TSHAPITA 35

Ngande wakokami nkoma ɔngɛnyi wa Nzambi?

Mpokoso kɛmɔtshi kakakomɛ Jeremy kakayookonya dia mbɔsa lɔngɛnyi lasande la Nzambi la nɛmɔ. Nde mbutaka ate: “Lam’akimi l’ɛnɔnyi 12, paka akalawɔ nkumbo kaso. L’otsho ɔmɔtshi wakamalɔmbaka, lakalɔmbɛ Jehowa dia nde nsala dia papa nkalola la ngelo.”

Etena kakandashisha elongamelo, Jeremy akatatɛ la mbadia Bible. Lam’akandakome lo Osambo 10:14, nde akanandema efula. Divɛsa sɔ mbutaka lo dikambo dia Jehowa ɔnɛ: “Le yɛ kɛɛlɛ ose paa; wɛ ekɔ okimanyedi w’ɔna etshike.” Jeremy mbutaka ate: “Lakoke dia Jehowa aki lo ntɛkɛta la mi ndo aki lo mbutɛmi dia nde ekɔ okimanyedi ami, nde mbaki Papa kami. Shi nde mbaki papa koleki dimɛna kakamakondja?”

OYADI wɛ ekɔ la ntondo ka dikambo diafɔna la nɛ diaki la Jeremy kana bu, Bible mɛnyaka dia Jehowa nangaka dia wɛ monga ɔngɛnyi ande. Diakɔ diatatɔ ɔnɛ: “Nyoyasukanya la Nzambi, ko nde ayoyasukanya la nyu.” (Jakɔba 4:8) Ohokanyiya kɛnɛ kalembetshiya ɛtɛkɛta ɛsɔ: Kaanga mbahayakoke mbɛna, ndo kaanga mbeyɛ bu osekande, Jehowa Nzambi ekɔ lo kɔlɔmba dia wɛ monga ɔngɛnyi ande!

Koko lɔngɛnyi la la Nzambi ayokɔlɔmba dia mbidja welo. Tɔshi ɛnyɛlɔ: Naka wɛ ekɔ la etombatomba kɛmɔtshi la ngelo, kete wɛ mbeyaka ɔnɛ tɔ hola lo twamɛ. Dia tɔ fukanɛ, wɛ pombaka kitɛka ashi mbala la mbala ndo kikitsha kana kionɛ lo dihole diakokatɔ mbola dimɛna. Ngasɔ mbediɔ ndo lo dikambo dia lɔngɛnyi la la Nzambi. Akokayɛ nsala dia lɔngɛnyi lɔsɔ nkeketala?

Ohomba wa wekelo

Lɔngɛnyi mendanaka la nsawola lo toho tohende: mpokamɛ ndo nsawola. Ngasɔ mbediɔ ndo lo lɔngɛnyi la la Nzambi. Mbadia ndo mbeka Bible mbele yoho yahokamɛso kɛnɛ katotɛ Nzambi.​—Osambo 1:2, 3.

Koko, mbeyaka monga ko mbeka bu dui dialekayɛ nanga. Ɛlɔngɔlɔngɔ efula ndekaka nanga menda televiziɔ, nkɛnya tɔkɛnyɔ ta vidɛo kana mbetsha wenya l’angɛnyi awɔ. Koko, naka wɛ nangaka monga ɔngɛnyi wa Nzambi, kete ndooko mboka ka hiembola. Wɛ pombaka mbohokamɛ lo mbekaka Ɔtɛkɛta ande.

Koko, tokake wɔma. Mbeka Bible bu dui dia wolo. Wɛ kokaka nanga wekelo akɔ, kaanga naka wɛ fɔnyaka dia wɛ bu l’atei w’anto walanga wekelo. Dui dia ntondo diahombayɛ nsala ele nama etena dikambo dia wekelo wa Bible. Osekaseka wekɛwɔ Lais mbutaka ate: “Dimi lekɔ la ekongelo. Dui dia ntondo diasalami lushi tshɛ kam’etɔmi la pindju ele dimi mbadiaka tshapita ɔtɔi ya lo Bible.” Maria, lele l’ɛnɔnyi 15, ndjakongɛka woho okina. Nde mbutaka ate: “Dimi mbadiaka avɛsa amɔtshi wa lo Bible la dikɔlɔ tshɛ ntondo ka dimi ndala.”

