NATUTUWA ang mga Saksi ni Jehova na ipakipag-usap ang Bibliya sa iba. May gusto ka bang malaman tungkol sa Bibliya? May tanong ka ba hinggil sa mga paniniwala o gawain ng mga Saksi ni Jehova? Kung oo, huwag kang mahiyang magtanong kapag may nakausap kang Saksi. Matutuwa siyang sagutin ang mga tanong mo.

Ang sumusunod ay ang karaniwang eksena kapag nakikipag-usap sa iba ang isang Saksi ni Jehova. Kunwari, si Karen ang Saksing dumadalaw kay Samantha.

Totoo Bang Hindi Kayo Naniniwala kay Jesus?

Samantha: Sabi ng pastor namin hindi raw naniniwala ang mga Saksi ni Jehova kay Jesus. Totoo ba ’yon?

Karen: Naniniwala kami kay Jesus. Ang totoo, naniniwala kami na para maligtas ang isa, dapat siyang manampalataya kay Jesus.

Samantha: ’Yan din ang paniniwala ko.

Karen: Pareho pala tayo. Ako nga pala si Karen. Ikaw?

Samantha: Samantha.

Karen: Nagtataka ka siguro kung bakit sinasabi ng iba na hindi kami naniniwala kay Jesus?

Samantha: Bakit nga ba?

Karen: Alam mo Samantha, ang totoo, napakalaki ng pananampalataya ng mga Saksi ni Jehova kay Jesus. Pero hindi lahat ng sinasabi ng mga tao tungkol sa kaniya ay pinaniniwalaan namin.

Samantha: Gaya ng ano?

Karen: Sinasabi ng iba na si Jesus ay isa lang mabuting tao. Pero hindi kami sang-ayon d’yan.

Samantha: Ako rin.

Karen: Pareho pala tayo ng pinaniniwalaan. Isa pa, hindi rin sang-ayon ang mga Saksi ni Jehova sa mga turong salungat sa sinabi mismo ni Jesus tungkol sa kaugnayan niya sa Ama.

Samantha: Ano’ng ibig mong sabihin?

Karen: Maraming relihiyon ang nagtuturo na si Jesus ang Diyos. ’Yan din ba ang itinuturo sa inyo?

Samantha: Oo, sabi ng pastor namin, ang Diyos at si Jesus ay iisa.

Karen: Para malaman natin ang totoo tungkol kay Jesus, ’di ba mas maganda kung pag-aaralan natin mismo kung ano ang sinabi ni Jesus tungkol sa kaniya?

Samantha: Tama.

Ano ang Sinabi ni Jesus?

Karen: Tingnan natin ang isang teksto sa Bibliya na puwedeng makatulong sa atin. Pansinin mo ang sinabi ni Jesus sa Juan 6:38: “Bumaba ako mula sa langit upang gawin, hindi ang kalooban ko, kundi ang kalooban niya na nagsugo sa akin.” Kung si Jesus ang Diyos, ’di ba parang nakakalito ang tekstong ito?

 Samantha: Ano’ng ibig mong sabihin?

Karen: Hindi ba sinabi ni Jesus na bumaba siya mula sa langit para gawin hindi ang kaniyang sariling kalooban?

Samantha: Oo, sinabi niya na bumaba siya para gawin ang kalooban ng nagsugo sa kaniya.

Karen: Tama. Kaya kung si Jesus ang Diyos, sino ang nagsugo sa kaniya mula sa langit? At bakit ang kalooban ng Isang iyon ang ginawa niya?

Samantha: Okey, pero isang teksto lang iyan.

Karen: O sige, tingnan naman natin ang sinabi ni Jesus sa Juan 7:16. Puwedeng pakibasa mo.

Samantha: Sige. “Sumagot naman si Jesus sa kanila at nagsabi: ‘Ang itinuturo ko ay hindi sa akin, kundi sa kaniya na nagsugo sa akin.’”

