Mga Tanong Mula sa mga Mambabasa

Bakit sinabihan ng binuhay-muling si Jesus na hipuin siya ni Tomas gayong bago ang pangyayaring ito ay pinigilan Niya si Maria Magdalena na gawin ito?

Ipinahihiwatig ng mas matatandang salin ng Bibliya na sinabihan ni Jesus si Maria Magdalena na huwag siyang hipuin. Halimbawa, ganito ang salin ng Ang Biblia sa pananalita ni Jesus: “Huwag mo akong hipuin; sapagkat hindi pa ako nakakaakyat sa Ama.” (Juan 20:17) Gayunman, ang orihinal na pandiwang Griego, na kadalasang isinasalin na “hipuin,” ay nangangahulugan ding “kumapit sa, mangunyapit sa, sunggaban sa, hawakan nang mahigpit, tanganan.” Makatuwiran lamang, hindi tinututulan ni Jesus ang paghipo ni Maria Magdalena sa kaniya, yamang di-nagtagal pagkatapos nito ay pinahintulutan niya ang ibang kababaihang nasa libingan na ‘hawakan siya sa kaniyang mga paa.’​—Mateo 28:9.

Maraming salin sa makabagong wika, gaya ng Bagong Sanlibutang Salin ng Banal na Kasulatan, The New Jerusalem Bible, at The New English Bible, ang tumutulong sa atin na maunawaan ang tunay na kahulugan ng pananalita ni Jesus. Ganito ang mababasa sa gayong mga salin: “Huwag kang kumapit sa akin.” Bakit ito sinabi ni Jesus kay Maria Magdalena, na isang malapít niyang kasamahan?​—Lucas 8:1-3.

Malamang na nangangamba si Maria Magdalena na si Jesus ay aalis at aakyat na sa langit. Palibhasa’y gustung-gusto niyang makasama ang kaniyang Panginoon, hinahawakan niya nang mahigpit si Jesus upang hindi ito makaalis. Upang tiyakin sa kaniya na hindi pa siya aalis, inutusan ni Jesus si Maria na huwag kumapit sa kaniya kundi sa halip ay pumaroon sa kaniyang mga alagad at ibalita sa kanila ang hinggil sa kaniyang pagkabuhay-muli.​—Juan 20:17.

Naiiba naman ang pag-uusap nina Jesus at Tomas. Wala si Tomas nang magpakita si Jesus sa ilan niyang alagad. Nang maglaon, ipinahayag ni Tomas ang pag-aalinlangan niya hinggil sa pagkabuhay-muli ni Jesus, anupat sinabing hindi siya maniniwala rito maliban na lamang kung makikita niya ang sugat ni Jesus dahil sa pagkakapako at kung mahahawakan niya ang sugat ni Jesus sa tagiliran dahil sa sibat. Makalipas ang walong araw, muling nagpakita si Jesus sa kaniyang mga alagad. Sa pagkakataong ito, naroroon na si Tomas, at sinabihan siya ni Jesus na hipuin nito ang kaniyang mga sugat.​—Juan 20:24-27.

Kaya, sa kaso ni Maria Magdalena, ipinakikita ni Jesus na walang dahilan upang pigilin siya sa pag-alis; sa kaso naman ni Tomas, tinutulungan ni Jesus ang isa na nag-aalinlangan. Sa dalawang pagkakataong ito, makatuwiran ang naging pagkilos ni Jesus.