Ntondo ka wɛ ntatɛ ekongelo kayɛ ka wekelo, enda  kiombo. Oma laasɔ, funda l’ɛse etena kayoyetshaka kaanga minitɛ 30 kana ndekana dia mbekaka Ɔtɛkɛta wa Nzambi.

․․․․․

Sala ekongelo ka wɛ mbekaka ekɔ tsho etatelo. Kam’ayoyotatɛ, wɛ koka ndjɛna diaha tena tshɛ mbele mbadia Bible ekɔ dui dia wɔdu. Wɛ koka ndjetawɔ kɛnɛ kakate Jezreel lele l’ɛnɔnyi 11, lakate hwe ate: “Avɛsa amɔtshi wa lo Bible wekɔ wolo ndo hokɛma.” Naka ngasɔ mbokayɛ, kete tohekɔke. Tena tshɛ ɔsaka wekelo wa Bible oko etena kɔsayɛ dia mpokamɛ Jehowa Nzambi, Ɔngɛnyi ayɛ. L’ekomelo ka wekelo wa Bible tshɛ, wɛ ayɔngɛnangɛna efula l’ɔtɛ wakayɔshi yɛdikɔ ya mbosala!

Dɔmbɛlɔ diekɔ ohomba efula

Dɔmbɛlɔ diekɔ yoho yasawolaso la Nzambi. Shi ɔsɔ ekɔ woshasha wa dimɛna efula! Wɛ koka nsawola la Jehowa Nzambi etena tshɛ, la yanyi kana l’otsho. Nde ekɔ tena tshɛ suke dia kohokamɛ. Kɛnɛ koleki ele, nde nangaka mboka kɛnɛ kalangayɛ mbotɛ. Diakɔ diakokeketsha Bible: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.”​—Filipɛ 4:6.

Oko wadiɛnya divɛsa sɔ, ekɔ awui efula wakokayɛ nsawola la Jehowa. L’atei w’awui akɔ mbele ndo ekakatanu ndo ekiyanu ayɛ. Ndo nto awui weyɛ la lowando. Nɛ dia, naka ɔngɛnyi ayɛ ambokosalɛ dui dia dimɛna, shi wɛ towoshaka losaka? Shaka Jehowa losaka, nde ekɔ lo kosalɛ akambo w’amɛna efula ndeka kɛnɛ tshɛ kakoka ɔngɛnyi ayɛ okina kosalɛ.​—Osambo 106:1.

Funda lanɛ l’ɛse awui amɔtshi weyɛ la lowando le Jehowa.

․․․․․

Aha la taamu wɛ mongaka la wɔma ndo l’ekiyanu mbala la mbala. Osambo 55:22 mbutaka ɔnɛ: “Kitsha wotsho ayɛ le Jehowa, ko nde ayokosukɛ. Nde hetawɔki pondjo dia onto ɔlɔlɔ nkɔ.”

Funda lanɛ l’ɛse awui wakokiyanya walangayɛ nɔmba lo dikambo diawɔ.

․․․․․

Awui wakakokomɛ

Lo lɔngɛnyi lasayɛ la Nzambi ekɔ dikambo dikina diahayahombe minya yimba. Omembi w’esambo Davidɛ akafunde ate: “Nyɔlɛtɛ ko nyayɛna dia Jehowa ekɔ ɔlɔlɔ.” (Osambo 34:8) Etena kakafundaka Davidɛ Osambo 34, nde aki oma la mpomana la dikambo dimɔtshi dia lonyangu. Nde akatalawɔka nkumekanga Saolo laki ondjakanyi wa mamba, ɔsɔ aki ohemba wa wolo efula. Oma laasɔ, nde akahombe nyanga eshamelo paka laka atunyi ande w’ase Filistiya. Oko wakandɛnyi dia wayanga mbodiaka, Davidɛ akasale oko nde ekɔ kanga dadi ndo kɛsɔ mbakokimanyiya dia nde ndawɔ.​—1 Samuɛlɛ 21:10-15.

