“Humayo Kayo at Gumawa ng mga Alagad”

“Ang lahat ng awtoridad ay ibinigay na sa akin sa langit at sa lupa. Kaya humayo kayo at gumawa ng mga alagad.”​—MATEO 28:18, 19.

1, 2. (a) Anong atas ang ibinigay ni Jesus sa kaniyang mga tagasunod? (b) Anu-anong mga tanong hinggil sa mga utos ni Jesus ang isasaalang-alang?

ISANG araw ng tagsibol sa Israel noong 33 C.E. nang magtipon ang mga alagad ni Jesus sa isang bundok sa Galilea. Malapit nang umakyat sa langit ang kanilang binuhay-muling Panginoon, pero mayroon muna siyang mahalagang sasabihin sa kanila. May atas si Jesus para sa kanila. Ano kaya ang atas na iyon? Paano tumugon ang mga alagad dito? At paano kumakapit sa atin sa ngayon ang atas na iyon?

² Ang sinabi ni Jesus ay nakaulat sa Mateo 28:18-​20: “Ang lahat ng awtoridad ay ibinigay na sa akin sa langit at sa lupa. Kaya humayo kayo at gumawa ng mga alagad sa mga tao ng lahat ng mga bansa, na binabautismuhan sila sa pangalan ng Ama at ng Anak at ng banal na espiritu, na itinuturo sa kanila na tuparin ang lahat ng mga bagay na iniutos ko sa inyo. At, narito! ako ay sumasainyo sa lahat ng mga araw hanggang sa katapusan ng sistema ng mga bagay.” Binanggit ni Jesus ang “lahat ng awtoridad,” “lahat ng mga bansa,” “lahat ng mga bagay,” at “lahat ng mga araw.” Ang kaniyang mga utos na kinabibilangan ng apat na pananalitang iyon na sumasaklaw sa lahat ng pitak ay nagbabangon ng ilang mahahalagang tanong, na maaaring ibuod sa mga salitang bakit? saan? ano? at kailan? Isa-isa nating isaalang-alang ang mga tanong na iyan. *

“Ang Lahat ng Awtoridad ay Ibinigay na sa Akin”

3. Bakit natin dapat sundin ang utos na gumawa ng mga alagad?

³ Una, bakit natin dapat sundin ang utos na gumawa ng mga alagad? Sinabi ni Jesus: “Ang lahat ng awtoridad ay ibinigay na sa akin sa langit at sa lupa. Kaya humayo kayo at gumawa ng mga alagad.” Itinuturo sa atin ng salitang “kaya” ang isang pangunahing dahilan kung bakit dapat nating sundin ang utos na ito. Ito ay dahil sa nagtataglay si Jesus, ang isa na nagbigay ng utos, ng “lahat ng awtoridad.” Gaano ba kalawak ang kaniyang awtoridad?

4. (a) Gaano kalawak ang awtoridad ni Jesus? (b) Paano dapat maimpluwensiyahan ng ating pagkaunawa sa awtoridad ni Jesus ang ating pangmalas hinggil sa utos na gumawa ng mga alagad?

⁴ May awtoridad si Jesus sa kaniyang kongregasyon, at mula noong 1914 ay nagtataglay na siya ng awtoridad sa bagong-tatag na Kaharian ng Diyos. (Colosas 1:13; Apocalipsis 11:15) Siya ang arkanghel at dahil dito ay may awtoridad siya sa isang makalangit na hukbo ng daan-daang milyong anghel. (1 Tesalonica 4:16; 1 Pedro 3:22; Apocalipsis 19:14-16) Pinagkalooban siya ng kaniyang Ama ng kapangyarihan  upang pawiin “ang lahat ng pamahalaan at ang lahat ng awtoridad at kapangyarihan” na sumasalungat sa matuwid na mga simulain. (1 Corinto 15:24-26; Efeso 1:20-23) Ang awtoridad ni Jesus ay hindi lamang sa mga buháy. Siya rin ang “hukom ng mga buháy at ng mga patay” at may bigay-Diyos na kapangyarihan upang buhaying muli ang mga natulog na sa kamatayan. (Gawa 10:42; Juan 5:26-28) Tiyak na ang utos na ibinigay ng Isa na pinagkalooban ng gayon kalaking awtoridad ay dapat ituring na napakahalaga. Kaya naman, may-paggalang at may-pagkukusa tayong sumusunod sa utos ni Kristo na ‘humayo at gumawa ng mga alagad.’

