DIMBOLA 6
Ngande wakokami nshika tanga lo tɔsɛngiya t’asekami
KAKƆNA KOTOYOSALA?
Ohokanyiya dui nɛ: Etena kayasukana asekande ahende wa la kalasa le nde, solo dia Brian diambatɛ. Aya mbala hiende yambowɔsɛngiya lomingu lɔnɛ dia nde nnɔ mfɔka. Ɔnɛ anga monga mbala ka sato.
Ɔna pami la ntondo ambota ate:
“Wɛ ekɔ paka wɛmɛ? Layanganya kosha ɔngɛnyi.”
Nde ambɔtɔtɔmiya tshɛkɛta “ɔngɛnyi,” ambomamiya sso etena kayandatondja ɛngɔ kɛmɔtshi oma lo dibenga ndo ambotshuma Brian lonya.
Brian ambɛna dia mfɔka mbele lam’asa lohita lande la shɔha shima la oma lohita. Solo dia Brian diamboleka mbatɛ.
Brian ambota ate: “Lam’alanganyu, lamboonyotɛka nte handɔnɔ . . .”
Ɔna pami la hende amboohembola ɔtɛkɛta ate: “Paka wɛ menda atokoyonga ɔhɔdu.”
Brian ambonga la dihonga ndo ambowotɛ ɔnɛ: “Dimi bu ɔhɔdu.”
Ɔna pami la hende ambokitsha Brian lonya lo dihɛka. Nde ambowotɛ la ɔngɛnɔngɛnɔ tshɛ ate: “Olongola.”
Ɔna pami la ntondo ambosukanya mfɔka suke la elungi ka Brian ndo ambota lo hiɔtɛhɔtɛ ate: “Hatototɛ ndooko onto. Ndooko ndo onto layeya.”
Otondongaka wɛ mbaki Brian, kakɔna kotoyosala?
OHOKANYIYA YEMA!
Onde angɛnyi waki Brian wakakane lomba mɛtɛ lo kɛnɛ kasalawɔ? Onde vɔ wakɔsɛ tɛdikɔ tawɔ hita? Ondo bu. Lo mɛtɛ vɔ wakayele shɛngiya y’anto akina. Vɔ nangaka mbetawɔma le anto akina, diakɔ diele vɔ tshikaka di’anto akina monga la shɛngiya lo kɛnɛ kasalawɔ.
Naka wɛ ambohomana la dikambo dia ngasɔ, kakɔna kayoyosala dia wɛ nshika tanga la ntondo ka shɛngiya y’oma le asekayɛ?
-
ƐNA AKAMBO LA NTONDO
Bible mbutaka ɔnɛ: “Kanga yewo atɛnaka waale, ko nde atoyashɛka, koko onto lahatahokɔ akambo atotshɔka tsho, ko atodiɛnɛka la etombelo wa kɔlɔ.”—Tokedi 22:3.
Mbala efula, wɛ koka mɛna waale la ntondo. Ɛnyɛlɔ, ohɔsa dia wɛ ambɛna olui w’asekayɛ wa la kalasa la ntondo kayɛ wanɔ mfɔka. Naka wɛ nshihodia dui la ntondo, wɛ ayeya woho wa nkomɛ la diɔ.
-
KANA LOMBA
Bible mbutaka ɔnɛ: “Nyotetemale monga la nkum’otema k’ɔlɔlɔ.”—1 Petero 3:16.
Yambola wate: ‘Ngande wayomoyoyaoka l’edjedja ka wonya naka dimi monga l’anto anɛ?’ Ekɔ mɛtɛ dia lo tshanda mɔtshi, wɛ koka nsala dia mbetawɔma le asekayɛ. Ko ngande wayoyoyaoka l’ɔkɔngɔ? Onde wɛ kombolaka dia nshisha lonto layɛ paka dia ngɛnyangɛnya asekayɛ wa la kalasa?—Etombelo 23:2.
