Normal lang na matakot tayo sa kamatayan bilang kaaway at gumawa ng makatuwirang hakbang para ingatan ang ating buhay. (1 Corinto 15:26) Pero dahil sa di-makatuwirang takot sa kamatayan bunga ng mga kasinungalingan o pamahiin, ang mga tao ay ‘napapasailalim sa pagkaalipin sa buong buhay nila.’ (Hebreo 2:15) Ang pagkaalam ng katotohanan ay magpapalaya sa iyo mula sa matinding takot sa kamatayan—takot na maaaring mag-alis ng iyong kaligayahan sa buhay.—Juan 8:32.

Ang katotohanan tungkol sa kamatayan

•   Ang mga patay ay walang anumang nalalaman. (Awit 146:4) Hindi mo kailangang matakot na pahihirapan ka pagkamatay mo, dahil inihahalintulad ng Bibliya ang kamatayan sa pagtulog.—Awit 13:3; Juan 11:11-14.

•   Hindi tayo kayang saktan ng mga patay. Kahit ang mararahas nating kaaway ay “inutil sa kamatayan.” (Kawikaan 21:16) Sinasabi ng Bibliya na “ang kanilang poot at ang kanilang paninibugho ay naglaho na.”—Eclesiastes 9:6.

•   Ang kamatayan ay hindi ang wakas ng ating pag-iral. Sa pamamagitan ng pagbuhay-muli, ibabalik ng Diyos ang buhay ng mga taong namatay.—Juan 5:28, 29; Gawa 24:15.

•   Ipinangangako ng Diyos na “hindi na magkakaroon ng kamatayan.” (Apocalipsis 21:4) Tungkol sa panahong iyon, sinasabi ng Bibliya: “Ang mga matuwid ang magmamay-ari ng lupa, at tatahan sila roon magpakailanman,” na lubusang malaya sa takot sa kamatayan.—Awit 37:29.