Yamang lahat ng Israelita ay inapo ng isang tao, si Jacob, o Israel, sila ay “magkakapatid,” mga miyembro ng isang pamilya. Kapag nagtitipon sila para sa mga kapistahan sa Jerusalem, iyon ay ‘mabuti’ at “kaiga-igaya.” Gaya nila, nasasabik din ang maraming pamilya sa ngayon na magsama-sama at magkaroon ng ‘mabuti’ at ‘kaiga-igayang’ panahon tuwing Pasko.

Ganito ang sinasabi sa Encyclopedia of Christmas and New Year’s Celebrations: “Ang maliliit na isyung bumabangon sa gitna ng pamilya sa loob ng isang taon ay maaaring maging malalaking problema kapag nagkakasama-sama sila sa ganitong mga okasyon.”

“Patuloy na magbayad ng kaukulang kagantihan sa [inyong] mga magulang at mga lolo’t lola.” (1 Timoteo 5:4) Hangga’t maaari, regular na dumalaw sa iyong mga kapamilya. Malayo man ang iyong mga kamag-anak, puwede mo pa rin silang makausap. Bakit hindi mo sila sulatan, tawagan sa telepono, padalhan ng e-mail, o kausapin online? Kapag regular kayong nag-uusap, naiiwasan ang mga di-pagkakaunawaan.

“Nasisikipan kayo sa inyong sariling magiliw na pagmamahal. . . . Magpalawak.” (2 Corinto 6:12, 13) Kapag minsan lang sa isang taon nagkikita-kita ang magkakamag-anak, nagiging parang hindi na sila magkakakilala​—lalo na ang mga bata. Ang ilang bata ay naaasiwang makihalubilo sa kanilang mga lolo’t lola o malalayong kamag-anak. Kaya himukin ang iyong mga anak na “magpalawak” ng pagmamahal, maging sa mga may-edad nang kamag-anak. a Kapag ang mga bata ay regular na nakikihalubilo sa mga may-edad, nagkakaroon sila ng higit na empatiya at pagpapahalaga sa mga nakatatanda sa kanila.

“Ang salita sa tamang panahon, O anong buti!” (Kawikaan 15:23) Paano mo maiiwasang masira ng mga di-pagkakaunawaan o isyu ang relasyon ng inyong pamilya? Ang isang paraan ay ang pagpili ng “tamang panahon” para mapag-usapan ang mga dapat pag-usapan. Kapag regular na nag-uusap ang inyong pamilya, madali ninyong malalapitan ang isa’t isa para lutasin ang anumang problema at magkakaroon kayo ng ‘mabuti’ at ‘kaiga-igayang’ mga panahon ng pagsasama-sama.