5. (a) Paano sinunod ni Pedro ang mga salita ni Jesus? (b) Ang pagsunod ni Pedro sa mga tagubilin ni Jesus ay umakay sa anong pagpapala?

⁵ Sa pasimula ng kaniyang makalupang ministeryo, tinuruan ni Jesus ang kaniyang mga alagad sa isang kapansin-pansing paraan na ang pagkilala sa kaniyang awtoridad at pagsunod sa kaniyang mga utos ay aakay sa mga pagpapala. Minsan ay sinabi niya kay Pedro, na isang mangingisda: “Pumaroon ka sa malalim, at ibaba ninyo ang inyong mga lambat upang makahuli.” Nakatitiyak si Pedro na walang isda, kaya sinabi niya kay Jesus: “Tagapagturo, buong gabi kaming nagpagal at walang nakuhang anuman.” Gayunman, may-kapakumbabaang isinusog ni Pedro: “Ngunit dahil sa sinabi mo ay ibababa ko ang mga lambat.” Pagkatapos sundin ni Pedro ang utos ni Kristo, nakahuli siya ng “napakaraming isda.” Palibhasa’y lubhang nanggilalas, si Pedro ay “sumubsob sa mga tuhod ni Jesus, na sinasabi: ‘Lumayo ka sa akin, sapagkat ako ay taong makasalanan, Panginoon.’” Subalit sumagot si Jesus: “Huwag ka nang matakot. Mula ngayon ay manghuhuli ka ng mga taong buháy.” (Lucas 5:1-10; Mateo 4:18) Ano ang matututuhan natin sa ulat na iyan?

6. (a) Ano ang inilalarawan ng ulat hinggil sa makahimalang paghuli ng isda may kinalaman sa uri ng pagsunod na hinihiling ni Jesus? (b) Paano natin matutularan si Jesus?

⁶ Ibinigay ni Jesus kay Pedro, Andres, at sa iba pang mga apostol ang atas na “maging mga mangingisda ng mga tao,” hindi bago, kundi pagkatapos nilang makahuli ng gayong nakapanggigilalas na dami ng isda. (Marcos 1:16, 17) Maliwanag, hindi humiling si Jesus ng bulag na pagsunod. Binigyan niya ng nakakakumbinsing dahilan ang mga lalaki kung bakit dapat nilang sundin siya. Kung paanong ang pagsunod sa utos ni Jesus na ibaba ang kanilang mga lambat ay umakay sa nakapanggigilalas na mga resulta, ang pagsunod sa utos ni Jesus na ‘manghuli ng mga tao’ ay aakay rin sa saganang mga pagpapala. Taglay ang lubos na pananampalataya, tumugon ang mga apostol. Nagwakas ang ulat: “Ibinalik nila sa lupa ang mga bangka, at iniwan ang lahat ng bagay at sumunod sa kaniya.” (Lucas 5:11) Sa ngayon, habang pinasisigla natin ang iba na makibahagi sa paggawa ng mga alagad, tinutularan natin si Jesus. Hindi natin hinihiling sa mga tao na maging sunud-sunuran lamang sa sinasabi natin sa kanila, sa halip ay nagbibigay tayo ng nakakakumbinsing mga dahilan kung bakit dapat sundin ang utos ni Kristo.

Nakakakumbinsing mga Dahilan at Tamang mga Motibo

7, 8. (a) Ano ang ilang maka-Kasulatang dahilan para sa pangangaral ng Kaharian at paggawa ng mga alagad? (b) Anong teksto ang lalo nang gumaganyak sa iyo na magpatuloy sa gawaing pangangaral? (Tingnan din ang talababa.)

⁷ Dahil kinikilala natin ang awtoridad ni Kristo, nakikibahagi tayo sa pangangaral ng Kaharian at paggawa ng mga alagad. Ano pa bang ibang maka-Kasulatang dahilan sa pagsasakatuparan ng gawaing iyan ang maaari nating ibahagi sa mga nais nating mapakilos na gumawa ng maiinam na gawa? Isaalang-alang ang sumusunod na mga komento ng ilang tapat na Saksi mula sa iba’t ibang lupain, at pansinin kung paano sinusuportahan ng binanggit na mga teksto ang kanilang mga komento.

