DIMBOLA 3
Ngande wakokami nsawola l’ambutshi ami?
KAKƆNA KOTOYOSALA?
Ohokanyiya dui nɛ: Lushi la sato l’otsho, Geoff lele l’ɛnɔnyi 17 amboshidiya elimu ande wa la ngelo ndo ekɔ suke dia tɔkɔkɔla demba. Nde ambomɛ menda televiziɔ ndo ambodjasɛ lo nkɔsa kande kalekande nanga.
Mbala kakɔ ɔtɔi, she ambɔtɔ ko ambowomalɛ.
“Geoffrey, lande na ketshayɛ wenya la menda televiziɔ etena kele wɛ mbahomba nkimanyiya kosɛyɛ la dɛvɔara diande? Kɛdi wɛ hasalaka kɛnɛ kakotɛwɔ ss!”
Geoff ambongunanguna la wondjo wa dui wakoka mbokɛma ate: “Dui sɔ diambomɛ nto.”
She amboka ko ambowotɛ ate: “Watena wotshiyɛ?”
Geoff ambokuma, amboshila dimɛku ko ambota ate: “Ndooko dui Ipa.”
She ambomala efula. Ambowotɛ ate: “Tosomboke mbutɛmi ngasɔ nto!”
Otondonga wɛ mbaki Geoff, otoyosala diaha londjo lɔsɔ mfula?
OHOKANYIYA YEMA!
Nsawola l’ambutshi ayɛ ekɔ oko nkɛndjakɛndja mutuka. Naka wɛ ambotana ɛngɔ kakoshimba dia mbeta lo mboka, wɛ ayoyanga mboka kekina.
ƐNYƐLƆ:
Osekaseka ɔmɔ welɛwɔ Leah mbutaka ate: “Dimi mongaka l’okakatanu dia nsawola la papa. Mbala mɔtshi ndjaka lasawola la nde, ko nde ombutɛ ate ‘okimwe, onde dimi mbatɛyɛ?’”
LEAH EKƆ LA ƐSƆNWƐLƆ ESATO.
-
Mpangwɛ she.
Leah ambohangwɛ she ate: “Na nyende, na dui di’ohomba! Ohokamɛ!”
-
Ntshika dia ntɛkɛta la she.
Leah ambotshika mbutɛ she dui diele la nde.
-
Nkonga etena ka dimɛna dia ndjowotɛ.
L’ɔkɔngɔ, Leah ambɔtɛkɛta la she elungi l’elungi kana amboofundɛ mukanda dia mbolembetshiya dui diele la nde.
Ɔsɔnwɛlɔ akɔna wakokayɛ nkeketsha Leah dia nde nkamba la wɔ?
TƆSƐDINGOLE YEMA: She aki Leah ekɔ la wesanu, diakɔ diende heye okakatanu wele l’ɔnande. Naka Leah nsɔna Ɔsɔnwɛlɔ A, she hatoshihodia lande na kawohangwɛnde. Mbokɛmaka dia ɔsɔnwɛlɔ ɔsɔ hosala dia she aki Leah mbidja yimba lo kɛnɛ kata ɔnande ndo hɛnya dilɛmiɛlɔ otsha le she. (Ɛfɛsɔ 6:2) Laasɔ ɔsɔnwɛlɔ ɔnɛ hawonga la wahɔ oyadi le papa kana le ɔna.
Oko wahayatetawɔ dia ɛngɔ kɛmɔtshi koshimba dia mbeta, mbakokayɛ ntana yoho kina ya nsawola l’ambutshi ayɛ
Kaanga mbele Ɔsɔnwɛlɔ B koka monga wɔdu, vɔ keema ɔsɔnwɛlɔ woleki dimɛna. Lande na? Nɛ dia, dia nkandola ekakatanu wele la nde, Leah pombaka ntɛkɛta la she ndo naka she nangaka mbokimanyiya, kete nde pombaka mbeya kɛnɛ keta lo lɔsɛnɔ lande. Mbɔlama hakandola ndooko okakatanu.
Koko la Ɔsɔnwɛlɔ C, Leah hetawɔ dia wekamu mboshimba dia nde nsawola la she. Koko nde ambɔsɔna dia vɔ ndjosawola wonya okina. Ndo naka nde nsɔna dia fundɛ she mukanda, kete Leah koka ndjaoka dimɛna.
Mfunda mukanda koka nto mbokimanyiya dia nde nkɛnɛmɔla shikaa kɛnɛ kalangande mbuta. Etena kayadia she mukanda, nde ayoshihodia kɛnɛ kakalangi ɔnande mbotɛ ndo dui sɔ koka mbokimanyiya dia nde ndeka nshihodia okakatanu wele l’ɔnande. Ɔnkɔnɛ, ɔsɔnwɛlɔ C wekɔ la wahɔ oyadi le Leah kana le papa kande. Oyadi elungi l’elungi kana lo mukanda, ɔsɔnwɛlɔ ɔnɛ ndjelaka ɔhɛmwɛlɔ wa lo Bible wata ɔnɛ: “Towese akambo wakimanyiya dia wɔladi monga.”—Rɔmɔ 14:19.
Naa ɛsɔnwɛlɔ ekina wakakoki Leah nkamba la wɔ?
Kanyiya kana wɛ koka monga l’ɔmɔtshi. Oma laasɔ kanyiya etombelo wakoka monga l’ɔsɔnwɛlɔ akɔ.
EWƆ ƐTƐKƐTA WAHOKƐMA DIMƐNA
Eya diaha mbala tshɛ mbɔtɔnɛ kɛnɛ kakayatshi la kɛnɛ kafɔnya ambutshi ayɛ ɔnɛ tɔ mbakayatshi.
ƐNYƐLƆ:
Ambutshi ayɛ wambokotɛ ɔnɛ, ele oko wɛ ekɔ la dikambo. Ko wɛ ambota ɔnɛ: “Dimi halange ntɛkɛta dia dikambo diele lami.”
Koko vɔ wamboka oko wɛ ambota ɔnɛ: “Dimi handoleke ndjaɛkɛ le nyu dia nyotɛ sheke. Layosawola l’angɛnyi ami di’okakatanu ami, koko aha nyu.”
Ohɔsa dia wɛ ekɔ l’okakatanu ko ombutshi ayɛ ambolanga kokimanyiya. Koko wɛ ambowotɛ watɛ: “Toyakiyanyake. Layokoka mbokandola dimɛ.”
-
Kakɔna kakoka ambutshi ayɛ mboka?
-
Okadimwelo akɔna woleki dimɛna wakokayɛ mbisha?
Enda ndo lo...
KƐNƐ KATA ANAYƐ WELE L'ƐNƆNYI DIKUMI L'ƐMƆTSHI
Ngande wakokami sawola l’ambutshi ami?
Ɛtshɔkɔ mbeyaka monga efula oleki ndo woho wafɔnyayɛ.
ƐLƆNGƆLƆNGƆ WEKƆ LO NDJAMBOLA
Ngande wakokami mbokana dimɛna l’ambutshi ami?
Check out five steps that can help eliminate some conflicts and reduce the intensity of ones that do happen.
ESANGELO WA LO DIBAYA
Ngande wakokami nsawola la ambutshi ami?
Ngande wakokayɛ nsawola l’ambutshi ayɛ aha la wɛ monga oko onto lahoke mposa ka ntɛkɛta?
