Oko wamboyeka lo biukubuku nyɛ, Bible kekɔ l’atɔndɔ efula wayookokimanyiya wɛ la nkumbo kayɛ. Jehowa nangaka dia nyu monga l’ɔngɛnɔngɛnɔ. Nde ndakaka dia naka nyu mbetsha ɔtɛmwɛlɔ ande lo dihole dia ntondo, kete ‘nde ayonyokotshɛ diangɔ dikina tshɛ.’ (Mateo 6:33) Nde kombolaka mɛtɛ dia wɛ monga ɔngɛnyi ande. Kambaka la diaaso tshɛ diakondjayɛ dia nkeketsha lɔngɛnyi la lam’asayɛ la Nzambi. Ɔsɔ ekɔ diɛsɛ dioleki woke diakoka onto nkondja.—Mateo 22:37, 38.

KƐNƐ KETSHA BIBLE: “‘Dimi layonga shɛnyu ndo nyu nyayonga anami w’apami ndo anami wa wamato,’ mbata Jehowa.” (2 Kɔrɛtɔ 6:18) Nzambi nangaka dia wɛ monga ɔngɛnyi ande w’oshika. Dɔmbɛlɔ ekɔ yoho mɔtshi yayokokimanyiya dia nsala dui sɔ. Jehowa kɔlɔmbaka dia wɛ ‘ntetemala mbɔlɔmba.’ (1 Tɛsalɔnika 5:17) Nde nomɔlomɔka dia mpokamɛ tokanyi tayɛ t’oma k’ɛse otema ndo ekiyanu ayɛ. (Filipɛ 4:6) Etena kalɔmbayɛ wɛ la nkumbo kayɛ, vɔ wayɛna dia Jehowa ekɔ onto la mɛtɛ le yɛ.

Laadiko dia nsawola la Nzambi, wɛ pombaka mbohokamɛ. Wɛ koka nsala dui sɔ lo mbekaka Ɔtɛkɛta ande ndo ekanda walembetshiya Bible. (Osambu 1:1, 2) Kanaka yimba la kɛnɛ kekayɛ. (Osambu 77:11, 12) Mpokamɛ Nzambi nɔmbaka nto dia wɛ mbɔtɔka mbala la mbala lo nsanganya y’Akristo.—Osambu 122:1-4.

Mbutɛ anto akina akambo wendana la Jehowa ekɔ yoho kina y’ohomba yakokayɛ nkeketsha diɔtɔnganelo diasayɛ la nde. Lam’ayoyotalekaka nsala dui sɔ, mbayoyoleka ndjaoka suke suke la nde.—Mateo 28:19, 20.

KƐNƐ KAKOKAYƐ NSALA:

• Yatshungolɛka etena lushi tshɛ dia mbadiaka Bible ndo nɔmbaka

• Oko wenyu nkumbo, nyetshake akambo wa lo nyuma la ntondo ka tɔkɛnyɔ ndo ɔkɔkwɛlɔ wa demba

KƐNƐ KETSHA BIBLE: “Nyoyasukanya la Nzambi, ko nde ayoyasukanya la nyu.” (Jakɔba 4:8) Nyu pombaka monga l’ekongelo ndo kiyelaka mbala la mbala l’ɔtɛmwɛlɔ wa lo nkumbo. (Etatelu 18:19) Ekɔ akambo akina wahombanyu nsala. Nzambi pombaka monga l’atei wa lɔsɛnɔ lanyu la lushi la lushi. Keketsha diɔtɔnganelo dia lam’asa ase nkumbo kayɛ la Nzambi lo mbatɛka awui wendana la nde “lam’udjashiye lu luudu laye, ndu lam’atayakendakenda lu mbuka, lam’etamiye, ndu lam’etoye.” (Euhwelu k’Elembe 6:6, 7) Yadjɛ oyango wele oko wɔnɛ wakayadjɛ Jashua lakate ate: ‘Dimi la wa lo luudu lami tayokambɛka Jehowa.’—Jashua 24:15.

KƐNƐ KAKOKANYU NSALA:

• Nyonge l’ekongelo ka wekelo kendana la ehomba w’ose nkumbo tshɛ