Dalawang “Himala” sa Isang Kombensiyon sa Georgia

ISANG di-malilimutang pangyayari ang naganap sa bansang Georgia noong 2006, kung saan may nasaksihang dalawang “himala.” Sa loob ng tatlong araw, mula Hulyo 7 hanggang 9, idinaos ang “Malapit Na ang Kaligtasan!” na Pandistritong Kombensiyon ng mga Saksi ni Jehova sa anim na lugar sa buong bansa. Isang espirituwal na piging iyon na dinaluhan ng mahigit 17,000 katao.

Noong Enero 2006, sinimulan ang paghahanap ng angkop na lugar para sa pagtitipon ng libu-libo katao sa pangunahing lunsod na pagdarausan ng kombensiyon, ang Tbilisi, na kabisera ng Georgia. Maririnig ang programa sa iba pang lokasyon ng kombensiyon sa pamamagitan ng telepono.

Nitong nakalipas na mga taon, unti-unting nagkaroon ng kalayaan sa pagsamba sa Georgia. Kaya naman sa kabila ng laganap na pagsalansang noon, itinuloy pa rin ng mga Saksi ang paghahanda at kumpiyansa silang makakahanap ng lugar para sa kombensiyon sa kabiserang lunsod. Ang mga taga-Georgia ay likas na palakaibigan at maasikaso. Pero matindi ang pagtatangi ng ilang opisyal dahil sa relihiyon. Isasaisantabi kaya nila ang damdaming ito at pahihintulutang umarkila ng pasilidad ang mga Saksi?

Tiningnan ng mga kapatid na miyembro ng Komite ng Kombensiyon ang iba’t ibang istadyum at malalaking bulwagang pang-isport. Ang mga nangangasiwa ng pasilidad ay nangakong ipagagamit ang mga ito pero tumanggi naman sila nang hingan sila ng eksaktong petsa para arkilahin ang lugar. Kaya nagulat ang komite nang pumayag ang nangangasiwa sa Tbilisi Philharmonic na ipagamit ang kanilang pasilidad sa mga Saksi ni Jehova. Ang bulwagang ito na ginagamit sa mga konsyerto ay nasa pinakapusod ng lunsod, kung saan ginaganap ang maraming prestihiyosong okasyon.

 Yamang lumakas ang loob ng komite dahil nagbunga sa wakas ang kanilang pagsisikap, sinimulan nilang organisahin ang kombensiyon sa Tbilisi, at sa mga bayan at lunsod sa buong bansa, kasama na ang Tsnori, Kutaisi, Zugdidi, Kaspi, at Gori. Malaking trabaho ang pagkonekta ng programa sa mga lugar na ito ng kombensiyon sa pamamagitan ng telepono upang sabay-sabay itong mapakinggan. Nakahanda na ang lahat. Pero isang linggo na lamang bago ang kombensiyon, biglang kinansela ng tagapangasiwa ng bulwagan ng Tbilisi Philharmonic ang kontrata nang walang pali-paliwanag.

Ang Unang “Himala”

Ano ang puwedeng gawin ng mga kapatid ngayong gipit na sila sa panahon? Ang pag-asa na lamang nila ay ang Marneuli, isang kabukiran sa labas ng Tbilisi na 40 kilometro ang layo. Marami nang kombensiyon ang naidaos doon sa lupain ng isang pamilya ng mga Saksi ni Jehova. Dating malaking taniman ang lugar. Sa nakalipas na sampung taon, ito lamang ang lugar na nagagamit ng mga kongregasyon sa Tbilisi para sa mga kombensiyon. Subalit sa Marneuli rin dumanas ng malupit na pang-uumog ang mga Saksi ni Jehova.

Ang isa sa ganitong insidente ay naganap noong Setyembre 16, 2000. Ang mga pulis ng lunsod ng Marneuli ay naglagay ng mga barikada para harangin ang mga Saksi na patungo sa kombensiyon. Pagkatapos, dumating ang mga bus na punô ng mga maton na pinangungunahan ng pinatalsik na paring Ortodokso na si Vasili Mkalavishvili. Hinarang nila ang mga kotse at bus na patungo sa kombensiyon sa Marneuli, kinaladkad palabas ng sasakyan ang maraming delegado, at walang-awang pinagbubugbog ang mga ito. Ninakaw ang mga gamit ng ibang pasahero, pati na ang kanilang mga Bibliya at literatura sa Bibliya.

