1. Wahɔ akɔna wayotokondja naka sho ntɛmɔla Nzambi lo yoho ya dimɛna?

JEHOWA NZAMBI tokanɛka efula ndo nangaka dia sho nkondja wahɔ oma lo ɛlɔmbwɛlɔ kande ka la ngandji. Naka sho mbɔtɛmɔla lo yoho ya dimɛna, kete tayonga l’ɔngɛnɔngɛnɔ ndo tayewɔ ekakatanu efula lo lɔsɛnɔ. Ndo nto, tayokondja ɛtshɔkɔ ndo ekimanyielo kande. (Izaya 48:17) Koko, kânga mbata nkama y’ɛtɛmwɛlɔ dia vɔ mbetshaka akambo wa mɛtɛ lo dikambo dia Nzambi, awui wetshawɔ ntshikitana efula lo dikambo dia Nzambi ndo lo kɛnɛ kalongamɛnde le so.

2. Ngande wakokaso mbeya yoho ya dimɛna ya ntɛmɔla Jehowa, ndo ɛnyɛlɔ kakɔna katokimanyiya dia nshihodia dikambo sɔ?

² Ngande wakokayɛ mbeya yoho ya dimɛna ya ntɛmɔla Jehowa? Kema ohomba dia wɛ mbeka kana mbɛdika wetshelo wa lo ɛtɛmwɛlɔ tshɛ. Wɛ pombaka tsho mbeya kɛnɛ ketsha Bible mɛtɛ lo dikambo dia ɔtɛmwɛlɔ wa mɛtɛ. Ɛnyɛlɔ: Lo wedja efula, wekɔ la okakatanu lo kɛnɛ kendana la falanga ya kɔlɔ. Naka wambokosha olimu wa mbisholaka falanga ya kɔlɔ, ngande wayosalaka? Onde wɛ ayona dia nembetɛ tolembetelo tshɛ ta falanga ya kɔlɔ? Kema. Ayoleka dimɛna wɛ mbeka dia mbeya falanga y’amɛna. L’ɔkɔngɔ wa wɛ mbeya woho wele falanga y’amɛna, wɛ koka mbeya falanga ya kɔlɔ esadi eto. Woho akɔ wâmɛ mbele, etena kekaso dia mbeya ɔtɛmwɛlɔ wa mɛtɛ, sho koka ndjeya wɛnɛ wele kashi.

3. Lo ndjela Yeso, ahombaso nsala naka sho nangaka mbetawɔma le Nzambi?

 ³ Ekɔ ohomba sho ntɛmɔla Jehowa lo yoho yetawɔnde. Anto efula fɔnyaka dia ɛtɛmwɛlɔ tshɛ ngɛnyangɛnyaka Nzambi, koko Bible hetsha dikambo sɔ. Aha naka onto ambota ate nde ekɔ Okristo, kete lâsɔ ambokoka. Yeso akate ate: “Aha onto tshɛ latombelɛka ate: ‘Nkumadiɔndjɔ, Nkumadiɔndjɔ’ mbayɔtɔ lo Diolelo dia l’olongo, koko paka ɔnɛ latosalaka lolango la Papa lele l’olongo.” Ɔnkɔnɛ, dia mbetawɔma le Nzambi, sho pombaka mbeya kɛnɛ katɔlɔmbande ndo kisala. Yeso akelɛ wanɛ wahasale lolango laki Nzambi ate “atshi w’akambo wa kɔlɔ.” (Mateo 7:21-23) Oko wele falanga ya kɔlɔ bu la nɛmɔ, mbele ndo ɛtɛmwɛlɔ wa kashi bu la nɛmɔ di’oshika. Kɛnɛ koleki tshɛ kɔlɔ ele ɛtɛmwɛlɔ ɛsɔ wekɔ wâle wa mamba.

4. Kakɔna kalembetshiya ɛtɛkɛta waki Yeso wendana la mboka hiende, ndo lende atɔla mboka la mboka?

⁴ Jehowa mbishaka onto tshɛ la la nkɛtɛ diaaso dia nkondja lɔsɛnɔ la pondjo. Koko dia nkondja lɔsɛnɔ la pondjo lo Paradiso, sho pombaka ntɛmɔla Nzambi lo yoho ya dimɛna ndo nsɛna ntatɛ oma ko kakianɛ lo yoho yetawɔnde. Lonyangu ko, anto efula tonaka dia nsala dikambo sɔ. Diɔ diakɔ diakate Yeso ate: “Nyɔtɔ lo soko dia tshitshɛ, nɛ dia mboka ka woke ndo k’enanɔnanɔ tɔlaka lo elanyelo. Anto efula tɔtɔka lɔkɔ. Koko, soko dia tshitshɛ la mboka ka tshitshɛ tɔlaka lo lɔsɛnɔ la pondjo. Anto yema tshitshɛ tsho mbatokiɛnaka.” (Mateo 7:13, 14) Ɔtɛmwɛlɔ wa mɛtɛ tɔlaka lo lɔsɛnɔ la pondjo. Ɔtɛmwɛlɔ wa kashi tɔlaka lo elanyelo. Jehowa halange kânga onto ɔtɔi ndanyema, diɔ diakɔ diashande anto wa l’ahole tshɛ diaaso dia vɔ mbeka awui wendana la nde. (2 Petero 3:9) Ɔnkɔnɛ, yoho yatɛmɔlaso Nzambi mbeyaka tokonya lo lɔsɛnɔ kana lo nyɔi.