⁸ Si Roy, nabautismuhan noong 1951: “Nang ialay ko ang aking sarili kay Jehova, nangako ako na palagi ko siyang paglilingkuran. Gusto kong tuparin ang aking pangako.” (Awit 50:14; Mateo 5:37) Si Heather, nabautismuhan noong 1962: “Kapag naiisip ko ang lahat ng ginawa ni Jehova para sa akin, gusto kong ipakita sa kaniya ang aking pasasalamat sa pamamagitan ng tapat na paglilingkod sa kaniya.” (Awit 9:1, 9-11; Colosas 3:15) Si Hannelore, nabautismuhan noong 1954: “Sa tuwing nasa ministeryo tayo, sinusuportahan tayo ng mga anghel​—kaylaking pribilehiyo!” (Gawa 10:30-33; Apocalipsis 14:6, 7) Si Honor, nabautismuhan noong 1969: “Kapag dumating ang oras ng paghatol ni  Jehova, ayaw kong may sinuman sa aming pamayanan na makapagparatang kay Jehova at sa kaniyang mga Saksi na sila’y nagpabaya at sa gayo’y sabihin, ‘Wala akong natanggap na babala!’” (Ezekiel 2:5; 3:17-19; Roma 10:16, 18) Si Claudio, nabautismuhan noong 1974: “Kapag nangangaral tayo, ‘nasa paningin tayo ng Diyos’ at ‘kasama ni Kristo.’ Gunigunihin na lamang! Habang nasa ministeryo tayo, tinatamasa natin ang pakikipagsamahan ng ating pinakamatatalik na Kaibigan.”​—2 Corinto 2:17. *

9. (a) Ano ang isinisiwalat ng ulat hinggil sa karanasan ni Pedro at ng ibang mga apostol may kinalaman sa tamang motibo sa pagsunod kay Kristo? (b) Ano ang tamang motibo sa pagsunod sa Diyos at kay Kristo sa ngayon, at bakit?

⁹ Ipinakikita rin ng ulat hinggil sa kamangha-manghang paghuli ng isda ang kahalagahan ng pagkakaroon ng tamang motibo sa pagsunod kay Kristo​—ang pag-ibig. Nang sabihin ni Pedro, “Lumayo ka sa akin, sapagkat ako ay taong makasalanan,” hindi umalis si Jesus, ni hinatulan niya si Pedro sa anumang kasalanan. (Lucas 5:8) Hindi man lamang pinuna ni Jesus si Pedro sa pagsusumamo nito sa kaniya na umalis. Sa halip, may-kabaitang sumagot si Jesus: “Huwag ka nang matakot.” Ang di-wastong pagkatakot ay tiyak na magiging isang maling motibo sa pagsunod kay Kristo. Sa halip, sinabi ni Jesus kay Pedro na siya at ang kaniyang mga kasamahan ay magiging kapaki-pakinabang bilang mga mangingisda ng mga tao. Sa ngayon, hindi rin tayo gumagamit ng pananakot o ng katulad na emosyong nakasisira ng loob, tulad ng panunumbat ng budhi at pagkapahiya, upang pilitin ang iba na sumunod kay Kristo. Tanging ang buong-kaluluwang pagsunod salig sa pag-ibig sa Diyos at kay Kristo ang nagpapasaya sa puso ni Jehova.​—Mateo 22:37.

“Gumawa ng mga Alagad sa mga Tao ng Lahat ng mga Bansa”

10. (a) Anong detalye hinggil sa utos ni Jesus na gumawa ng mga alagad ang nagharap ng malaking hamon sa kaniyang mga alagad? (b) Paano tumugon ang mga alagad sa utos ni Jesus?

