Ohokanyiya dui nɛ: Etena kamboyaenda Julia lo talatala, nde ambɛna dia nde ambonuna. Nde ambota ate: “Dimi pombaka nkitshakitsha kilɔ.” Koko ambutshi ndo angɛnyi ande wekɔ lo mbotɛ dia nde “ambɔnda.”

Atete edja, Julia akakane yimba dia mbɔsa tɛdikɔ ta wolo dia nkitshakitsha “kilɔ mɔtshi.” Nde akayalasha ndjala l’edja ka nshi ngana . . .

Otondonga wɛ mbaki Julia, kakɔna kotoyosala?

Bu kɔlɔ wɛ ndjakiyanya l’ɔtɛ wa ɛnamelo kayɛ. Bible tɛkɛtaka dimɛna dia ɛnamelo ka demba ka wamato l’apami efula, mbidja ndo Sara, Rashɛlɛ, Abigayɛlɛ, Yɔsɛfu ndo Davidɛ. Bible mbutaka dia Abishangɛ “aki olangala wahadjama anya.”—1 Nkumi ya dikanga 1:4.

Ɛlɔngɔlɔngɔ efula ndjakiyanyaka amboleka dia ɛnamelo kawɔ. Dui sɔ koka nkonya l’ekakatanu wa wolo. Tɔsɛdingole awui anɛ:

• Wekelo ɔmɔtshi mɛnyaka dia pursa 58 y’esekaseka wakayataka dia waya la kilɔ yamboleka, etena kele, lo mɛtɛ aki paka pursa 17 tsho mbaki la kilɔ yamboleka.

• Lo ndjela wekelo okina, pursa 45 ya wamato waki la kilɔ yamboleka l’ɛse wakafɔnyaka dia waki wetsho efula!

• Lo nyanga nkitshakitsha kilɔ, ɛlɔngɔlɔngɔ ɛmɔtshi ndjongaka la hemɔ kakonya onto dia nshisha mposa ka ndɛ, dui diawakonya lo kɔlɔ.

 Naka wɛ aya la hemɔ ka anorexie kana okakatanu okina wendana la oleelo, yanga ekimanyielo. Wɛ koka mbutɛ ombutshi ayɛ kana opalanga ɔmɔtshi wɛkɛyɛ otema. Bible mbutaka ɔnɛ: “Ɔngɛnyi wa mɛtɛ mbokanaka ngandji tena tshɛ, ndo ekɔ ɔnanyɔ lakokayɛ mendɛ le nde lo tena dia paa.”—Tokedi 17:17.

Lo mɛtɛ, lonto la l’etei mbakotola yambalo y’anto kana bu. Tɔsɛdingole ɛnyɛlɔ kaki Abisalɔma ɔna nkumekanga Davidɛ. Bible mbutaka ɔnɛ:

“Ndooko pami kakanyanyemaka l’ɔtɛ w’olangala ande . . . Nde komonga kaanga la vadi.”—2 Samuɛlɛ 14:25.

Koko, ɔlɔngɔlɔngɔ ɔsɔ aki la otako, lokaki ndo lokeso l’efula. Diakɔ diahatɛkɛta Bible dimɛna dikambo dia Abisalɔma; tɔ mɛnyaka dia nde aki fumbɔ nsɔnyi, komonga la kɔlamelo ndo ondjakanyi wakahetshanaka.

Diakɔ diatosha Bible dako nɛ:

“Nyɔlɔtɛ lonto l’oyoyo.”—Kɔlɔsayi 3:10.

“Ɛlɛngɛlɔ kanyu katongake ka l’andja . . . koko kayale ɛlɛngɛlɔ . . . ka lonto loshɛmi l’etei k’otema.”—1 Petero 3:3, 4.

Keema kɔlɔ monga l’ɛnamelo ka dimɛna, koko kɛnɛ koleki ɛnamelo kayɛ ohomba ele lonto layɛ. L’edjedja ka wonya, waonga ayɛ w’amɛna wayoleka nkotola yambalo y’anto akina oleki diema kana elungi kayɛ k’olangala. Phylicia lele osekaseka mbutaka ate: “Olangala koka nkotola yambalo esadi eto, koko woho w’onto weyɛ l’etei ndo waonga ayɛ w’amɛna mbele dui diayoleka anto mbohɔ.”

Onde mbala efula wɛ mongaka la lonyangu l’ɔtɛ w’ɛnamelo kayɛ?

Onde wɛ ambokambaka la dishinolashinola kana nsɛka mbo ya ndɛ lo tshambandeko dia nɔngɔsɔla ɛkɔmɔ kɛmɔ ka lo demba?

Kakɔna kotoyotshikitanya lo ɛnamelo kayɛ otondongaka wɛ ekɔ l’akoka? (Dja obelenga lo dihole tshɛ dialangayɛ.)

• OTALE

• KILƆ

• DIVO

• DIEMA DIA DEMBA

• ELUNGI

• LƆƆWA LA DEMBA

Naka wɛ ambokadimola ɔnɛ eelo lo ambola ahende w’etatelo ndo ambodja obelenga lo awui asato kana ndekana wa lo dimbola dia sato, yela dui diayela nɛ: Mbeyaka monga ko anto akina hawokɛnyi ɛngɛnɔ oko ayaɛnayɛ. Ekɔ wɔdu dia wɛ ntamba elelo ndo ndjakiyanya otamanya dikambo dia ɛnamelo kayɛ.—1 Samuɛlɛ 16:7.