Eotwelo k’ɔna mongaka dui di’ɔngɛnɔngɛnɔ efula le ambutshi akɔ ahende. Koko oko wenyu ambutshi w’eyoyo, nyu koka ndjokashimɔ dia wenya ndo wolo anyu wayetaka efula dia nkokɛ ɔna. Engondo wetshaka wenya ndo etshikitanu wayosalema wayonyɔlɔmba akambo efula. Nyu akɔ ahende pombaka nsala etshikitanu dia nkokɛ ɔnanyu ndo diwala dianyu. Ngande wakoka Bible nyokimanyiya dia nkandola ekakatanu ɛsɔ?

KƐNƐ KETSHA BIBLE: “Ngandji ekɔ la solo dia lotutsha ndo ɔlɔlɔ.” Ndo nto, ngandji “hayange wahɔ ande hita, hoke nkɛlɛ esadi.” (1 Kɔrɛtɔ 13:4, 5) Oko weyɛ mama ka nkumbo k’oyoyo, wɛ pombaka ndjasha efula dia nkokɛ ɔnayɛ. Koko omɛyɛ koka ndjaoka oko wɛ hayowodja yimba, diakɔ diele tohɛke dia nde lawɔ nangaka dia wɛ ndjasha le nde. La solo dia lotutsha ndo la kɛtshi tshɛ, wɛ pombaka mbokimanyiya dia nde ndjaoka dia nde ekɔ ohomba ndo ɔnɛ ndo nde mbahomba nkimanyiya lo wodielo w’ɔna.

“Nyu waomi, nyotetemale mbidjasɛ la wadɛnyu lo ndjela ewo.” (1 Petero 3:7) Wɛ pombaka nshihodia dia wadɛyɛ ayetshaka wenya efula ndo ayokambaka la wolo ande lo dikambo di’ɔna. Nde ekɔ l’ɔkɛndɛ w’oyoyo ndo ɔkɛndɛ akɔ koka mbɔlɛndja kana mbɔkɔmɔla demba. Lo tena dimɔtshi, nde koka kaanga koomalɛ, koko sala la wolo dia ntshikala ki nɛ dia “one lahatukaka kele esadi, ambuleka kanga wulu ololo.” (Tukedi 16:32) Onga la shɛnɔdi ndo shande ekimanyielo kende l’ohomba.—Tukedi 14:29.

KƐNƐ KAKOKAYƐ NSALA:

• Ombutshi wa pami: Kimanyiya wadɛyɛ dia nkokɛ ɔnanyu, kaanga la kati k’otsho. Shikikɛ yɛdikɔ ya wenya yahombayɛ mbetshaka lo elimu ekina l’oyango wa wɛ mbetshaka wenya efula kaamɛ la wadɛyɛ ndo l’ɔnanyu

• Ombutshi wa womoto: Etena kakokimanyiya omɛyɛ dia nkokɛ ɔna, etawɔ ekimanyielo kande. Naka nde heye nsala dui dimɔtshi dimɛna, towɔnyɔlake, koko ɛnyande l’ɔkɔmi tshɛ woho wakokande disala

KƐNƐ KETSHA BIBLE: “Vo wayuyala dimba otoi.” (Etatelu 2:24) Kaanga mbayanyu l’ose nkumbo l’oyoyo lo nkumbo kanyu, ohɔ dia wɛ l’olonganyi ayɛ nyekɔ paka “dimba otoi.” Nyosale la wolo dia ntetemala nkokɛ diɔtɔnganelo dia lam’asanyu.

Wadi, onga la lowando l’efula lo ekimanyielo ndo l’osukɔ w’omɛyɛ. Ɛtɛkɛta ayɛ wa lowando koka monga tshondo ‘y’ɔkɔnwɛlɔ.’ (Tukedi 12:18) Omi, tɛ wadɛyɛ woho wolangayɛ ndo wawɔsayɛ la nɛmɔ. Andolakande lo woho wayashande dia nkokɛ nkumbo kanyu.—Tukedi 31:10, 28.

“Onto l’onto atetemale nyanga wahɔ w’onto okina, koko aha wahɔ ande hita.” (1 Kɔrɛtɔ 10:24) Salɛka olonganyi ayɛ kɛnɛ kele ɔlɔlɔ nshi tshɛ. Oko wenyu atshukanyi, nyotshungolake etena ka tɛkɛtaka, sawolaka ndo mbishanaka lotui. Toongake onyishi lo kɛnɛ kendana la nkotshɛ olonganyi ayɛ nsaki yande ya dieyanelo. Djaka yimba lo ehomba w’olonganyi ayɛ. Bible mbutaka ɔnɛ: “Tanyotonake mbeyana lam’asanyu.” (1 Kɔrɛtɔ 7:3-5) Diakɔ diele, nyɔkɛtshanyake dui sɔ lam’asanyu hwe hwe. Solo diayɛ dia lotutsha ndo eokelo kayɛ ka dimɛna ayokeketsha diɔtɔnganelo dia lam’asanyu.

KƐNƐ KAKOKAYƐ NSALA:

• Eya dia wɛ pombaka mbetshaka wenya kaamɛ l’olonganyi ayɛ

• Salaka tokambokambo ta totshitshɛ takoka olonganyi ayɛ mɛna dia wɛ mbolangaka ɛnyɛlɔ, mbotomɛ mesajɛ kana mbokashimolaka la tangangɔ ta totshitshɛ

KƐNƐ KETSHA BIBLE: “Oma ko kiɛndakɛnda yayɛ, wɛ mbeyaka efundelo w’ekila wakoka kosha lomba layokokimanyiya dia nkondja panda.” (2 Timɔte 3:15) Nyokongɛ kɛnɛ kakokanyu nsala dia mbetshaka ɔnanyu. Nde ekɔ l’akoka wa mbeka, kaanga la ntondo ka nde mbotɔ. Kaanga etena kekende l’otema, ɔnayɛ koka mbeya dui diayɛ ndo nshihodia nsaki yayɛ. Adɛɛkande Bible etena kekende l’otema. Kaanga mbahandatoshihodia kɛnɛ kadiayɛ, dui sɔ ayowokimanyiya dia nde ndjɔngɛnangɛna wadielo etena kayondola.

Totake pondjo ɔnɛ ɔnami hakoke mboka etena katɛkɛtami akambo wendana la Nzambi l’ɔtɛ wekende kiɛndakɛnda. Sala dia nde kookaka wonya walɔmbayɛ Jehowa. (Euhwelu k’Elembe 11:19) Kaanga etena kakɛnyanyu kaamɛ, tɛkɛtaka awui wendana la diangɔ diakatonge Nzambi. (Osambu 78:3, 4) Etena kayoyola ɔnayɛ, nde ayoshihodia ngandji kokayɛ Jehowa ndo ayosala dia nde lawɔ mbooka ngandji.

KƐNƐ KAKOKAYƐ NSALA:

• Lɔmba Jehowa dia nde kosha lomba dia wɛ mbodia ɔnayɛ

• Tɛɛka ɔnayɛ ɛtɛkɛta ndo tokanyi toleki ohomba, lo tikalolɛka mbala la mbala dia nde ntatɛ mbeka oma ko kiɛndakɛnda yande