FƐTƐ yasalema l’ɛtɛmwɛlɔ wa kashi ndo weho ekina wa fɛtɛ yasala anto lo ahole efula wa l’andja ɛlɔ kɛnɛ hayotombi oma lo Bible. Ko lende akatatɛ waa fɛtɛ shɔ? Naka wɛ koka nsala eyangelo lo waa bibliɔtɛkɛ, kete wɛ ayɔngɛnangɛna dia mɛna kɛnɛ kata abuku lo dikambo dia waa fɛtɛ ndo lɛnɛ odjashiyɛ. Tɔsɛdingole bɛnyɛlɔ dingana to.

 Pasaka. Dibuku dimɔtshi (The Encyclopædia Britannica) mbutaka ɔnɛ: “Ndoko kɛnya dia fɛtɛ ka Pasaka tɛkɛtamaka lo Daka di’Oyoyo.” Ngande wakatatɛ fɛtɛ ka Pasaka? Tɔ kakatatɛ l’ɔtɛmwɛlɔ w’apanganu. Kânga mbata anto dia vɔ salaka fɛtɛ kɛsɔ dia mbohɔ eolwelo ka Yeso, Akristo hawetawɔ mbekelo yasalema lo Pasaka. Ɛnyɛlɔ, lo kɛnɛ kendana la mbekelo kasala anto efula kelɛwɔ ɔnɛ “otomba wa Pasaka,” dibuku dimɔtshi (The Catholic Encyclopedia) mbutaka ɔnɛ: “Otomba wekɔ djembetelo y’apanganu yokongaka nshi tshɛ oko djembetelo ya diwutshi.”

Fɛtɛ k’ɔnɔnyi w’oyoyo. Datɛ ndo mbekelo yendana la fɛtɛ k’ɔnɔnyi w’oyoyo ntshikitana lo wodja la wodja. Lo kɛnɛ kendana la lɛnɛ akatatɛ fɛtɛ kɛsɔ, dibuku dimɔtshi (The World Book Encyclopedia) mbutaka ɔnɛ: “Ɔnɔmbɔdi w’ose Rɔmɔ wakawelɛka Jules César akɔshi Ngɔndɔ ka ntondo 1 oko lushi l’ɔnɔnyi w’oyoyo lo 46 N.T.D. Lushi lɔsɔ, ase Rɔmɔ wakohɔka Janus laki nzambi ka nkuke, k’asoko la k’etatelo. Wakasha Ngɔndɔ ka ntondo lokombo la Janus, laki la dungi pende, kɛmɔtshi kenda la ntondo ndo kekina kenda l’ɔkɔngɔ.” Ɔnkɔnɛ, fɛtɛ k’ɔnɔnyi w’oyoyo ndja oma lo mbekelo y’apanganu.

Halloween. Dibuku dimɔtshi (The Encyclopedia Americana) mbutaka ɔnɛ: “Awui amɔtshi wendana la mbekelo ya fɛtɛ ka Halloween ndja oma le waa druides, [dioho di’ɛlɔmbɛdi di’edjedja dia waa Celtes] waki la ditshelo diakasalemaka la ntondo ka Kristo. Waa Celtes wakasalaka fɛtɛ hiende dikambo dia nzambi hiende ya weke, mbuta ate nzambi-wonya, la nzambi k’edo . . . kakawasalɛka fɛtɛ Ngɔndɔ ka dikumi l’ɔtɔi 1 l’etatelo k’ɔnɔnyi w’oyoyo waki waa Celtes. Fɛtɛ k’edo kɛsɔ kakayɔtshiyamaka yema yema lo ditshelo di’Akristo.”

Fɛtɛ nkina. Hatokoke ntɛkɛta dikambo dia fɛtɛ tshɛ yasalema l’andja w’otondo. Koko, fɛtɛ yatombola anto kana ekongamelo w’anto hayetawɔma le Jehowa. (Jɛrɛmiya 17:5-7; Etsha 10:25, 26) Ohɔ nto dia lɛnɛ akatɔngɔ fɛtɛ ya l’ɛtɛmwɛlɔ kimanyiyaka dia mbeya kana Nzambi ndjietawɔka kana bu. (Izaya 52:11; Ɛnyɛlɔ 18:4) Atɔndɔ wa lo Bible wa lo tshapita 16 ya dibuku nɛ wayokokimanyiya dia nshikikɛ woho wɔsa Nzambi fɛtɛ yasala anto wa l’andja ɔnɛ.