5. Ngande wakokaso mbeya wanɛ wele l’ɔtɛmwɛlɔ wa mɛtɛ?

⁵ Ngande wakokaso ntana ‘mboka k’otsha lo lɔsɛnɔ’? Yeso  akate di’atɛmɔdi wa mɛtɛ wayeyama oma lo yoho yawɔ ya lɔsɛnɔ. Nde akate ate: “Nyayowaeya oma lo elowa awɔ. . . . Osongo tshɛ w’ɔlɔlɔ tɔtɔka elowa w’ɛlɔlɔ.” (Mateo 7:16, 17) Lo ɛtɛkɛta ekina, wanɛ wele l’ɔtɛmwɛlɔ wa mɛtɛ wayeyama oma lo awui wetawɔwɔ ndo oma lo lɔkɛwɔ lawɔ. Kânga mbewɔ kema kokele ndo mbatshawɔ munga, atɛmɔdi wa mɛtɛ lo tshɛ kawɔ nyangaka dia nsala lolango laki Nzambi. Tɔsɛdingole awui asamalo wayotokimanyiya dia mbeya wanɛ wele l’ɔtɛmwɛlɔ wa mɛtɛ.

6, 7. Ngande wɔsa ekambi waki Nzambi Bible, ndo ɛnyɛlɔ kakɔna kakatshike Yeso lo dikambo sɔ?

⁶ Ekambi waki Nzambi tondjaka wetshelo awɔ oma lo Bible. Bible twamɛ mbutaka ɔnɛ: “Afundelo tshɛ wakafundama l’ɛlɔmbwɛlɔ ka nyuma kaki Nzambi ndo wekɔ ohomba dia mbetsha, dia mingola, dia mbidja akambo l’ɔnɔngɔ ndo dia mpokola lo losembwe, kele okambi wa Nzambi onge l’akoka tshɛ ndo la kɛnɛ tshɛ kahombama dia nsala olimu w’ɔlɔlɔ tshɛ.” (2 Timɔte 3:16, 17) Ɔpɔstɔlɔ Pɔɔlɔ akafundɛ wanyande Akristo ate: “Lam’akanyalongola ɔtɛkɛta wa Nzambi wakatanyewoya, nyu kombeetawɔ oko ɔtɛkɛta w’anto, koko oko wewɔ mɛtɛ, mbuta ate ɔtɛkɛta wa Nzambi.” (1 Tɛsalɔnika 2:13) Ɔnkɔnɛ, awui wetawɔma ndo watshama lo ɔtɛmwɛlɔ wa mɛtɛ hawotombe oma lo tokanyi t’anto kana oma l’awui w’ashidi. Vɔ tombaka oma l’Ɔtɛkɛta wa Nzambi, mbuta ate oma lo Bible.

⁷ Yeso Kristo akatshike ɛnyɛlɔ ka dimɛna lo tondjaka wetshelo ande oma l’Ɔtɛkɛta wa Nzambi. Lo dɔmbɛlɔ diakandalɔmbɛ She lele l’olongo, nde akate ate: “Ɔtɛkɛta ayɛ wekɔ mɛtɛ.” (Joani 17:17) Yeso aketawɔka Ɔtɛkɛta wa Nzambi, ndo kɛnɛ tshɛ kakandetshaka kakɔtɔnɛka l’Afundelo. Yeso akataka mbala efula ate: “Akafundama ate.” (Mateo 4:4, 7, 10) Oma lâsɔ ko nde nshila divɛsa dimɔtshi. Woho akɔ wâmɛ mbele, ekambi waki Nzambi wa nshi nyɛ hawetsha tokanyi tawɔ hita. Vɔ mbetawɔka dia Bible kekɔ Ɔtɛkɛta wa Nzambi ndo vɔ tondjaka wetshelo awɔ oma lo kɛnɛ katatɔ.

