiging banal at malinis sa lahat ng ating landas.​—Isaias 48:17; 1 Pedro 1:15.

Ang Diyos na Jehova ay huwaran sa bagay na ito. Ang kalinisan, gayundin ang kaniyang ibang di-nakikitang mga katangian, ay maliwanag na mapapansin sa nakikitang nilalang ng Diyos. (Roma 1:20) Makikita natin na ang mga nilalang mismo ay walang idinudulot na namamalaging polusyon. Ang lupa lakip na ang maraming ekolohikal na mga siklo nito ay isang kusang-naglilinis na kababalaghan, at ito ay dinisenyo para sa malinis at malusog na pamumuhay. Ang gayong malinis na gawa ay maaaring magmula lamang sa malinis-ang-isip na Disenyador. Samakatuwid, mahihinuha natin mula rito na ang mga mananamba ng Diyos ay dapat na maging malinis sa lahat ng aspekto ng kanilang buhay.

Apat na Aspekto ng Kalinisan

Tinutukoy ng Bibliya ang apat na aspekto ng kalinisan na dapat pagsikapang abutin ng mga mananamba ng Diyos. Isaalang-alang natin ang bawat isa sa mga ito.

Espirituwal. Ito ay maituturing na pinakamahalagang kalinisan sa lahat sapagkat may kaugnayan ito sa pag-asa ng isang tao ukol sa buhay na walang hanggan. Gayunman, ito ang pinakamadalas na ipinagwawalang-bahalang aspekto ng kalinisan. Sa maikli, ang pagiging malinis sa espirituwal ay nangangahulugan na hindi ka kailanman tatawid sa hangganan na itinakda ng Diyos sa pagitan ng tunay na pagsamba at huwad, sapagkat minamalas ng Diyos ang anumang uri ng huwad na pagsamba bilang marumi. Sumulat si apostol Pablo: “ ‘Lumabas kayo mula sa kanila, at humiwalay kayo,’ sabi ni Jehova, ‘at tigilan na ninyo ang paghipo sa maruming bagay’; ‘at tatanggapin ko kayo.’ ” (2 Corinto 6:17) Ang alagad na si Santiago ay lubhang espesipiko rin sa bagay na ito: “Ang anyo ng pagsamba na malinis at walang dungis sa pangmalas ng ating Diyos at Ama ay ito: . . . ingatan ang sarili na walang batik mula sa sanlibutan.”​—Santiago 1:27.

Maliwanag na ipinakita ng Diyos ang kaniyang di-pagsang-ayon sa pagsasama ng huwad na pagsamba at ng kaniyang tunay na pagsamba. Ang huwad na pagsamba ay kadalasang naglalakip ng maruruming gawain at karima-rimarim na mga idolo at mga diyos. (Jeremias 32:35) Kaya, ang mga tunay na Kristiyano ay hinihimok na iwasan ang anumang pakikisangkot sa maruming pagsamba.​—1 Corinto 10:20, 21; Apocalipsis 18:4.

Moral. Maging dito ay naglalagay ang Diyos ng maliwanag na kaibhan ng malinis at ng marumi. Sa kabuuan, ang daigdig ay naging tulad ng inilarawan sa Efeso 4:17-19: “Nasa kadiliman ang kanilang isip, at hiwalay mula sa buhay na nauukol sa Diyos . . . Palibhasa’y nawalan na ng lahat ng pakiramdam sa moral, ibinigay nila ang kanilang sarili sa mahalay na paggawi upang gumawa ng bawat uri ng karumihan nang may kasakiman.” Ang gayong imoral na pag-iisip ay naipahahayag sa maraming paraan, lantaran at tuso, kaya naman kailangang maging mapagbantay ang mga Kristiyano.

Alam ng mga umiibig sa Diyos na ang prostitusyon, homoseksuwalidad, pagtatalik bago ang kasal, at pornograpya ay mga paglabag sa  pamantayan ni Jehova hinggil sa moral na kalinisan. Gayunman, ang mga kapahayagan sa mga gawaing ito ay palasak sa daigdig ng libangan at moda. Kung gayon, ang mga Kristiyano ay dapat na maging mapagbantay laban sa gayong mga kalakaran. Ang pagsusuot ng maiikli at naghahantad na mga kasuutan sa Kristiyanong mga pagpupulong o sosyal na mga pagtitipon ay umaakay ng di-kinakailangang pansin sa katawan ng tao at nagpapakita ng paglihis sa kalinisan sa moral. Maliban sa nagdudulot ito ng marumi at makasanlibutang kaisipan sa samahang Kristiyano, ang pananamit sa gayong paraan ay may posibilidad na pumukaw ng maruruming kaisipan sa iba. Ito ay isang larangan kung saan ang mga Kristiyano ay kailangang magpagal sa pagpapamalas ng “karunungan mula sa itaas.”​—Santiago 3:17.