Sinalakay rin ng mga 60 mang-uumog ang lugar ng kombensiyon sa Marneuli. Mga 40 Saksi ang nasugatan. Isang kapatid na lalaki ang sinaksak sa dibdib. Iwinasiwas ng ilang mang-uumog ang kanilang pinaikling mga baril na de-sabog at walang-habas na pinaputok sa ere ang mga ito. Tinutukan ng isa sa kanila ang may-ari ng lugar at sapilitang hiningi ang kaniyang pera at alahas. Hinalughog ng mga mang-uumog ang bahay niya, na nasa dulo ng lugar ng kombensiyon, at ninakaw ang kaniyang mahahalagang pag-aari. Pagkatapos nilang basagin ang lahat ng bintana sa bahay, sinunog nila ang mga literatura sa Bibliya at ang mga bangkô na ginawa para sa kombensiyon. Isa’t kalahating tonelada ng literatura ang natupok sa apoy. Sa halip na pahintuin ang krimen, nakisali pa nga ang mga pulis  sa karahasan laban sa mga Saksi. *

Kinailangan ding isaalang-alang ng Komite ng Kombensiyon hindi lamang ang banta ng karahasan kundi kung paano pagkakasiyahin ang 5,000 katao sa isang lugar na ang kapasidad lamang ay mga 2,500. Paano kaya malulutas ang problemang ito sa gayon kaikling panahon? Waring isang himala nang ipaarkila ng mga may-ari ng dalawang katabing lupain ang kanilang taniman.

Hindi biro na gawing angkop na lugar ng kombensiyon ang mga tanimang ito. Dagdag pa sa hirap ang lagay ng panahon​—buong linggong umulan bago ang kombensiyon. May mga patatas sa taniman ng kapitbahay, at kailangan itong anihin. Una, sama-samang nagbungkal ng patatas ang mga boluntaryo kahit walang tigil ang ulan. Pagkatapos ay pansamantala nilang inilipat ang mga bakod at nagbaon sila ng mga poste para kabitan ng habong na proteksiyon sa araw at ulan. Kinailangang gumawa ng karagdagang mga bangkô at maglagay ng ekstrang aparato para sa sound. Araw at gabing nagtrabaho ang mga boluntaryo​—may naglalagari, nagpapako, at nagbabarena—​at wala pa ngang tulog ang iba.

“Paano kung hindi tumila ang ulan hanggang sa araw ng kombensiyon?” ang tanong ng lahat. “Hindi kaya lumubog at maglaho sa putik ang mga delegado?” Kaya bumili sila ng dayami para ilatag sa basang lupa. Sa wakas, nagpakita rin ang araw! Napakaganda ng sikat nito sa tatlong araw ng kombensiyon.

Magandang tanawin ang sumalubong sa mga delegado. Ang mapayapang bukirin ay nagmistulang bagong sanlibutan. Ang mga delegado ay komportableng nakaupo sa gitna ng mga puno ng igos, iba pang namumungang punungkahoy, at mga taniman ng mais at kamatis. Ang likod ng entablado ay napapalamutian ng baging ng ubas. Habang may programa, naririnig paminsan-minsan ng mga delegado ang pagtilaok ng mga tandang at pagputak ng mga inahin habang kinukuha ang kanilang mga itlog. May iba pang ingay na karaniwan sa kabukiran, ngunit para itong musika sa tainga ng mga delegado. Sa halip na magambala, hindi ito gaanong napansin ng mga tagapakinig dahil tutok na tutok sila sa napakagandang programa na batay sa Bibliya. Subalit hindi lamang ito ang di-malilimutang mga sandali ng kombensiyong ito.

Ang Ikalawang “Himala”

Nang patapos na ang sesyon noong Biyernes ng umaga, nasorpresa ang mga delegado nang ipatalastas ni Geoffrey Jackson, miyembro ng Lupong Tagapamahala ng mga Saksi ni Jehova, ang paglalabas ng Bagong Sanlibutang Salin ng Banal  na Kasulatan sa wikang Georgiano. * Napaluha ang marami sa pagkamangha. Isang pamilya ang tuwang-tuwang nagsabi: “Hindi maubus-ubos ang aming pasasalamat sa himalang ito​—himala ni Jehova. Natapos ang napakalaking trabaho sa napakaikling panahon!”