Karen: Salamat. Ayon sa nabasa mo, kanino raw nanggaling ang itinuturo ni Jesus?

Samantha: Ang sabi niya, sa nagsugo sa kaniya.

Karen: Tama. Kaya bumabangon na naman ang tanong na ‘Sino ang nagsugo kay Jesus? At kanino nanggaling ang mga katotohanang itinuro n’ya?’ Hindi kaya sa Isa na nakatataas kaysa kay Jesus? Tutal, mas mataas naman talaga ang nagsugo kaysa sa isinugo.

Samantha: Oo nga ’no! Alam mo, ngayon ko lang nabasa ’yan.

Karen: Tingnan pa natin ang sinabi ni Jesus sa Juan 14:28: “Narinig ninyo na sinabi ko sa inyo, Aalis ako at paririto akong muli sa inyo. Kung iniibig ninyo ako, magsasaya kayo na ako ay paroroon sa Ama, sapagkat ang Ama ay mas dakila kaysa sa akin.” Batay sa tekstong ito, ano sa palagay mo ang tingin ni Jesus sa sarili niya kung ikukumpara sa Ama?

Samantha: Ang sabi niya, ang Ama ay mas dakila kaysa sa kaniya. Kaya sa palagay ko, itinuturing niyang mas mataas sa kaniya ang Diyos.

Karen: Tama Samantha. Pansinin mo naman ngayon ang sinabi ni Jesus sa kaniyang mga alagad na nakaulat sa Mateo 28:18: “Ang lahat ng awtoridad ay ibinigay na sa akin sa langit at sa lupa.” Sinabi ba rito ni Jesus na dati na niyang taglay ang lahat ng awtoridad?

Samantha: Hindi, ibinigay raw iyon sa kaniya.

Karen: Kaya kung si Jesus ang Diyos, ano pang karagdagang awtoridad ang ibibigay sa kaniya? At sino ang magbibigay sa kaniya nito?

Samantha: Hmm . . . maganda ngang pag-isipan ’yan.

Sino ang Kinakausap Niya?

Karen: May iba pang teksto na magiging nakakalito rin kung si Jesus nga ang Diyos.

Samantha: Ano ’yon?

Karen: Ang ulat ng Lucas 3:21, 22 tungkol sa bautismo ni Jesus. Puwedeng pakibasa mo?

Samantha: “Nang mabautismuhan ang lahat ng mga tao, si Jesus din ay binautismuhan at, habang nananalangin siya, ang langit ay nabuksan at ang banal na espiritu sa hugis ng katawang tulad ng isang kalapati ay bumaba sa kaniya, at isang tinig ang nanggaling sa langit: ‘Ikaw ang aking Anak, ang minamahal; ikaw ay aking sinang-ayunan.’”

Karen: Napansin mo ba kung ano ang ginagawa ni Jesus nang bautismuhan siya?

Samantha: Nananalangin.

Karen: Ngayon ang tanong ay, ‘Kung si Jesus ang Diyos, kanino kaya siya nananalangin?’

Samantha: Oo nga ’no. Itatanong ko ’yan sa pastor namin.

Karen: Isa pa, ’di ba nang umahon si Jesus sa tubig, may nagsalita mula sa langit? Ano’ng sinabi nung nagsalita?

Samantha: Sinabi Niya na si Jesus ang Kaniyang Anak, ang minamahal Niya at sinasang-ayunan.

Karen: Tama. Kaya kung si Jesus talaga ang Diyos, sino ang nagsalitang ’yon mula sa langit?

Samantha: Oo nga ’no.

 Bakit “Ama” at “Anak”?

Karen: Heto pa ang isang puwede mong pag-isipan Samantha: Nabasa natin na tinawag ni Jesus ang Diyos bilang Ama niya sa langit. At nang bautismuhan naman si Jesus, tinukoy siya ng isang tinig mula sa langit bilang Kaniyang Anak. Sa katunayan, tinutukoy mismo ni Jesus ang kaniyang sarili bilang Anak ng Diyos. Ngayon, kung gusto mong ituro sa akin na magkapantay ang dalawang indibiduwal sa pamilya, paano mo kaya sila ilalarawan?