¹⁰ Ang ikalawang tanong na ibinangon may kaugnayan sa utos ni Kristo ay, Saan ba dapat isakatuparan ang paggawa ng mga alagad? Sinabi ni Jesus sa kaniyang mga tagasunod: “Gumawa ng mga  alagad sa mga tao ng lahat ng mga bansa.” Bago ang panahon ng ministeryo ni Jesus, ang mga tao ng mga bansa ay malugod na tinatanggap sa Israel kung sila’y nagpunta roon upang maglingkod kay Jehova. (1 Hari 8:41-43) Si Jesus mismo ay pangunahin nang nangaral sa likas na mga Judio, pero ngayon ay sinasabi niya sa kaniyang mga tagasunod na humayo sa mga tao ng lahat ng mga bansa. Sa diwa, ang pangisdaan, o teritoryo sa pangangaral, ng kaniyang mga alagad ay limitado lamang sa isang maliit na “palaisdaan”​—ang likas na mga Judio​—ngunit di-magtatagal ay makakasama na ang buong “karagatan” ng sangkatauhan. Bagaman ang pagbabagong ito ay nagharap ng isang hamon sa mga alagad, malugod nilang sinunod ang tagubilin ni Jesus. Wala pang 30 taon ang nakalilipas pagkamatay ni Jesus, naisulat ni apostol Pablo na ang mabuting balita ay naipangaral na hindi lamang sa mga Judio kundi sa “lahat ng nilalang na nasa silong ng langit.”​—Colosas 1:23.

11. Anong paglawak ng ‘pangisdaan’ ang naganap mula noong unang bahagi ng ika-20 siglo?

¹¹ Sa makabagong panahon, nakikita ang isang nakatutulad na paglawak ng teritoryo sa pangangaral. Noong pasimula ng ika-20 siglo, ang ‘pangisdaan’ ay limitado lamang sa iilang lupain. Gayunman, sinunod ng mga tagasunod ni Kristo noong panahong iyon ang halimbawa ng unang-siglong mga Kristiyano at may-pananabik na pinalawak ang teritoryong pinangangaralan nila. (Roma 15:20) Pagsapit ng unang mga taon ng dekada ng 1930, gumawa sila ng mga alagad sa humigit-kumulang isang daang lupain. Sa ngayon, ang ating ‘pangisdaan’ ay lumawak tungo sa 235 lupain.​—Marcos 13:10.

“Mula sa Lahat ng Wika”

12. Anong hamon ang itinatampok ng hulang masusumpungan sa Zacarias 8:23?

¹² Ang paggawa ng mga alagad sa lahat ng mga bansa ay isang hamon hindi lamang sa lawak ng lugar kundi sa wika rin naman. Sa pamamagitan ni propeta Zacarias, inihula ni Jehova: “Mangyayari sa mga araw na iyon na sampung lalaki mula sa lahat ng wika ng mga bansa ang tatangan, oo, tatangan sila sa laylayan ng lalaki na isang Judio, na sinasabi: ‘Yayaon kaming kasama ninyo, sapagkat narinig namin na ang Diyos ay sumasainyo.’” (Zacarias 8:23) Sa mas malaking katuparan ng hulang ito, ang “lalaki na isang Judio” ay kumakatawan sa nalabi ng pinahirang mga Kristiyano, samantalang ang “sampung lalaki” naman ay kumakatawan sa “malaking pulutong.” * (Apocalipsis 7:9, 10; Galacia 6:16) Ang malaking pulutong na ito ng mga alagad ni Kristo ay masusumpungan sa maraming bansa, at gaya ng sinabi ni Zacarias, magsasalita sila ng maraming wika. Inilalarawan ba ng makabagong-panahong kasaysayan ng bayan ng Diyos ang pitak na iyan ng pagiging alagad? Ang sagot ay ‘Oo.’

13. (a) Ano ang kaganapan sa makabagong bayan ng Diyos may kaugnayan sa mga wika? (b) Paano tumutugon ang uring tapat na alipin sa lumalaking pangangailangan para sa espirituwal na pagkain sa iba’t ibang wika? (Ilakip ang kahong “Mga Publikasyon Para sa mga Bulag.”)

