DIMBOLA 9
Onde dimi pombaka mbetawɔ wetshelo w’ohilwelo?
KAKƆNA KOTOYOSALA?
Ohokanyiya dui nɛ: Alex ekɔ l’okandokando. Nde okongaka la mbetawɔ le Nzambi ndo lo etongelo. Koko ɛlɔ, ombetsha ande wa biologie ambɛnya l’eshikikelo tshɛ dia ohilwelo ekɔ dui dia mɛtɛ ndo ɔnɛ vɔ mpikama lo eyangelo w’eshika w’ase siansɛ. Alex halange mɛnama dia nde ekɔ enginya. Diakɔ diayambolande ate: ‘Naka ambeyi wa siansɛ wakashikikɛ dia wetshelo w’ohilwelo wekɔ mɛtɛ, dimi eemi katomodjana la wɔ taamu?’
Otondonga wɛ mbaki Alex, onde wɛ otetawɔ wetshelo w’ohilwelo paka nɛ dia abuku mɛnyaka dia dui sɔ diekɔ mɛtɛ?
OHOKANYIYA YEMA!
Anto wa lo wedi akɔ ehende wadjana taamu lo dui sɔ mongaka suke mbala efula dia mbuta kɛnɛ ketawɔwɔ aha la mbeya mɛtɛ lande na ketawɔwɔ.
-
Anto amɔtshi wekɔ la mbetawɔ lo etongelo paka nɛ dia wakawaetsha dui sɔ l’ɔtɛmwɛlɔ.
-
Anto akina mbetawɔka wetshelo w’ohilwelo paka nɛ dia wakawaetsha dui sɔ la kalasa.
AMBOLA ASAMALO WA NSƐDINGOLA
Bible mbutaka ɔnɛ: “Lo mɛtɛ, luudu tshɛ tokamaka oma le onto ɔmɔtshi, koko Otungi wa diangɔ tshɛ ele Nzambi.” (Hɛbɛru 3:4) Onde dui sɔ sunganaka mbetawɔ?
Mbuta dia lɔsɛnɔ bu la Otungi alɔ ekɔ dui diaheyama ɔtɛ l’ekolo diele oko onto lata ɔnɛ luudu lɔnɛ bu la ombiki alɔ
KƐNƐ KATA ANTO AMƆTSHI: Ɛngɔ tshɛ kele l’andja ɔnɛ kakaye oma lo dihindo dimɔtshi dia bandjikui.
1. Onto akɔna kana kakɔna kaki lo kiɔkɔ ya dihindo dia bandjikui sɔ?
2. Kakɔna kele mɛtɛ mbuta, onde ɔnɛ ɛngɔ tshɛ kakaye oyaya ko kana ɔnɛ ɛngɔ tshɛ kakaye oma le oma le onto ɔmɔtshi?
KƐNƐ KATA ANTO AMƆTSHI: Anto wakahilɔ oma le waa nyama.
3. Naka anto wakahilɔ oma le waa nyama, ɛnyɛlɔ oma le waa diketo, lande na kele otshikitanu wa woke lam’asa akoka wele l’anto wa nkana yimba la akoka wele la waa nyama?
4. Lande na kele kaanga diangɔ diasɛna dioleki ‘totshitshɛ’ diekɔ paka wolo nshihodia?
KƐNƐ KATA ANTO AMƆTSHI: Wetshelo w’ohilwelo wekɔ dui dia mɛtɛ.
5. Onde onto lata ngasɔ akasale eyangelo ndamɛ dia nshikikɛ dui sɔ?
6. Anto angana wetawɔ wetshelo w’ohilwelo l’ɔtɛ wakawawatɛ ɔnɛ anto tshɛ wele la timba mbetawɔka dui sɔ?
Julia mbutaka ate: “Ohɔsa dia wɛ ekɔ lo takɛndakɛnda l’atei w’okonda ko wɛ ambotana luudu lɔmɔtshi la dimɛna, onde wɛ ayota wate: ‘Ɔnɛ mɛtɛ ekɔ dui dia diambo, weho akɔ tshɛ, esongo wakakɔ, ko luudu ndjakamaka lɔamɛ!’ Ndooko. Ɔsɔ ekɔ dui diahakoke salema. Ko lande na kahombaso mbetawɔ ɔnɛ ɛngɔ tshɛ ka l’andja kakaye oyaya?”