Davidɛ kombuta dia oma lo diewo diande mbakandakondja woho wa mpandɔ. Koko, nde akasha Jehowa lotombo. L’etatelo k’osambo woshidiso la diko, nde akafunde ate: “Dimi lakambola Jehowa kanyi, ko nde akankadimola. Nde akantshungola oma lo wɔma ami tshɛ.” (Osambo 34:4) Lo menda awui wakokomɛ, Davidɛ akakoke nkeketsha anto akina ate: “Nyɔlɛtɛ ko nyayɛna dia Jehowa ekɔ ɔlɔlɔ.” *

Onde wɛ mbohɔka dui dimɔtshi diakakokomɛ lo lɔsɛnɔ layɛ diɛnya dia Jehowa kokokɛka? Naka ngasɔ, kete fundadiɔ lanɛ l’ɛse. Aha paka dui dimɔtshi dia laande. Hemba nkanyiya kaanga ɛlɔlɔ wa totshitshɛ wakondjayɛ lushi tshɛ, wele ondo ɛmɔtshi wɛ handje ndo yimba.

․․․․․

Onde ambutshi ayɛ wakaketsha awui wendana la Bible. Naka ngasɔ, kete ɔsɔ ekɔ ɔtshɔkɔ ɔmɔtshi. Koko, wɛ pombaka mbɔtɔ lɔngɛnyi wɛmɛ la Nzambi. Naka wɛ atasale dui sɔ, kete kamba l’awui wa lo tshapita nyɛ dia ntatɛ nsala dui sɔ. Jehowa ayɔtshɔkɔla welo ayɛ. Bible mbutaka ɔnɛ: “Nyotetemale nɔmba, ko wayonyosha; nyotetemale nyanga, ko nyayotana.”​—Mateo 7:7.

ADIA AWUI EFULA WENDANA LA DUI SƆ LO TSHAPITA 38 NDO 39, VƆLUMƐ 1

LO TSHAPITA YAYELA

Onde wɛ mbokaka wolo mbitɛ anto akina awui wendana la Nzambi? Eka woho wa mamɛ dietawɔ diayɛ.

[Nɔte ka l’ɛse ka dikatshi]

DIVƐSA DIOLEKI OHOMBA

“Ɔngɛnɔngɛnɔ le wanɛ weya ehomba awɔ wa lo nyuma.”​—Mateo 5:3.

DAKO

Adia tsho ndjɛkɛ nyɛi ya Bible lushi, ko wɛ ayoshidiya mbadia Bible k’otondo l’ɔkɔngɔ w’ɔnɔnyi ɔtɔi.

ONDE WƐ AKEYAKA . . .

Woho weyɛ lo mbadia dibuku nɛ ndo weyɛ lo nkamba l’alako wa lɔkɔ wotumbi oma lo Bible mɛnyaka dia Jehowa ndjashaka le yɛ.​—Joani 6:44.

KƐNƐ KAYOMOSALA!

Dia nkondja wahɔ efula oma lo wekelo ami wa Bible, dimi layo ․․․․․

Dia dimi nɔmbaka mbala la mbala, dimi layo ․․․․․

Kakɔna kalangami mimbola ombutshi kana ambutshi ami lo dikambo nɛ ․․․․․

NAA KANYI YAYƐ?

● Ngande wakokayɛ nkonya wekelo wa Bible w’onto ndamɛ dui di’ɔngɛnɔngɛnɔ efula?

● Lande na kalanga Jehowa mpokamɛ alɔmbɛlɔ w’anto wele keema kokele?

● Ngande wakokayɛ ndowanya alɔmbɛlɔ ayɛ?

