Ohokanyiya dui nɛ: Atakoke minitɛ dikumi yambotshɔ Karen lo fɛtɛ, nde amboka dui di’onto leyande oma l’ɔkɔngɔ ande.

Karen ambokadimɔ ndo ambɛna Jessica ɔngɛnyi ande okime ɛlɔndɔ ehende wekewɔ kambifola. Nde ambɛna dia wanu mbele lɔkɔ. Jessica ambotshuma ɔlɔndɔ ɔmɔtshi otsha l’elungi kaki Karen ndo ambowotɛ ɔnɛ: “Wɛ bu dikɛnda diahayakoke ngɛnangɛna yema, shi mɛtɛ?”

Karen ambolanga ntona, koko Jessica ekɔ ɔngɛnyi ande. Karen halange ɔngɛnyi ande mfɔnya dia nde hayasha le nde. Ndo nto, Jessica ekɔ ɔna womoto l’ɔlɔlɔ. Naka nde nnɔ, hatonga kɔlɔ kamboleka. Karen ambota l’otema ate: ‘Ekɔ tsho yangɔ ya nnɔ. Aha didjoyadjoya mbangami nnɔ.’

Otondonga wɛ mbakahomana la dui diakahomana la Karen, kakɔna kotoyosala?

Dia mbɔsa yɛdikɔ ya dimɛna la ntondo ka dui dia ngasɔ, ekɔ ohomba mbeya woho w’onto weyɛ. Ɔsɔ ekɔ lonto la l’etei lalembetshiya eeyɛ ndo kɛnɛ ketawɔyɛ. Mbeya dikambo sɔ, ayokokimanyiya dia nɔmbɔla lɔsɛnɔ layɛ lo dihole dia ntshika di’anto akina lilɔmbɔla.—1 Kɔrɛtɔ 9:26, 27.

Ngande wakokayɛ mpamia dikoka sɔ? Yoho ya dimɛna ya ntatɛ nsala dui sɔ ele lo mbisha ekadimwelo lo ambola wayela anɛ.

Mbeya akoka ndo waonga ayɛ w’ɛlɔlɔ ayofudia wɛkamu ayɛ.

ƐNYƐLƆ KA LO BIBLE: Ɔpɔstɔlɔ Pɔɔlɔ akafunde ate: “Oyadi kaanga diewo dia ntɛkɛta mbemi bu la diɔ, lo mɛtɛ aha ɔnɛ ndo ewo mbemi bu la tɔ.” (2 Kɔrɛtɔ 11:6) Lam’ele nde akashihodiaka Afundelo dimɛna, Pɔɔlɔ aki l’akoka wa ntshikala nge etena kakohembaka anto akina. Nde kombetawɔ dia ɛtɛkɛta awɔ wa kɔlɔ ndanya wɛkamu ande.—2 Kɔrɛtɔ 10:10; 11:5.

YASƐDINGOLA WƐMƐ:Funda l’ɛse diewo kana dikoka diele la yɛ.

Kakianɛ, funda dionga dimɔtshi di’ɔlɔlɔ diele la yɛ. (Ɛnyɛlɔ, onde wɛ mbokanaka kɛtshi? kahaka? ekɔ onto lɛkɛwɔ otema? nɛnyaka wonya?)

Oko wele mɔlɔla mongaka wolo paka naka asɔnga nkakatana, mbele ndo lonto layɛ koka ndana naka wɛ ntshika dia wɛɔdu ayɛ nɔmbɔla lɔsɛnɔ layɛ.

ƐNYƐLƆ KA LO BIBLE: Pɔɔlɔ akeyaka wɛɔdu ande. Nde akafunde ate: “Dimi mɛtɛ ngɛnangɛnaka ɛlɛmbɛ wa Nzambi lo ndjela woho w’onto wemi l’etei, koko dimi mɛnaka ɔlɛmbɛ okina wele l’etei ka demba diami walɔshana la ɔlɛmbɛ wele lo yimba yami ndo wambetɛ mfumbe ka ɔlɛmbɛ wa pɛkato.”—Rɔmɔ 7:22, 23.

YASƐDINGOLA WƐMƐ:Wɔdu akɔna wahombayɛ mbahemɛ?

Onde wɛ koka mbɔtɔ lo mutuka ko wɛ mbutɛ shufɛlɛ dia tshimbaka otshimbatshimba polo esasɛ nshila oma lo mutuka? Ɔsɔ ayonga dui di’enginya ndo wetshelo wa wenya.

Naa wetshelo wele laasɔ? Eyango mbishaka lɔsɛnɔ layɛ ɛlɔmbwɛlɔ ndo kokimanyiyaka dia ntshɔ otsha la ntondo. Wɛ ekɔ la dihole dia ntshɔ ndo ekongelo ka woho wa nkoma lɛkɔ.

ƐNYƐLƆ KA LO BIBLE: Pɔɔlɔ akafunde ate: “Dimi haalawɔ olawɔlawɔ.” (1 Kɔrɛtɔ 9:26) Lo dihole dia nde mɛmbama l’akambo wa lo lɔsɛnɔ lo mbetawɔ di’akambo tawokomɛka, Pɔɔlɔ akayadjɛ eyango ndo akasɛnɛ lo ndjela eyango akɔ.—Filipɛ 3:12-14.

YASƐDINGOLA WƐMƐ:Funda l’ɛse eyango esato walangayɛ nkotsha ɔnɔnyi wayaye.

Naka wɛ bu l’awui wetawɔyɛ, wɛ ayonga onto lahɔshi yɛdikɔ. L’ɛnyɛlɔ ka lɔnganya, wɛ ayotshikitanya dangi diayɛ ko mfɔna l’asekayɛ, djembetelo ya mɛtɛ yɛnya dia wɛ bu la lonto layɛ hita.

Koko, naka etsha ayɛ pikama lo kɛnɛ ketawɔyɛ, wɛ ayolama lonto layɛ oyadi kɛnɛ kasala anto akina.

ƐNYƐLƆ KA LO BIBLE: Etena kakinde eke ɔlɔngɔlɔngɔ, omvutshi Danyɛlɛ “akɔshi yɛdikɔ l’otema ande” dia nde ayokitanyiyaka ɛlɛmbɛ wa Nzambi kaanga mbakandangana la nkumbo kande. (Danyɛlɛ 1:8) Lo nsala ngasɔ, nde akatshikala woho wakinde. Danyɛlɛ akasɛnɛ lo ndjela awui wakandetawɔka.

YASƐDINGOLA WƐMƐ:Naa awui wetawɔyɛ? Ɛnyɛlɔ: Onde wɛ ekɔ la mbetawɔ le Nzambi? Naka eelo, lande na? Djembetelo yakɔna yaketawoya ɔnɛ nde ekɔ?

Onde wɛ mbetawɔka di’atɔndɔ waki Nzambi wendana la lɔkɛwɔ wekɔ dia wahɔ ayɛ hita? Naka eelo, lande na?

Alangayɛ mfɔna, dikatshi diambɔkɔ l’ɔtɛ wa yema ya lɔpɛpɛ, kana osongo wemadi nge oyadi lɔpɛpɛ la wolo? Keketsha lonto layɛ ko wɛ ayonga oko osongo ɔsɔ. Ndo dui sɔ diayokokimanyiya dia wɛ nkadimola lo dimbola diata ɔnɛ Dimi eemi?