Natagpuan Na ba Nila ang Arka ni Noe?

WARING sa pana-panahon, napakaraming balita tungkol sa paghahanap ng mga arkeologo sa arka ni Noe. Talaga namang nakatatawag ito ng pansin. Ang napakalaking arkang iyon na sinakyan ni Noe at ng kaniyang pamilya nang magkaroon ng baha noong 2370-2369 B.C.E. ay tiyak na magiging isang kahanga-hangang tuklas. Pero sa kabila ng maraming pagsisikap, hindi pa rin matagpuan hanggang sa ngayon ang arka ni Noe. Sa dami ng mga espekulasyon at bali-balita, ano ba talaga ang natuklasan?

Sinasabi ng Bibliya na ang arka ni Noe ay “lumapag sa mga bundok ng Ararat.” (Genesis 8:4) Bahagi ng rehiyon ng Ararat ang kilalang Bundok Ararat sa silangang Turkey, malapit sa hanggahan ng Armenia at Iran.

Maraming ginawang paghahanap sa arka ni Noe sa lugar na ito at sinabing nakita ito subalit wala namang katibayan. Ang mga larawang kuha mula sa eroplano, piraso ng kahoy na may alkitran, at mga ulat na nagsasabing nakita nila ang arka ay lalo pang nagpasidhi sa mga tao na humanap ng mas matibay na ebidensiya. Pero hindi naging madali ang paghahanap. Ang isang posibleng lugar na madalas banggitin ay nasa dalisdis ng Bundok Ararat na mga 4,600 metro ang taas. Isa pa, dahil sa pulitikal na kaguluhan sa lugar na iyon, hindi laging napahihintulutan ang mga dayuhan na umakyat sa bundok.

Gayunpaman, gusto ng maraming interesado sa arka na magkaroon ng higit pang mga ekspedisyon sa lugar na iyon. Naniniwala sila na buo pa ang ilang bahagi ng arka na natatabunan ng niyebe halos buong taon sa Bundok Ararat. Sinasabi nilang may pag-asa lamang makita at marating ang arka kung matindi ang tag-init.

Lalong tumitibay ang kanilang pag-asa dahil sa maraming ulat. Binabanggit ni Josephus, isang istoryador na Judio noong unang siglo C.E., ang ilang naunang istoryador na nagsabing nakikita pa rin ang arka sa kabundukan ng Ararat. Sinasabi pa nga na ginawang subenir ng mga tao ang nakuha nilang mga piraso ng kahoy na nababalutan ng alkitran. Isa sa mga sinipi ni Josephus si Berossus, isang Babilonyong mananalaysay noong ikatlong siglo B.C.E.

Noong ika-20 siglo, ang isa sa nakaiintrigang ulat ay nagmula sa isang Armeniano, si George Hagopian. Sinabi niyang napuntahan niya ang arka nang bata pa siya kasama ng kaniyang tiyo noong unang mga taon ng 1900 at nakaakyat pa nga rito. Namatay si Hagopian noong 1972, pero ang kaniyang kuwento ay pumupukaw pa rin ng pananabik at pagkamangha.

Ito ba ang Tunay na Saligan Para Manampalataya?

Talaga bang may dahilan para maniwalang natuklasan na ng mga manggagalugad ang arka o matutuklasan ito sa hinaharap? Marahil, pero waring may higit na dahilan para mag-alinlangan na matatagpuan ang arka. Una, tandaan na hindi sinasabi ng Bibliya kung saan eksaktong sumadsad ang arka nang humupa ang tubig-baha. Binabanggit lamang nito ang “mga bundok ng Ararat.”

