Jehowa tɔlɔmbaka dia sho ‘nanga kɔlamelo.’ (Mika 6:8) Dui sɔ diekɔ ohomba efula lo diwala dianyu nɛ dia naka nyu bu la kɔlamelo, kete hanyotɛkanɛ etema. Ndo ekɔ ohomba nyu mbɛkanɛ etema dia ngandji kanyu mpama.

Ɛlɔ kɛnɛ, elonganyi efula waya bu la kɔlamelo lo diwala. Dia nkokɛ diwala dianyu, nyu pombaka ndjashikikɛ dia nsala akambo ahende.

KƐNƐ KETSHA BIBLE: “Shikikɛ akambo woleki ohomba.” (Filipɛ 1:10) Diwala diayɛ ekɔ dui dimɔtshi dioleki ohomba lo lɔsɛnɔ layɛ. Diɔ pombaka mbidjama lo dihole dia ntondo.

Jehowa nangaka dia wɛ mbidja olonganyi ayɛ yimba ndo ‘ngɛnangɛna la lɔsɛnɔ’ kaamɛ la nde. (Undaki 9:9) Nde mɛnyaka hwe dia wɛ hahombe pondjo minya olonganyi ayɛ yimba, koko nyu pombaka nyanga toho ta ngɛnyangɛnyana. (1 Kɔrɛtɔ 10:24) Sala di’olonganyi ayɛ ndjaoka dia wɛ ekɔ l’ohomba ande ndo mbolangaka.

KƐNƐ KAKOKAYƐ NSALA:

• Sala tshɛ dia mbetshaka wenya efula kaamɛ l’olonganyi ayɛ ndo djakande yimba

• Salaka akambo lo wahɔ anyu nyu tshɛ, koko aha wayɛ hita

KƐNƐ KETSHA BIBLE: “Onto tshɛ latetemala menda womoto polo lo mbokombola, nde amboshila nsala la nde loseka l’otema.” (Mateo 5:28) Naka onto ɔmɔtshi tetemalaka nkanyiya akambo wa mindo, kete lo yoho mɔtshi, nde bu la kɔlamelo le olonganyi ande.

Jehowa kɔlɔmbaka dia wɛ “nama utema aye.” (Tukedi 4:23; Jeremiya 17:9) Dia nsala dui sɔ, wɛ pombaka nama washo ayɛ. (Mateo 5:29, 30) Yela ɛnyɛlɔ ka Jɔbɔ lakadje la washo ande sheke diaha nkɔmiya womoto okina. (Jobo 31:1) Yashikikɛ diaha menda esato wɛnyawɔ anto etakataka. Ndo nto, sala tshɛ dia mbewɔ dia mɛnyanya ngandji l’onto okina lele bu olonganyi ayɛ.

KƐNƐ KAKOKAYƐ NSALA:

• Ɛnya anto tshɛ hwe dia wɛ ekɔ la kɔlamelo le olonganyi ayɛ

• Kotshaka nsaki y’olonganyi ayɛ ndo komiya yoho tshɛ ya lɔngɛnyi yakoka ndjonga la shɛngiya ya kɔlɔ lo diɔtɔnganelo dia lam’asayɛ l’olonganyi ayɛ