¹³ Noong 1950, Ingles ang katutubong wika ng humigit-kumulang 3 sa bawat 5 Saksi ni Jehova sa buong daigdig. Pagsapit ng 1980, ang proporsiyon na iyan ay nagbago tungo sa humigit-kumulang  2 sa bawat 5, at sa ngayon, 1 na lamang sa bawat 5 Saksi ang may katutubong wika na Ingles. Paano tumugon ang tapat at maingat na alipin sa pagbabagong ito sa ginagamit na wika? Sa pamamagitan ng paglalaan ng espirituwal na pagkain sa mas marami pang wika. (Mateo 24:45) Halimbawa, noong 1950, ang ating literatura ay inilalathala sa 90 wika, ngunit ngayon, ang bilang na iyan ay tumaas sa mga 400. Nagbunga ba ang pagtutuon na ito ng higit na pansin sa mga tao mula sa iba’t ibang grupo ng wika? Oo! Isang katamtamang bilang na mga 5,000 katao ‘mula sa lahat ng mga wika’ ang nagiging mga alagad ni Kristo bawat linggo ng taon! (Apocalipsis 7:9) At patuloy ang pagdami. Sa ilang lupain, napakaraming isda ang nahuhuli ng mga “lambat”!​—Lucas 5:6; Juan 21:6.

Isang Kasiya-siyang Ministeryo​—Maaari Ka Bang Makibahagi Rito?

14. Paano natin matutulungan ang mga nasa teritoryo natin na nagsasalita ng banyagang wika? (Ilakip ang kahong “Wikang Pasenyas at Paggawa ng mga Alagad.”)

¹⁴ Sa maraming lupain sa Kanluran, ang pagdating ng mga nandayuhan ay nagharap mismo sa mga lupaing iyon ng hamon sa paggawa ng mga alagad mula sa mga tao ng ‘bawat wika.’ (Apocalipsis 14:6) Paano natin matutulungan ang mga nasa teritoryo natin na nagsasalita ng ibang wika? (1 Timoteo 2:4) Maaari nating gamitin ang tamang kagamitan sa pangingisda, wika nga. Ialok sa gayong mga indibiduwal ang mga literatura sa wika nila. Kung posible, isaayos na isang Saksing nagsasalita ng kanilang wika ang dumalaw sa kanila. (Gawa 22:2) Ang paggawa ng mga kaayusang ito ay mas madali na ngayon, yamang maraming Saksi ang nag-aral magsalita ng ibang wika upang tulungan ang mga banyaga na maging mga alagad ni Kristo. Ipinakikita ng mga ulat na ang pagtulong sa ganitong paraan ay isang kasiya-siyang karanasan.

15, 16. (a) Anu-anong mga halimbawa ang naglalarawan na kasiya-siya ang tumulong sa mga nagsasalita ng banyagang wika? (b) Anu-anong mga tanong hinggil sa paglilingkod sa larangan na banyaga ang wika ang maaari nating isaalang-alang?

¹⁵ Isaalang-alang ang dalawang halimbawa mula sa Netherlands, kung saan ang organisadong pangangaral ng Kaharian ay isinasagawa sa 34 na wika. Isang mag-asawang Saksi ang nagboluntaryo upang humayo at gumawa ng mga alagad sa mga nandayuhang nagsasalita ng wikang Polako. Gayon na lamang kapositibo ang tugon sa kanilang pagsisikap anupat naganyak ang asawang lalaki na bawasan ang kaniyang sekular na trabaho upang magkaroon siya ng isa pang araw bawat linggo para  magdaos ng pag-aaral sa Bibliya sa mga nagpapakita ng interes. Di-nagtagal, nagdaraos na ang mag-asawa ng mahigit sa 20 pag-aaral sa Bibliya linggu-linggo. Sinabi nila: “Napakaligaya namin dahil sa aming ministeryo.” Lalo nang natutuwa ang mga gumagawa ng mga alagad kapag ang mga nakaririnig ng mga katotohanan sa Bibliya sa kanilang sariling wika ay napakilos na magpahayag ng pagpapahalaga. Halimbawa, sa isang pagpupulong na idinaos sa wikang Vietnames, isang may-edad nang lalaki ang tumayo at humiling ng pahintulot na siya’y makapagsalita. Habang lumuluha, sinabi niya sa mga Saksi: “Salamat sa inyong mga pagsisikap na pag-aralan ang aking mahirap na wika. Lubha akong nagpapasalamat na matutuhan ang napakaraming kamangha-manghang bagay mula sa Bibliya kahit matanda na ako.”