-
ƆSA YƐDIKƆ
Bible mbutaka ɔnɛ: “Onto lele la lomba ekɔ la yewo.”—Tokedi 14:16.
Ɛlɔ kɛnɛ kana otsha la ntondo, tayɔsa tɛdikɔ ndo tayokondja etombelo w’oma lɔkɔ. Bible tɛkɛtaka di’apami wele oko Yɔsɛfu, Jɔbɔ ndo Yeso, wanɛ wakɔshi tɛdikɔ t’eshika. Tɔ tɛkɛtaka nto dia Kɛna, Esao ndo Judasɛ, wanɛ wakɔshi tɛdikɔ ta kɔlɔ. Kakɔna kayoyosala?
Bible mbutaka ɔnɛ: “Sala akambo la kɔlamelo.” (Osambo 37:3) Naka wɛ nkana yimba la ntondo lo etombelo wa kɛnɛ kangayɛ nsala, nɔngɔsɔla yimba yayɛ ndo mbeya kɛnɛ kayoyosala, kete dui sɔ diayonga wɔdu ndo diayonga l’etombelo w’ɛlɔlɔ.
Toyakiyanyake, wɛ hahombe nembetshiya asekayɛ lo yɛdikɔ yamboleka. Naka wɛ mbuta tsho ɔnɛ NDOOKO kete ondo ambokoka. Kana dia wɛ mɛnya yɛdikɔ yayɛ yahatotshikitanyema, wɛ koka mbuta ɔnɛ:
-
“Nyominya oma l’olui anyu”
-
“Dimi hasale woho wa dui dia ngasɔ”
-
“Na nyende, kɛdi nyu hanyombeye dimɛna ss!”
Kɛnɛ kele ohomba ele, nkadimola aha la ntshimbatshimba ndo la dietawɔ. Naka wɛ nsala ngasɔ, wɛ koka mamba woho wayomɔ asekayɛ oma le yɛ esadi eto.
WOHO WA NDƆSHANA LA LƆSƆKƆ
Naka wɛ sɛngiyama oma le asekayɛ, kete wɛ ayonga oko rɔbo watalɔmbwama oma le wɔ
Ahombama naka asekayɛ wokɔsɔka? Ohɔsa dia vɔ wambota ɔnɛ: “Na nyende, onde wɛ ekɔ yɔmɔma”? Eya dia ɔsɔ ekɔ woho wa lɔsɔkɔ l’oma le angɛnyi. Ngande wayoyokadimola? Wɛ ekɔ la ɛsɔnwɛlɔ oko ehende.
-
Wɛ kokaka mbetawɔ lɔsɔkɔ lawɔ. (“Nyekɔ la shadiya, dimi lekɔ kanga wɔma.” Oma laasɔ, ɛnyawɔ ɔkɔkɔ lo tshena pe.)
-
Wɛ koka ntona shɛngiya yawɔ. Ɛnyawɔ ɔkɔkɔ watonayɛ ndo oma laasɔ, tɛ asekayɛ kanyi yayɛ. (“Dimi fɔnyaka dia nyeke akɛnda efula dia nnɔ mfɔka.”)
Naka asekayɛ wambotetemala kɔla, ko wɛ minya demba. Eya dia lo yɛdikɔ yayoyotetemala ntshikala laawɔ mbayoleka shɛngiya mfula. Lo mimɔ oma lo dihole diakɔ, wɛ ayɛnya dia wɛ halange di’anto akina ntshikitanya lonto layɛ.
Lo mɛtɛ, wɛ hatolawɔ shɛngiya y’asekayɛ. Koko, wɛ koka mbɔsa yɛdikɔ ya kɛnɛ kalangayɛ nsala, mbuta kanyi yayɛ ndo ndjalɔmbɔla. L’ekomelo, wɛ mbayɔsa yɛdikɔ.—Jashua 24:15.