[Efundelo wa l’etei w’odingɔ]

“Etena kakimi dikɛnda, lakataka awui akɔ waamɛ lo alɔmbɛlɔ ami. L’etena kɛnɛ dimi losala la wolo dia nɔmba lo dikambo di’awui w’amɛna ndo wa kɔlɔ wakakome lo lushi. Oko wele nshi hiende hayokoke mfɔna tshɛ lo tshɛ, dui sɔ konyakami diaha mbutaka awui akɔ waamɛ lo alɔmbɛlɔ ami.”​—Eve

[Kiombo/​Osato]

 Sɛdingola Bible kayɛ

1. Sɔna ɔkɔndɔ ɔmɔtshi wa lo Bible wangɛnangɛnayɛ mbadia. Lɔmba dia nkondja lomba dia nshihodia kɛnɛ kayangayɛ mbadia.

2. Adia ɔkɔndɔ akɔ la yambalo tshɛ. Tadiake lowango lowango. Etena kadiayɛ, nkamba la dikoka diayɛ dia nkanyiya. Kamba l’awoki ayɛ lo yɛdikɔ yakokayɛ nsala dui sɔ: Onga oko onto lɛɛna kɛnɛ keta, oko onto looka awui w’anto, oko onto looka woho wapɛpa hiɛlɛlɛ, oko onto lalɛta mbo ya ndɛ, ndo awui akina. Onga oko onto lɛna ɔkɔndɔ wadiayɛ!

3. Kana yimba lo kɛnɛ komiyɛ la mbadia. Yaoka ambola wayela anɛ:

● Lande na kakadje Jehowa ɔkɔndɔ ɔnɛ l’Ɔtɛkɛta ande?

● Anto akɔna wa l’ɔkɔndɔ wasungana dimi mbaokoya, ndo waa na wele bɛnyɛlɔ diasha ɔhɛmwɛlɔ le mi?

● Naa wetshelo w’eshika wakokami nkondja oma lo wadielo ɔnɛ?

● Kakɔna kambetsha ɔkɔndɔ ɔnɛ lo dikambo dia Jehowa ndo lo yoho yande ya nsala akambo?

4. Sala dɔmbɛlɔ dia mondo otsha le Jehowa. Tɛnde kɛnɛ kamboyeka lo wekelo ayɛ wa Bible ndo woho wasangoyayɛ nkamba l’awui akɔna lo lɔsɛnɔ layɛ. Shaka Jehowa losaka ntena tshɛ l’ɔtɛ wa woshasha wakandakosha, mbuta ate, Ɔtɛkɛta ande w’ekila, Bible!

[Osato]

“Ɔtɛkɛta ayɛ wekɔ tala lo ekolo ami, ndo osase lo mboka kami.”​—Osambo 119:105.

[Kiombo/​Osato]

Nshikikɛ awui woleki ohomba

Onde wɛ bu l’etena ka nɔmba? Onde wɛ bu l’etena ka mbeka Bible? Mbala efula, dui sɔ nemanɛka la woho wɔlɔngiyɛ akambo wa nsala.

Hemba nsala nganɛ: Ɔsa kati kɛmɔtshi, ndo dja ave wa weke lɔkɔ. Oma laasɔ, ko wɛ ndodia kati kɛsɔ la ditshu polo l’onyɔ. Kati kayɛ kayolola la ave ndo la ditshu.

Kakianɛ, tshola diangɔ dia lo kati kɛsɔ, koko ɔsa ditshu la ave akɔ waamɛ. Mbala kɛnɛ nsala nganɛ: Lodja ditshu lo kati, ko oma laasɔ wɛ ndjodja ave lɔkɔ. Shi ave hawotonga la dihole dia mbɔtɔ? Ekɔ ngasɔ nɛ dia wɛ akadjisha ditshu lo kati ntondo.

Naa wetshelo? Bible mbutaka ɔnɛ: “Nshikikɛ akambo woleki ohomba.” (Filipɛ 1:10) Naka wɛ awui wa totshitshɛ wele oko ɔkɔkwɛlɔ wa demba lo dihole dia ntondo, kete wɛ hatonga la wenya efula wa mbetsha l’akambo woleki ohomba, mbuta akambo wa lo nyuma. Naka wɛ ndjela dako dia lo Bible nɛ, kete wɛ ayɛna dia wɛ ekɔ la wenya mbetsha l’elimu wa Diolelo ndo yema l’ɔkɔkwɛlɔ wa demba. Eelo, tshɛ nemanɛka la kɛnɛ kayoyodja ntondo lo kati!

[Osato]

L’ɛnyɛlɔ ka etombatomba kele la ngelo, lɔngɛnyi lasayɛ la Nzambi pombaka kokamɛ dia lɔ nkeketala