Natural lamang na tukuyin ng mga manggagalugad at mga interesado rito ang pinakamataas na bundok sa rehiyong iyon. Pero hindi sinasabi  ng Kasulatan na isinaayos ng Diyos na sumadsad ang arka sa pinakataluktok ng Bundok Ararat, na sa ngayo’y napakalamig at napakataas at halos limang kilometro mula sa lebel ng dagat. * Tandaan, si Noe at ang kaniyang pamilya ay tumira sa arka sa loob ng ilang buwan pagkatapos nitong sumadsad sa bundok. (Genesis 8:4, 5) Tila malayong mangyari na pagkalabas ng arka, sila at ang maraming hayop ay kailangang bumaba mula sa napakataas na bundok gaya ng ginagawa ng mga umaakyat ng bundok. Marahil ang lugar kung saan sumadsad ang arka ay mas madaling puntahan noon kaysa sa inaakala ng ilang manggagalugad sa ngayon, pero ang taas nito ay gaya pa rin ng pagkakalarawan sa Genesis 8:4, 5. At saanman sumadsad ang arka sa rehiyon ng Ararat, hindi kaya wala na ito mga ilang siglo na ang nakararaan dahil sa pagkasira at pangangahoy rito?

Bukod diyan, waring hindi kapani-paniwala ang sinasabi nila na mahalaga sa pananampalataya ang kanilang paghahanap. Sinabi ng isang taong nagsaayos ng isang ekspedisyon na kung makikita ang arka, “mapatitibay ang pananampalataya ng milyun-milyon . . . at marami pa ang mananampalataya.” Sa isang news conference noong 2004, sinabi niya na kung matatagpuan ang arka, ito ang magiging “pinakamahalagang pangyayari pagkatapos ng pagkabuhay-muli ni Kristo.” Nang maglaon, kinansela ang kaniyang paghahanap sa arka.

Kung matatagpuan ang arka ni Noe, talaga bang mapatitibay nito ang pananampalataya ng mga tao at tutulong pa nga sa iba na manampalataya? Ipinakikita ng Bibliya na ang tunay na pananampalataya ay hindi nakadepende sa mga bagay na nakikita at nahahawakan natin. (2 Corinto 5:7) Labis na nag-aalinlangan ang ilan anupat iginigiit nilang maniniwala lamang sila sa ilang ulat ng Bibliya kung may nakikitang ebidensiya. Pero ang totoo, kahit na gaano karaming ebidensiya ang iharap sa gayong mga tao, hindi pa rin sila mananampalataya. Sinabi mismo ni Jesus na ang ilang tao ay hindi basta makukumbinsi sa mga katotohanang binabanggit sa Bibliya​—kahit na makita pa nilang bumangon ang isa mula sa mga patay!​—Lucas 16:31.

Sa kabilang dako, ang tunay na pananampalataya ay batay sa matibay na ebidensiya. (Hebreo 11:1) May matibay na ebidensiya ba na tutulong sa makatuwirang mga tao sa ngayon na manampalataya sa ulat ng Bibliya tungkol sa Baha? Mayroon nga. Malinaw na sinabi ni Jesu-Kristo: “Pumasok si Noe sa arka, at dumating ang baha.” (Lucas 17:26, 27) Ito ang pinakamatibay na ebidensiya. Bakit?

Nasa langit si Jesus bago siya pumarito sa lupa. (Juan 8:58) Nasaksihan niya ang pagtatayo ng arka; nakita niya ang Baha. Ngayon, aling ebidensiya ang mas kapani-paniwala sa iyo? Ang patotoo mula kay Jesus na nakasaksi mismo sa Baha at napatunayang mapagkakatiwalaan at Anak ng Diyos? O ang napakaliit na tsansang matagpuan ng mga manggagalugad ang ilang sinaunang piraso ng kahoy sa nagyeyelong taluktok ng bundok? Kung isasaalang-alang iyan, matibay nang ebidensiya ito na talaga ngang umiral ang arka ni Noe.

[Talababa]

[Blurb sa pahina 13]

May matibay bang ebidensiya na totoo ang ulat ng Bibliya tungkol sa Baha?

[Blurb sa pahina 14]

Malinaw na sinabi ni Jesu-Kristo: “Pumasok si Noe sa arka, at dumating ang baha”