¹⁶ Kaya naman, hindi kataka-taka na ang mga naglilingkod sa mga kongregasyong gumagamit ng banyagang wika ay nakadarama ng malaking kasiyahan. Isang mag-asawa mula sa Britanya ang nagsabi: “Ang ministeryo sa larangan na banyaga ang wika ay isa sa pinakakapana-panabik na karanasan namin sa aming 40 taon ng paglilingkod sa Kaharian.” Maaari mo bang baguhin ang iyong mga kalagayan upang makabahagi ka sa nakapagpapasiglang ministeryong ito? Kung pumapasok ka pa sa paaralan, maaari ka bang mag-aral ng isang banyagang wika bilang paghahanda sa ganitong uri ng ministeryo? Ang paggawa ng gayon ay maaaring umakay sa isang kasiya-siyang paraan ng buhay na punô ng mga pagpapala. (Kawikaan 10:22) Bakit hindi mo ito ipakipag-usap sa iyong mga magulang?

Iba-Ibahin ang Ating mga Pamamaraan

17. Paano natin maaabot ang mas marami pang tao sa teritoryo ng ating kongregasyon?

¹⁷ Mauunawaan naman, hindi ipinahihintulot ng mga kalagayan ng karamihan sa atin na ihagis ang ating “mga lambat” sa mga teritoryong gumagamit ng banyagang wika. Gayunman, baka naman maaabot natin ang mas maraming tao kaysa sa kasalukuyang nagagawa natin sa mismong teritoryo ng ating kongregasyon. Paano? Magagawa natin ito kung iiba-ibahin natin, hindi ang ating mensahe, kundi ang ating mga pamamaraan. Sa maraming lugar, dumarami ang mga taong naninirahan sa mga gusaling may mahigpit na seguridad. Marami pang iba ang wala sa tahanan kapag dumadalaw tayo sa kanila sa panahon ng ating ministeryo sa bahay-bahay. Kaya baka kailangan nating ihagis ang ating “mga lambat” sa iba’t ibang panahon at sa iba’t ibang lugar. Sa gayon ay tinutularan natin si Jesus. Nakahanap siya ng mga paraan upang makausap ang mga tao sa iba’t ibang kalagayan.​—Mateo 9:9; Lucas 19:1-10; Juan 4:6-15.

18. Paanong ang pagpapatotoo sa iba’t ibang kalagayan ay napatunayang mabisa? (Ilakip ang kahong “Paggawa ng mga Alagad sa mga Negosyante.”)

¹⁸ Sa ilang bahagi ng daigdig, ang pagpapatotoo sa mga lugar kung saan masusumpungan ang mga tao ay isang mahalagang pamamaraan sa paggawa ng mga alagad. Ang makaranasang mga gumagawa ng mga alagad ay nagbibigay ng higit na pansin sa pagpapatotoo sa iba’t ibang lugar. Bukod pa sa pakikibahagi sa ministeryo sa bahay-bahay, nagpapatotoo na ngayon ang mga mamamahayag sa mga paliparan, opisina, tindahan, paradahan ng mga sasakyan, hintuan ng bus, lansangan, parke, baybaying-dagat, at sa iba pang lugar. Maraming bagong-bautisadong Saksi sa Hawaii ang unang natagpuan sa gayong mga lugar. Ang pag-iiba-iba sa ating mga pamamaraan ay tutulong sa atin na lubusang isakatuparan ang utos ni Jesus na gumawa ng mga alagad.​—1 Corinto 9:22, 23.

19. Anu-anong mga pitak ng atas ni Jesus sa atin ang tatalakayin sa susunod na artikulo?

¹⁹ Ang atas ni Jesus na gumawa ng mga alagad ay naglakip ng mga detalye hindi lamang hinggil sa kung bakit at kung saan natin dapat isagawa ang gawaing iyon kundi gayundin naman kung ano ang dapat nating ipangaral at kung hanggang kailan natin dapat gawin iyon. Ang dalawang pitak na ito ng atas ni Jesus sa atin ang isasaalang-alang sa susunod na artikulo.

[Mga talababa]

Naaalaala Mo Ba?

• Anu-ano ang mga dahilan at ano ang motibo natin sa pakikibahagi sa pangangaral ng Kaharian at paggawa ng mga alagad?

• Gaano na ba kalawak ang nasaklaw ng mga lingkod ni Jehova sa ngayon sa pagsasakatuparan sa atas ni Jesus na gumawa ng mga alagad sa mga tao ng lahat ng mga bansa?

