Ohokanyiya dui nɛ: Etena kamondɔkɛnyaka l’angɛnyi ande, Tim amboka mponde ko tɔ kambotolanya didishi di’osukanyi awɔ.

Otonga wɛ mbaki Tim, kakɔna kotoyosala?

WƐ EKƆ LA ƐSƆNWƐLƆ ESATO:

1. Ndawɔ.

2. Mɛndja onto okina onongo.

3. Mbutɛ osukanyi kɛnɛ kakatombi ndo mbetawɔ mfuta kɛnɛ kolanyi.

Wɛ mbeyaka pembama dia nsɔna Ɔsɔnwɛlɔ A. Koko mbala tshɛ ekɔ ɛkɔkɔ w’eshika wahombayɛ suyaka munga yayɛ oyadi vɔ kokɔlɔmbaka dia mfuta didishi diolanyi kana ɛngɔ kekina.

1. Ɔsɔ ekɔ dui di’oshika dia nsala.

   Bible mbutaka ɔnɛ: “Sho kombolaka monga la losembwe lo akambo tshɛ.”—Hɛbɛru 13:18.

2. Anto ndekaka monga suke dia dimanyiya wanɛ wetawɔ munga yawɔ.

   Bible mbutaka ɔnɛ: “Ɔnɛ lashɛ kɔlɔ yande hatolowana, koko ɔnɛ lashola ndo latshika kɔlɔ yande ayokama kɛtshi.”—Tokedi 28:13.

3. Kɛnɛ koleki ohomba ele, dui sɔ ngɛnyangɛnyaka Nzambi.

   Bible mbutaka ɔnɛ: “Jehowa petshaka kanga okadi, koko nde ekɔ ɔngɛnyi wa ma ma [w’]anto wosembwe.”—Tokedi 3:32.

Karina lele l’ɛnɔnyi 20, akashɛ she dikatshi diakandafute amandɛ w’olekanyelo wa vitɛsɛ. Koko totondodishɛ lo pondjo. Karina mbutaka ate: “Ɔnɔnyi oko ɔtɔi l’ɔkɔngɔ, papa akatɛna laa lokombo lami dikatshi di’amandɛ w’olekanyelo wa vitɛsɛ. Dui sɔ diakatondja londjo la mamba.”

Naa wetshelo wakandakondja? Karina mbutaka ate: “Mbishɛ munga konyaka paka lo kɔlɔ. Vɔ mbutaka ɔnɛ wɛ koshɛshɛ nɔnɔ ko wondjo koshola.”

Bible mbutaka ɔnɛ: “Sho tshɛ salaka munga mbala efula.” (Jakɔba 3:2, nɔtɛ) Oko wɛnyiso, wɛ ayɛnya dia wɛ ekɔ l’okitshakitsha ndo ambotshunda, lo nsuya munga ndo lo nsala dui sɔ esadi eto.

Nna diayela ele nkondja wetshelo oma lo munga yayɛ. Vera lele osekaseka mbutaka ate: “Dimi salaka la wolo dia mbɔsaka munga tshɛ oko olowanyelo ndo ntshika dia dui sɔ monga wetshelo wayokimanyiya dia dimi monga onto l’oshika ndo nkandola dikambo otshikitanyi la mbala ketshi.” Ɛsɔ tende woho wakokayɛ nsala dui sɔ.

Ohɔsa dia wɛ ambɔmɔla dikalo diaki shɔ ko ambotodilanya. Kakɔna kayoyosala oma laasɔ?

• Mbɔlama ndo mbɔsa oko papa heyi ndooko dikambo.

• Mbutɛ papa kayɛ woho waketshi dikambo.

• Mbutɛ papa kɛnɛ kakatombi ko mɛndja onto okina onongo.

Ohɔsa dia wɛ hakotshisha lo ɛgzamɛ nɛ dia wɛ kombeka dimɛna. Ayoyosala?

• Mbuta dia ɛgzamɛ mbaki wolo.

• Nsuya dia wɛmɛ mbahakotshisha.

• Mbayaya ɔnɛ ombetsha kohetshaka.

 Kakianɛ, lo kɛnɛ kendana la bɛnyɛlɔ diɔtɛkɛtshiso, ohɔsa dia wɛ mbele 1) papa kayɛ ndo 2) ombetsha ayɛ. Ngande wayokɔsa papa ndo ombetsha ayɛ naka wɛ mɛtɛ nsuya munga? Ngande wayowokɔsa naka wɛ mbishɛ munga?

Kakianɛ, ohokana yimba lo munga kɛmɔtshi kakayasale ɔnɔnyi w’etshi kele okadimole lo ambola wayela anɛ.

Naa munga kakɔ? Ngande wakayakomɛ la tɔ?

• Lakakishɛ.

• Lakɛndja onto okina onongo.

• Lakakisuya aha la ntshimbatshimba.

Naka wɛ kosuya munga kayɛ, ngande wakayayaoke l’ɔkɔngɔ?

• Dui dia woke—Lakashidiya la tɔ.

• Lakayaɛndja onongo—Lakahombe mbuta kɛnɛ kele mɛtɛ.

Ngande wotoyokandola dui sɔ lo yoho yoleki dimɛna?

Wetshelo akɔna wakayakondja oma lo munga kakayasale?

Lande na kele anto amɔtshi hawosuya munga yawɔ?

Ngande wayokɔsa anto naka wɛ mbishɛka munga yayɛ, ko ngande wayowokɔsa naka wɛ suyaka munga yayɛ?—Luka 16:10.