Oko wamboyotatɛ lɔsɛnɔ kaamɛ l’olonganyi ayɛ, ekakatanu wayotomba. Ekakatanu ɛsɔ koka ndja oma lo woho wotshikitanyi tokanyi tanyu, nsaki ndo woho wɔsanyu lɔsɛnɔ. Ekakatanu ɛmɔtshi koka ndja oma l’andja wa nkumbo ndo oma l’akambo wahanyalongamɛ.

Ndooko onyake nyayohomana l’ekakatanu, koko Bible kekɔ l’alako watɛnya woho wa mbaakandola. (Mateo 5:23, 24) Nyayeya woho wa nkandola ekakatanu lo nkamba l’atɔndɔ wa lo Bible.

KƐNƐ KETSHA BIBLE: ‘Ekɔ etena ka ntɛkɛta.’ (Undaki 3:1, 7) Sala la wolo dia ntshungola etena ka nsawola l’olonganyi ayɛ okakatanu wambotomba. Sala di’olonganyi ayɛ mbeya woho wayaokayɛ ndo kanyi yayɛ lo dikambo diakɔ. ‘Tɛɛka olonganyi ayɛ mɛtɛ’ nshi tshɛ. (Ɛfɛsɔ 4:25) Oyadi etena keyɛ la nkɛlɛ efula, ahemɛtɔ diaha nyu ndjokoma lo ta. Nkaloya dui la lotutsha koka nkimanyiya diaha ɔkɛtshanyelo anyu ndjokoma lo ta.—Tukedi 15:4; 26:20.

Kaanga hanyokani lo dikambo dimɔtshi, tookake nkɛlɛ ndo tohɛke pondjo dia wɛ pombaka nɛmiya olonganyi ayɛ ndo mbooka ngandji. (Kɔlɔsayi 4:6) Nyosale la wolo dia nkandola okakatanu kam’atombawɔ, ndo tanyotshikake nsawola kaamɛ.—Ɛfɛsɔ 4:26.

KƐNƐ KAKOKAYƐ NSALA:

• Yanga etena ka dimɛna ka nkɛtshanya dikambo diakɔ

• Naka olonganyi ayɛ mbatɛkɛta, kete sala tshɛ diaha mbohembola ɔtɛkɛta. Kooyɔtɛkɛtɛ naka nde ambomana

KƐNƐ KETSHA BIBLE: “Nyokane ngandji k’oma k’ɛse otema oko onto l’ɔnango. Lo kɛnɛ kendana la nɛmiyana, nyosha ɛnyɛlɔ.” (Rɔmɔ 12:10) Yoho yahokamɛyɛ ekɔ ohomba efula. Sala la wolo dia nshihodia kanyi y’olonganyi ayɛ, lo ‘monga la ngandji ndo l’okitshakitsha.’ (1 Petero 3:8; Jakɔba 1:19) Toongake tsho oko onto lahokamɛ. Naka kokaka, kete tshika kɛnɛ tshɛ kasalayɛ ndo hokamɛ olonganyi ayɛ la yambalo tshɛ, ndo lɔmbande dia kana nyu koka ndjosawola dui diakɔ l’ɔkɔngɔ. Naka wɛ mbɔsa olonganyi ayɛ oko ɔngɛnyi ayɛ, koko aha oko otunyi, kete wɛ ‘hatokaka nkɛlɛ esadi.’—Undaki 7:9.

KƐNƐ KAKOKAYƐ NSALA:

• Hokamɛka olonganyi ayɛ la yambalo tshɛ, oyadi kɛnɛ katande hakɔngɛnyangɛnya

• Hokamɛ kɛnɛ kalangande mbuta, koko aha ɛtɛkɛta wayokamba la nde. Eya yoho yatɛkɛta olonganyi ayɛ ndo wondjo ande wa dui

KƐNƐ KETSHA BIBLE: “Lu wehu tshe w’elimu, mbatuyalaka waho. Keli etelu k’aui atu, atotolaka untu lu wula.” (Tukedi 14:23) Aha mbɔsa tsho yɛdikɔ mbele la dikambo. Koko ekɔ ohomba nkotsha yɛdikɔ yamonyɔsa. Kɛsɔ nɔmbaka dia mbidja welo efula, koko welo akɔ mongaka l’etombelo w’amɛna. (Tukedi 10:4) Naka nyu nkamba kaamɛ oko atshukanyi, kete nyayolongola “difutu di’ololo” oma l’olimu anyu wa wolo.—Undaki 4:9.

KƐNƐ KAKOKAYƐ NSALA:

• Nyɔkɛtshanya kɛnɛ kakokanyu nsala dia nkandola okakatanu wele la nyu

• Nyɔsɛdingolake ehamelo anyu mbala la mbala