Isang kapatid mula sa bayan ng Tsalendjikha na nakinig sa programa sa pamamagitan ng telepono ang nagsabi: “Hindi ko maipaliwanag ang sayang nadama ko nang matanggap namin ang kumpletong Bibliya. Gusto ko kayong pasalamatan sa napakagandang tatlong-araw na kombensiyong ito. Talagang makasaysayang pangyayari ito.” Ganito ang sabi ng isang pamilya na kaugnay sa kongregasyong nasa kanluraning Georgia, sa hangganan ng Dagat na Itim: “Mula’t sapol, iisa lamang ang Bibliya namin. Pero ngayon, kaming apat ay may tig-iisa nang kopya ng Bagong Sanlibutang Salin. Personal nang makapag-aaral ng Bibliya ang bawat isa sa amin.”

Gayunman, lingid sa kaalaman ng mga tagapakinig, hindi naging madali ang lahat. Halimbawa, bagaman maagang nailimbag at naipadala ang kumpletong Bagong Sanlibutang Salin para sa kombensiyon, hindi pinahintulutan ng mga opisyal ng Kagawaran ng Adwana na makapasok sa Georgia ang mga ito. Nag-apela sa Tanggapan ng Ombudsman ang mga kapatid. Nang makuha ng ombudsman ang permisong ilabas ang mga Bibliya, tamang-tama lamang ito sa panahon ng pandistritong kombensiyon. Ipinadala pa nga niya ang kaniyang kawani sa kombensiyon sa Marneuli upang kumuha ng mga kopya ng bagong Bibliya para sa kanilang opisina.

Mainit na Pagtanggap na Kaugalian ng mga Taga-Georgia

May isa pang dahilan kung bakit mahalagang okasyon para sa mga Saksi ni Jehova sa Georgia ang pandistritong kombensiyon sa Marneuli. Isang miyembro ng Lupong Tagapamahala ng mga Saksi ni Jehova ang dumating para sa programa. Sabik na sabik ang lahat ng dumalo at gusto ng bawat isa na ipakita ang kanilang nakaugaliang mainit na pagtanggap sa kaniya. Ilang oras na tumayo at bumati si Brother Jackson sa mga kapatid bago at pagkatapos ng kombensiyon, at maging sa panahon ng kombensiyon, pero masaya naman niyang ginawa ito.

Sa pagtatapos ng isang kombensiyon noong 1903, ganito ang sinabi ng isang kapatid: “Mahirap lamang ako pero hindi ko ipagpapalit sa kahit isang libong dolyar ang kapakinabangan ko sa kombensiyong ito.” Makalipas ang mahigit sandaang taon, ganiyang-ganiyan din ang nadama ng mga Saksi na dumalo sa di-malilimutang mga kombensiyon noong tag-araw ng 2006 sa bansang Georgia.

[Mga talababa]

[Kahon sa pahina 19]

Dumami “ang Munti”

Ang mga salita sa Isaias 60:22 ay nagkatotoo sa Georgia: “Ang munti ay magiging isang libo, at ang maliit ay magiging makapangyarihang bansa. Ako mismo, si Jehova, ang magpapabilis nito sa sarili nitong panahon.” Sa loob ng wala pang 20 taon, ang kulang-kulang 100 mamamahayag ng Kaharian sa Georgia ay naging humigit-kumulang 16,000. Ang masisigasig na ministrong ito ng Salita ng Diyos ay nagdaraos ng halos 8,000 pantahanang pag-aaral sa Bibliya linggu-linggo—malaking potensiyal sa pagsulong sa Georgia.

[Dayagram/Mga mapa sa pahina 16]

(Para sa aktuwal na format, tingnan ang publikasyon)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TURKEY

ARMENIA

AZERBAIJAN

[Credit Line]

Globe: Based on NASA/​Visible Earth imagery

[Larawan sa pahina 16]

Estatuwa sa Tbilisi

[Mga larawan sa pahina 17]

Maririnig ang programa ng kombensiyon sa Marneuli sa lima pang lugar sa pamamagitan ng mga telepono

[Mga larawan sa pahina 18]

Nasorpresa at natuwa ang mga delegado nang ilabas ang kumpletong “Bagong Sanlibutang Salin” sa wikang Georgiano