Aha la Annette mbeya, pami kɛmɔtshi akawombamɛ ko nkɔ la nde la nkɛtɛ. Nde mbutaka ate: “Lakasale kɛnɛ tshɛ kakamakoke nsala dia mbonya. Lakade ekoko, koko dui kotombaka. Lakoosokola, lakokune nkala ndo mbohondja diangɔ. Ko nde akambike lokuwa. Wolo ami wakashile tshɛ.”

Otonga wɛ mbaki la ntondo ka dui dia ngasɔ, kakɔna kotoyosala?

Kaanga mbakokayɛ ndjalɔngɔsɔla, ɛnyɛlɔ lo monga la yewo etena kayayatombe oma lo luudu l’otsho, dui dia kɔlɔ koka kokomɛ. Bible mbutaka ɔnɛ: “Aha wanɛ wadja lowango mbatodjaka nshi tshɛ otshumba, aha akanga wa yimba mbonga nshi tshɛ ɛngɔnyi, nɛ dia tena ndo awui wa shashimoya mbakomɛka vɔ tshɛ.”—Ondaki 9:11.

Le ɛlɔngɔlɔngɔ ɛmɔtshi, anto wahaweye mbeyana la wɔ la wolo, l’ɛnyɛlɔ kaki Annette. Le akina ekɔ asekawɔ kana ose nkumbo. Ɔlɔngɔlɔngɔ ɔmɔtshi w’ɛnɔnyi dikumi l’ɛmɔtshi wakadjasɛka suke la waa Natalie, akeyana la Natalie la wolo etena kakinde eke l’ɛnɔnyi dikumi. Natalie mbutaka ate: “Lakikɔ la wɔma ndo la nsɔnyi k’efula, diakɔ diele dimi kombutɛ ndooko onto mbala kakɔ ɔtɔi.”

Annette tetemalaka ndjaɛndja onongo wa kɛnɛ kakatombe. Nde mbutaka ate: “La dikɔlɔ diakɔ lakatetemala ndjakiyanya. Dimi mɛnaka dia lakahombe ndeka nsala la wolo dia mbonya. Koko etena kakandambike lokuwa, lakɔlɛ yɔɔ la wɔma. Dimi kokoka nsala ndooko dui dikina, koko dimi mɛnaka dia lotosala dui dimɔtshi.”

Natalie nde lawɔ ekɔ lo ndjaɛndja onongo. Nde mbutaka ate: “Takamahombe ndjaɛkɛ le mi dimɛ amboleka. Ambutshi ami wakadje ɔlɛmbɛ ɔnɛ dimi la kadiyɛmi pombaka mongaka dihole ɔtɔi etena kakɛnyaso l’andja, koko dimi kompokamɛ. Diakɔ diɛnami dia lakasha osukanyi aso diaaso dia nde salɛmi kɔlɔ. Dui sɔ diakonge la shɛngiya le nkumbo kami ndo dimi ndjaɛndjaka onongo lo woho wakamawasha paa k’efula. Dui sɔ tshindjakami wɔɔngɔ efula.”

Naka wɛ lawɔ ndjaokaka woho wayaoka Annette kana Natalie, kete eya di’aha onto leyanawɔ la nde la wolo mbalanga dia dui sɔ salema. Anto amɔtshi mɔnyɔlaka woke woke wakoka dikambo monga lo mbuta ɔnɛ ana w’apami ngango mbewɔ kana ɔnɛ ɔna womoto kapanda ndamɛ mbakalange dia vɔ mbeyana la nde la wolo. Koko ndooko onto lakoka nanga vɔ mbeyana la nde la wolo. Naka wɛ mbosalewɔ dui dia kɔlɔ dia ngasɔ, kete ɔsɔ bu munga kayɛ.

Lo mɛtɛ, mbadia ɔnɔngɔ wa ta ɔnɛ “ɔsɔ bu munga kayɛ” ekɔ wɔdu, koko mbetawɔ dikambo sɔ ekɔ wolo efula. Amɔtshi ndjakiyanyaka dia kɛnɛ kakatombe ndo diɛnɛka lo ndjaɛndja onongo la tokanyi tokina ta kɔlɔ. Ko onto akɔna akondja wahɔ lo woho wahayate dikambo sɔ, onde wɛ kana onto lakeyana la yɛ la wolo? Wɛ pombaka nsala dui dimɔtshi.

Bible totɛka ɔnɛ l’ɔtɛ wa efula k’ekiyanu ande, Jɔbɔ pami ka losembwe akate ate: “Dimi layɔtɛkɛta l’ɔtɛ w’efula ka shɔkɔ yami!” (Jɔbɔ 10:1) Wɛ koka nkondja wahɔ lo nsala woho akɔ waamɛ. Sawola l’onto lɛkɛyɛ otema lele nde mbishɛka sheke koka kokimanyiya dia wɛ mbeya kiɔkɔ ya kɛnɛ kakatombe ndo ayokokimanyiya dia wɛ ndjaoka dimɛna lo lɔkɔnyɔ lele layɛ.