Gwen mbutaka ate: “Ohɔsa di’onto ɔmɔtshi ambokotɛ dia ɛngɔ kɛmɔtshi kakatondwe lɛnɛ ɛprimɛwɔ ekanda, ashi wa mukanda wakahandjwe lo mpele ndo l’odiko ko wakakengi diksiɔnɛrɛ di’otondo. Onde wɛ ayetawɔ dui sɔ?”
LANDE NA KAHOMBASO MONGA LA MBETAWƆ LE NZAMBI?
Bible kokeketshaka dia wɛ nkamba la ‘akoka ayɛ w’ekanelo ka yimba.’ (Rɔmɔ 12:1) Kɛsɔ nembetshiyaka dia dietawɔ diayɛ le Nzambi hahombe mpikama lo
-
NSAKI (Dimi fɔnyaka tsho dia ekɔ wolo ɔmɔtshi waheme)
-
SHƐNGIYA Y’ANTO AKINA (Dimi lekɔ lo nsɛna lo tshunda di’atɛmɔdi)
-
SHƐNGIYA (Ambutshi ami wakambekiya dia monga la mbetawɔ le Nzambi, ndooko kakokami nsala nto)
Koko wɛ pombaka monga la tolembetelo ta shikaa lo kɛnɛ ketawɔyɛ.
Teresa mbutaka ate: “Etena kemi lo kalasa lahokamɛ woho walembetshiya ombetsha woho wakɛndakɛnda alemba aso, dimi bu la taamu dia Nzambi ekɔ. Etenyi tshɛ ka demba kekɔ l’olimu atɔ polo ndo woleki tshitshɛ ndo mbala efula elimu ɛsɔ salemaka aha la sho mbeya. Lo mɛtɛ, demba di’onto ekɔ ɛngɔ ka diambo efula.”
Richard mbutaka ate: “Etena kɛnami luudu l’etajɛ l’otale efula, waato wa woke kana mutuka dimi ndjambolaka nte: ‘Akasale ɛngɔ kɛnɛ?’ Paka akanga wa timba mbakoka nsala mutuka, nɛ dia nɔmbamaka dia towolowolo totshikitanyi nkamba dimɛna kaamɛ dia mutuka nkɛndakɛnda. Laasɔ naka mutuka wakasalema oma le onto kete ndo sho anto takatongama.”
Anthony mbutaka ate: “Etena tshɛ katamaleke mbeka awui wa siansɛ, mbataleke wetshelo w’ohilwelo monga dui di’anyanya. . . . Le mi, nɔmbamaka dia monga la ‘mbetawɔ’ koleki efula dia mbetawɔ wetshelo w’ohilwelo oleki ka monga la mbetawɔ le Otungi.”
DUI DIA NKANA LA DIƆ YIMBA
Kaanga mbaya ɛnɔnyi akumi wambowosala eyangelo, ambeyi wa siansɛ watonge la olembetshielo wendana la ohilwelo wasangawɔ vɔ tshɛ lolemi. Naka ambeyi wa siansɛ wɔsama oko tomanyi hawosange lolemi lo wetshelo w’ohilwelo, shi bu kɔlɔ wɛ ndjaoka ambola lo dikambo sɔ?
Enda ndo lo...
KƐNƐ KATA ANAYƐ WELE L'ƐNƆNYI DIKUMI L'ƐMƆTSHI
Ekɔ ekɔ dimɛna mbetawɔ dia Nzambi ekɔ?
Ɛna ɛlɔngɔlɔngɔ ehende wakaahemɛ taamu tawɔ ndo wakakeketsha mbetawɔ kawɔ.