Samantha: Magkapatid.

Karen: Tama, o baka kambal pa nga. Pero tinukoy ni Jesus ang Diyos bilang Ama at tinukoy naman niya ang kaniyang sarili bilang Anak. Sa tingin mo, ano kaya ang gustong ipahiwatig ni Jesus?

Samantha: Na may isang nakatatanda at mas may awtoridad kaysa sa kaniya.

Karen: Tama Samantha. Pag-isipan mo: Para ipakitang magkapantay ang dalawang indibiduwal sa pamilya, naisip mo kanina ang magkapatid o kambal. Kung si Jesus talaga ang Diyos, hindi kaya niya maiisip bilang Dakilang Guro ang ilustrasyon ding iyon​—o baka isang mas malinaw na halimbawa pa nga ang gamitin niya?

Samantha: Oo nga ’no.

Karen: Pero sa halip, ginamit niya ang mga terminong “Ama” at “Anak” para ilarawan ang kaugnayan niya sa Diyos.

Samantha: May punto ka d’yan.

Ano ang Itinuro ng Unang mga Tagasunod ni Jesus?

Karen: Pero bago ako umalis Samantha, isang bagay pa ang gusto ko sanang mapag-isipan mo.

Samantha: Ano ’yon?

Karen: Kung si Jesus talaga ang Diyos, ’di ba aasahan natin na iyan din ang ituturo ng kaniyang mga alagad?

Samantha: May katuwiran ka.

Karen: Pero, wala tayong mababasa sa Bibliya na ganiyan ang itinuro nila. Sa halip, pansinin mo ang isinulat ng isa sa unang mga tagasunod ni Jesus na si apostol Pablo. Sa Filipos 2:9, sinabi niya kung ano ang ginawa ng Diyos pagkatapos buhaying-muli si Jesus: “Dinakila siya [si Jesus] ng Diyos sa isang nakatataas na posisyon at may-kabaitang ibinigay sa kaniya ang pangalang nakahihigit sa lahat ng iba pang pangalan.” Batay sa tekstong ito, ano ang ginawa ng Diyos kay Jesus?

Samantha: Ang sabi rito, dinakila ng Diyos si Jesus sa isang nakatataas na posisyon.

Karen: Tama. Kaya kung si Jesus ay kapantay ng Diyos bago siya mamatay at pagkatapos ay dinakila siya ng Diyos sa isang nakatataas na posisyon, lalabas na magiging mas mataas pa siya sa Diyos? Posible ba ’yon?

Samantha: Hindi nga.

Karen: Kaya batay sa mga napag-usapan natin, itinuturo ba ng Bibliya na si Jesus ang Diyos?

Samantha: Parang hindi nga. Ang sabi ng Bibliya, siya ay Anak ng Diyos.

Karen: Ganun nga Samantha. At bilang mga Saksi ni Jehova, napakalaki ng paggalang namin kay Jesus. Naniniwala kami na dahil sa kamatayan niya bilang ang ipinangakong Mesiyas, naging posible na maligtas ang lahat ng tapat na tao.

Samantha: Naniniwala rin ako diyan.

Karen: Pero baka maitanong mo, ‘Paano kaya natin mapahahalagahan ang pagbubuwis ni Jesus ng kaniyang buhay alang-alang sa atin?’ *

Samantha: Naisip ko nga ’yan.

Karen: Gusto ko sanang bumalik muli para mapag-usapan natin ang sagot ng Bibliya tungkol diyan. Nandito ka lang ba sa bahay sa susunod na linggo sa ganito ring oras?

Samantha: Oo.

Karen: Sige, babalik ako.

[Talababa]