ONDE onto koka ntshiakala la kɔlamelo le Nzambi naka nde pembama lo yɛdikɔ yoleki tshɛ ndo naka ayɛnama diele oko okitanyiya ande hatowela ndooko wahɔ wa l’emunyi? Jɔbɔ akasha okadimwelo lo dimbola diakendanaka la nde sɔ.

Lam’aki ase Isariyɛlɛ l’Edjibito, Jɔbɔ laki owotɔ waki Abrahama, akasɛnaka l’ɛtshi ka nkɛtɛ kelamɛ nshi nyɛ ɔnɛ Arabie. L’etena kɛsɔ, andjelo wakatshumana l’olongo suke la Nzambi. Satana aki l’atei awɔ. Lo losanganya lakasalema l’olongo lɔsɔ, Jehowa akɛnya woho wayaɛkɛnde lo kɔlamelo yaki okambi ande Jɔbɔ. Nde akate dia ndooko onto la nkɛtɛ lele oko nde. Koko ondjelo wakatɔmbɔkɔ ambota dia Jɔbɔ ekɔ lo kambɛ paka nɛ dia nde ekɔ lo nongola ɛtshɔkɔ oma le nde ndo ekɔ lo kokamɛ oma le nde. Nde ambota dia naka nde nshisha tshɛ kele lande, nde ayodja Nzambi mananu.

Nzambi ambotshika dia Satana shishɛ Jɔbɔ ɔngɔnyi ande ndo anande, ko oma laasɔ yoonge yande. Oko wakinde kombeyaka ɔkɛndɛ waki la Satana lo kɛnɛ kaki lo mbokomɛ, Jɔbɔ hashihodia lande na ketawɔ Nzambi di’ehemba ɛsɔ mbokomɛ. Koko kaanga mbediɔ ngasɔ, nde hoke Nzambi ɔkɔngɔ.

Angɛnyi asato wa kashi wamboya dia ndjowembola. Etenyi ka woke ka dibuku dia lo Bible dia Jɔbɔ tɛkɛtaka di’asawo awɔ wakawayangaka mbeetawoya dia Nzambi hangɛnangɛna ekambi ande ndo hɛkɛ otema ande le wɔ. Jɔbɔ hetawɔ kɛnɛ katawɔ. L’eshikikelo tshɛ, nde ambota dia nde ayolama olowanyi ande polo lo nyɔi!

Koko Jɔbɔ amboyotakɔ yema ya mboka lo nyanga dia ndjaswɛlɛ. L’ɔkɔngɔ wa nde mpokamɛ kɛnɛ kakate ɔmɔmɔ wa l’atei awɔ, ɔlɔngɔlɔngɔ Elihu ambosha kanyi yande. Nde ambongola Jɔbɔ lo woho wakandashihodisha dia oyindjamelo wa lowandji laki Jehowa Nzambi mbele dui dioleki ohomba, oleki oyindjamelo w’onto. Nde ambongola nto la wolo tshɛ angɛnyi wa kashi waki Jɔbɔ.

Oma laasɔ, Jehowa Nzambi ambɔtɛkɛta la Jɔbɔ dia nɔngɔsɔla kanyi yande. Lo nkotola yambalo yande lo ditongami dia diambo, nde ambowosha wetshelo wendana la woho wele onto tshitshɛ lo mbɛɛdika al woke woke waki Nzambi. Jɔbɔ ambetawɔ engwelo l’okitshakitsha tshɛ. Jehowa “ekɔ la ngandji k’efula ndo la kɛtshi.” (Jakɔba 5:11) Nde ambokaloya yoonge yande ya dimɛna, ndo ambowosha ɔngɔnyi ande ndodia l’ahende ndo ambowosha diaaso dia mbota ana akina dikumi. Lo nama olowanyi ande kaanga l’atei w’ehemba wa wolo, Jɔbɔ akɛnya dia Satana ekɔ kanga kashi. Nde ambɛnya dia anto koka ntshikala la kɔlamelo le Nzambi kaanga l’atei w’ehemba.

​—Kiɔkɔ: Dibuku dia Jɔbɔ.