Annette akɛnyi dia ɔsɔ aki dui dia mɛtɛ. Nde mbutaka ate: “Lakasawola la ɔngɛnyi ami wa ma ma ndo nde akankeketsha dia dimi nsawola la dikumanyi dihende dia l’etshumanelo kaso. Lekɔ l’ɔngɛnɔngɛnɔ lo kɛnɛ kakamasale. Vɔ wakasawola la mi mbala efula ndo wakambutɛ kɛnɛ kakimi mɛtɛ la tɔ ohomba mboka, mbuta ate kɛnɛ kakasalema komonga munga kami. Ɛkɔmɔ komonga le mi.”

Natalie akasawola l’ambutshi ande dia woho wakaweyana la nde la wolo. Nde mbutaka ate: “Vɔ wakankimanyiya. Wakankeketsha dia sho nsawola dui diakɔ ndo kɛsɔ kakankimanyiya diaha dimi monga la lonyangu l’efula kana nkɛlɛ.”

Natalie akakeketshama nto diɛsɛ la dɔmbɛlɔ. Nde mbutaka ate: “Mbutɛ Nzambi akankimanyiya, djekoleko lo tena dia ngasɔ diakamayaokaka dia handokoke mbutɛ ndooko onto. Etena kasalami dɔmbɛlɔ, dimi koka mbuta akambo hwe hwe. Dui sɔ diakambisha wɔladi ndo wɔlamu wa mɛtɛ.”

Wɛ lawɔ koka nshihodia dia ekɔ etena kɛmɔtshi “ka nkɔnɔya.” (Ondaki 3:3) Yakokɛ wɛmɛ lo demba ndo lo tokanyi. Omuyaka dimɛna. Kɛnɛ koleki tshɛ ele, yaɛkɛ le Jehowa, Nzambi k’esambelo tshɛ.—2 Kɔrɛtɔ 1:3, 4.

Naka wɛ ekɔ osekaseka ko wekɔ lo kodja pɛpɔ dia wɛ monga la lɔkɛwɔ la mindo, kete bu kɔlɔ wɛ nkadimola l’eshikikelo tshɛ ɔnɛ: “Tosalake dui sɔ” kana “nya lonya layɛ oma lo demba diami.” Tɔtɛwɔke la wɔma w’ɔnɛ nyayoyokakitɔna wɛ la omambedi ayɛ. Naka nde ambokakitɔna la yɛ l’ɔtɛ wa dikambo sɔ, kete nde kokolangaka lo mɛtɛ. Wɛ sunganaka tshukama la pami k’oshika, kalɛmiya demba diayɛ ndo kɛnɛ kalangayɛ.

Coretta mbutaka ate: “Lo kalasa, ana w’apami wakankotolaka lo kanga kami ko mbutɛkami awui w’ɛsɛndji wele oko, wɛ ayoka ɔlɔ wa mamba naka wɛ mbeyana la so.”

Onde wɛ fɔnyaka dia ana w’apami asɔ

1. Shɛkɛsɛkɛ mbakawasalaka la nde?

2. Wakawotɛka awui wemula nsaki?

3. Wakawotɛka awui wakonya lo dieyanelo?

Candice mbutaka ate: “Etena kakiso lo mutuka, ɔna pami ɔmɔtshi akamɛ mbutɛmi ɛtɛkɛta w’anyanya ndo akankimɛ. Lakanyangitola lonya lande ndo lakawotɛ dia nde mimɔ. Nde akamende la endelo kɛnya dia dimi lekɔ enginya.”

Oko le yɛ, kakɔna kakayangaka ɔna pami ɔsɔ le Candice?

1. Shɛkɛsɛkɛ mbakandasalaka la nde?

2. Akawotɛka awui wemola nsaki?

3. Akawotɛka awui wakonya lo dieyanelo?

Bethany mbutaka ate: “Ɔnɔnyi wetshi, ɔna pami ɔmɔtshi akambutɛka ate dimi kɔngɛnangɛnaka ndo ɔnɛ dimi kombolaka mɛngɔla la yɛ, kaanga mbele lakawotɛka nte ndooko. Tena dimɔtshi, nde akaminandaka lo anya. Lakawotɛ nte handolange, koko nde komboka. Lushi lɔmɔtshi etena kakamalɔtaka sabata, nde akankɔmɔla lo asɔkɔ.”

Oko le yɛ, onde ɔna pami ɔsɔ:

1. Shɛkɛsɛkɛ mbakawasalaka la nde?

2. Wakawotɛka awui wemula nsaki?

3. Wakawotɛka awui wakonya lo dieyanelo?

Ɔsɔnwɛlɔ wa dimɛna lo esato ɛnɛ ekɔ C.

Otshikitanu akɔna wele lam’asa totshelo takonya lo dieyanelo la shɛkɛsɛkɛ kana awui wemula nsaki?

Totshelo takonya lo dieyanelo ekɔ dikambo dia wolo. Tɔ tetemalaka kaanga onto lasalɛwɔ kotaka ɔnɛ handolange.

Totshelo takonya lo dieyanelo ekɔ waale. Tɔ koka konya lo dieyanelo dia la wolo.