“Nzambi . . . ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto.”—Ɛnyɛlɔ 21:3, 4, Ekadimwelo k’andja w’oyoyo.

Tekɔ l’eshikikelo dia Nzambi hakoke monga lo kiɔkɔ y’ekakatanu aso.—Jakɔba 1:13.

Sho keketshamaka lo mbeya dia Nzambi mbeyaka woho wayaokaso etena kasowaso.—Zekariya 2:8.

Tekɔ l’elongamelo ɔnɛ asui tshɛ wayokomɛ.—Osambu 37:9-11.

Eelo, l’ɔtɛ w’ɛkɔkɔ ehende ɛnɛ:

• Nzambi petshaka asui ndo awui wa wɛngiya. Tende woho wakayaoke Jehowa Nzambi etena kakasoyamaka ekambi ande wa lo nshi yakafundamaka Bible l’esehe tshɛ. Bible mbutaka dia nde akanyange l’ɔtɛ wa “asui wakawâsuyaka.”—Embadi 2:18.

  Nzambi petshaka wanɛ wasalɛ anto akina kɔlɔ. Ɛnyɛlɔ, Bible mbutaka dia “anya watutundjaka dikila diaha l’unungu” wekɔ wɔnɔnyi le nde.—Tukedi 6:16, 17.

• Nzambi ndjakiyanyaka dikambo diaso l’onto ndo l’onto. Oko wele ‘onto tshɛ mbeyaka sui diande hita ndo ɔkɛi ande hita’ mbele ndo Jehowa mbeyaka sui ndo ɔkɛi w’onto tshɛ.—2 Ekondo 6:29, 30.

  Oma lo tshimbo ya Diolelo diande, Jehowa ayanga nkomiya asui wele l’onto tshɛ. (Mateo 6:9, 10) Koko lam’akatakongɛ etena kɛsɔ, nde keketshaka la ngandji tshɛ wanɛ woyanga l’otema ɔtɔi.—Etsha 17:27; 2 Kɔrɛtɔ 1:3, 4.