• Paano natin maaaring iba-ibahin ang ating ‘pamamaraan sa pangingisda,’ at bakit natin dapat gawin ito?

[Mga Tanong sa Aralin]

[Kahon/Mga larawan sa pahina 10]

Mga Publikasyon Para sa mga Bulag

Si Albert ay isang Kristiyanong elder at buong-panahong ministro na nakatira sa Estados Unidos. Bulag siya. Ang paggamit ng mga literatura sa Bibliya sa Braille ay tumutulong sa kaniya na maging mas mabisa sa kaniyang ministeryo, pati na sa kaniyang mga gawain bilang tagapangasiwa sa paglilingkod. Paano niya nagagampanan ang kaniyang atas sa kongregasyon?

“Hindi pa kami nagkaroon ng tagapangasiwa sa paglilingkod sa kongregasyon na kasinghusay ni Albert,” ang sabi ni James, ang punong tagapangasiwa. Si Albert ay isa sa mga 5,000 bulag sa Estados Unidos na, sa paglipas ng mga taon, ay nakatatanggap ng mga publikasyon sa Braille sa wikang Ingles at Kastila. Sa katunayan, mula noong 1912 patuloy, nakapaglaan ang uring tapat na alipin ng mahigit sa isang daang iba’t ibang publikasyon sa Braille. Sa pamamagitan ng makabagong teknolohiya, ang mga palimbagan ng mga Saksi ni Jehova ay gumagawa sa kasalukuyan ng milyun-milyong pahina taun-taon sa mahigit na sampung wika sa Braille at ipinamamahagi ang mga ito sa mahigit na 70 bansa. May kilala ka bang maaaring makinabang sa mga publikasyon ng Bibliya na inihanda para sa mga bulag?

[Kahon/Larawan sa pahina 11]

Wikang Pasenyas at Paggawa ng mga Alagad

Libu-libong Saksi sa buong globo, kasama na ang maraming masisigasig na kabataan, ang nag-aral ng wikang pasenyas upang matulungan ang mga taong bingi na maging mga alagad ni Kristo. Bilang resulta, sa Brazil lamang, 63 binging indibiduwal ang nabautismuhan sa isang kamakailang taon at 35 binging Saksi roon ang naglilingkod ngayon bilang mga buong-panahong ebanghelisador. Sa buong daigdig, mahigit sa 1,200 kongregasyon at grupo ang gumagamit ng wikang pasenyas. Ang nag-iisang sirkitong gumagamit ng wikang pasenyas sa Russia ay ang pinakamalaking sirkito sa buong daigdig kung lawak ang pag-uusapan, anupat sinasaklaw ang buong Russia!

[Kahon sa pahina 12]

Paggawa ng mga Alagad sa mga Negosyante

Habang dinadalaw ang mga negosyante sa mga opisinang pinagtatrabahuhan nila, nakausap ng isang Saksi sa Hawaii ang isang opisyal ng isang kompanya sa transportasyon. Bagaman abala, pumayag ang lalaki na mag-aral ng Bibliya sa loob ng 30 minuto linggu-linggo sa kaniyang opisina. Tuwing Miyerkules ng umaga, sinasabi niya sa kaniyang mga tauhan na huwag munang ikokonekta sa opisina niya ang kaniyang mga tawag sa telepono upang maibuhos niya ang kaniyang pansin sa pag-aaral. Isa pang Saksi sa Hawaii ang nagdaraos ng pag-aaral sa Bibliya minsan sa isang linggo sa may-ari ng isang shoe-repair shop. Ginaganap ang pag-aaral sa mismong despatso ng shop. Kapag may dumating na kostumer, tumatabi sandali ang Saksi. Pagkaalis ng kostumer, ipinagpapatuloy nila ang pag-aaral.

Kapuwa ang opisyal ng kompanya ng transportasyon at ang may-ari ng shop ay nakausap dahil nagkusa ang mga Saksi na ihagis ang kanilang “mga lambat” sa iba’t ibang lugar. Mayroon ka bang naiisip na mga lugar sa teritoryo ng inyong kongregasyon kung saan maaari mong makausap ang mga taong mahirap masumpungan sa bahay?

[Larawan sa pahina 12]

Maaari ka kayang maglingkod sa larangan na banyaga ang wika?