Mental. Ang kaibuturan ng iyong isip ay hindi dapat maging isang imbakan ng maruruming kaisipan. Nagbabala si Jesus laban sa maruming pag-iisip nang kaniyang sabihin: “Ang bawat isa na patuloy na tumitingin sa isang babae upang magkaroon ng masidhing pagnanasa sa kaniya ay nangalunya na sa kaniya sa kaniyang puso.” (Mateo 5:28; Marcos 7:20-23) Ang mga salitang ito ay kumakapit din sa panonood ng pornograpikong mga larawan at pelikula, pagbabasa ng mga ulat tungkol sa malalaswang gawain sa sekso, at pakikinig sa nagpapahiwatig na mga liriko ng mga awitin. Kaya, dapat iwasan ng mga Kristiyano na marungisan ang kanilang sarili sa pamamagitan ng pag-iisip ng maruruming kaisipan na makapagdudulot ng marumi at di-banal na pananalita at mga pagkilos.​—Mateo 12:34; 15:18.

Pisikal. Ang kabanalan at pisikal na kalinisan ay may malapit na kaugnayan sa Bibliya. Halimbawa, sumulat si Pablo: “Mga minamahal, linisin natin ang ating sarili mula sa bawat karungisan ng laman at espiritu, na pinasasakdal ang kabanalan nang may pagkatakot sa Diyos.” (2 Corinto 7:1) Kung gayon, ang mga tunay na Kristiyano ay dapat na magsikap na panatilihing malinis at masinop ang kanilang katawan, tahanan, at kapaligiran, hangga’t ipinahihintulot ng mga kalagayan. Maging sa mga lugar na kapos ang suplay ng tubig na panlaba o pampaligo, dapat na sikapin ng mga Kristiyano na gawin ang kanilang buong makakaya upang manatili silang malinis at presentable.

Ang pisikal na kalinisan ay humahadlang din sa paggamit ng tabako sa anumang anyo nito, pagpapakalabis sa inuming de-alkohol, at anumang anyo ng pag-aabuso sa droga, na nagpapabaho at pumipinsala sa katawan. Ang pastol na inilarawan sa Awit ni Solomon ay nasiyahan sa mabangong amoy ng kasuutan ng babaing Shulamita. (Awit ni Solomon 4:11) Ang pangangalaga sa ating personal na kalinisan ay isang maibiging bagay na gawin, yamang nais nating maiwasang magdulot ng di-kanais-nais na mga amoy sa mga katabi natin. Ang mga pabango at cologne ay maaaring maging kaiga-igaya, ngunit hindi ito maipapalit sa regular na paliligo at malinis na mga damit.

Pagpapanatili ng Isang Timbang na Pangmalas

Pagdating sa pisikal na kalinisan, maaaring magpakalabis-labis ang mga tao. Sa isang panig, ang pagiging panatiko hinggil sa kalinisan ay maaaring mag-alis ng ating kagalakan sa pamumuhay. Maaari  rin itong umubos ng mahalagang panahon. Sa kabilang panig naman, ang marumi at di-masinop na mga tahanan ay maaaring maging magastos na kumpunihin. Sa pagitan ng mga kalabisang ito ay nariyan ang praktikal at timbang na paraan sa pagpapanatiling malinis at presentable ng ating tahanan.

Panatilihin itong simple. Ang mga tahanan o mga kuwarto na maraming gamit ay mahirap linisin, at ang dumi ay hindi madaling makita sa gayong masisikip na kapaligiran. Ang katamtaman at simpleng mga tahanan ay mas madaling linisin. Ang isang simpleng istilo ng pamumuhay ay lubhang inirerekomenda sa Bibliya: “Sa pagkakaroon ng pagkain at pananamit, magiging kontento na tayo sa mga bagay na ito.”​—1 Timoteo 6:8.

Panatilihin itong masinop. Ang isang malinis na tahanan ay responsibilidad ng lahat ng nakatira rito. Ang di-masinop na mga tahanan ay kadalasang nagsisimula bilang di-masinop na mga kuwarto. Ang pagiging masinop ay nangangahulugan na ang lahat ng bagay ay nasa tamang dako nito. Halimbawa, ang lugar para sa maruruming damit ay hindi dapat sa sahig ng kuwarto. At mas maselan pa rito, ang mga laruan at mga kasangkapan na iniwang nakakalat ay potensiyal na mga panganib. Maraming aksidente sa tahanan ang dulot ng di-masinop na mga kinaugalian.

Maliwanag, ang kalinisan at Kristiyanong landas ng pamumuhay ay hindi mapaghihiwalay. Hinggil sa makadiyos na landas ng pamumuhay, binanggit ng propetang si Isaias ang “Daan ng Kabanalan.” At idinagdag niya ang seryosong kaisipan na “ang marumi ay hindi daraan doon.” (Isaias 35:8) Oo, ang paglinang ng mabubuting kinaugalian sa kalinisan ngayon ay nagbibigay ng matibay na patotoo ng ating pananampalataya sa pangako ng Diyos na malapit na niyang itatag ang isang malinis na paraisong lupa. Pagkatapos, sa lahat ng bahagi ng magandang planetang ito, ang lahat ng tao ay luluwalhati sa Diyos na Jehova sa pamamagitan ng lubusang pagsunod sa kaniyang sakdal na mga pamantayan sa kalinisan.​—Apocalipsis 7:9.

[Larawan sa pahina 6]

Ang isang malinis na tahanan ay responsibilidad ng lahat ng nakatira rito

[Larawan sa pahina 7]

Ang lupa ay isang kusang-naglilinis na kababalaghan