8. Kakɔna kalɔmbama dia ntɛmɔla Jehowa?

 ⁸ Wanɛ wele l’ɔtɛmwɛlɔ wa mɛtɛ tɛmɔlaka paka Jehowa oto ndo mbeyanyaka lokombo lande. Yeso akate ate: “Jehowa Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu w’ekila.” (Mateo 4:10) Ɔnkɔnɛ, ekambi waki Nzambi hawɔtɛmɔla ndoko onto okina paka Jehowa oto. Ɔtɛmwɛlɔ ɔsɔ nɔmbaka nto dia mbewoya anto akina ele lokombo laki Nzambi ka mɛtɛ ndo woho w’onto wende. Osambo 83:18 (NW) mbutaka ɔnɛ: “Anto weye vate: lokombo layɛ Jehowa. Wɛmɛ kele Nkum’Olongo lâdiko dia nkɛtɛ k’otondo.” Yeso akasha ɛnyɛlɔ lo nkimanyiya anto akina dia mbeya Nzambi, oko wakandate lo dɔmbɛlɔ ate: “Dimi lakeyanya lokombo layɛ le anto wakayambisha oma l’andja ɔnɛ.” (Joani 17:6) Woho akɔ wâmɛ mbele, ɛlɔ kɛnɛ atɛmɔdi wa mɛtɛ mbetshaka anto akina lokombo laki Nzambi, asangwelo ande ndo waonga ande.

9, 10. Lo toho takɔna tɛnyana Akristo wa mɛtɛ ngandji lam’asawɔ?

⁹ Ekambi waki Nzambi wekɔ la ngandji ka mɛtɛ ndo kaha la lokaki lam’asawɔ. Yeso akate ate: “Oma lo dikambo nɛ, anto tshɛ wayeya dia nyu nyekɔ ambeki ami naka nyayokana ngandji lam’asanyu.” (Joani 13:35) Akristo wa ntondo wakokanaka ngandji ka ngasɔ lam’asawɔ. Woho wa ngandji katɔlɔmba Nzambi minyaka wekamu wa lokoho la demba, wa tshunda la wa wodja ndo sanganyaka anto kâmɛ lo dimama diahakakitɔna dia nkumbo ka mɛtɛ k’onto l’ɔnango. (Kɔlɔsayi 3:14) Anto wa l’ɛtɛmwɛlɔ wa kashi bu la nkumbo k’onto l’ɔnango kele la ngandji ka ngasɔ. Ngande weyaso dikambo sɔ? Vɔ ndjakanaka lam’asawɔ l’ɔtɛ wewɔ kema wodja kana dioho ɔtɔi. Akristo wa mɛtɛ hawɔshi ekoma dia ndjaka anangɛwɔ Akristo kana anto akina. Bible mbutaka ɔnɛ: “Ana wa Nzambi la ana wa Diabolo mbeyamaka lo dikambo nɛ: Onto tshɛ lahasale kɛnɛ kele ɔlɔlɔ bu ɔna Nzambi, popo ndo onto lahalange ɔnango. . . . Sho pombaka mbokana ngandji, aha oko Kɛna laki ɔna Kanga kɔlɔ ndo lakadiake ɔnango.”​—1 Joani 3:10-12; 4:20, 21.

 ¹⁰ Ngandji ka mɛtɛ halembetshiya tsho ntona dia ndjaka anto akina. Akristo wa mɛtɛ kambaka la wenya, wolo ndo ekundji awɔ dia kimanyiyana ndo dia keketshana. (Hɛbɛru 10:24, 25) Vɔ kimanyiyanaka lo tena dia pâ ndo vɔ salɛka anto akina akambo la losembwe. Lo nsɛnɔ yawɔ, vɔ mɛtɛ kambaka la dako dia lo Bible diata ɔnɛ: “Tosalɛke anto tshɛ ɔlɔlɔ.”​—Ngalatiya 6:10.

11. Lande na kele ekɔ ohomba mbetawɔ Yeso Kristo oko ehomɔ kaki Nzambi katosha panda?

¹¹ Akristo wa mɛtɛ mbetawɔka Yeso Kristo oko ehomɔ kaki Nzambi katosha panda. Bible mbutaka ɔnɛ: “Panda keema oma le onto okina, nɛ dia ndooko lokombo lokina lakashama le anto l’ɛse olongo lahomba toshimbɛ.” (Etsha 4:12) Oko wakatadiɛnyi lo tshapita 5, Yeso akakimɔ lɔsɛnɔ lande oko oshinga w’etshungwelo dikambo di’anto wele la okitanyiya. (Mateo 20:28) Ndo nto, Yeso ekɔ Nkumekanga kakasɔnama oma le Nzambi lo Diolelo dia l’olongo diayolɛ nkɛtɛ k’otondo. Ndo Nzambi tɔlɔmbaka dia sho nkitanyiya Yeso ndo nkamba la wetshelo ande naka sho nangaka ndjokondja lɔsɛnɔ la pondjo. Diɔ diakɔ diata Bible ɔnɛ: “Onto tshɛ lele la mbetawɔ le Ɔna ayokondja lɔsɛnɔ la pondjo. Onto tshɛ lahakitanyiya Ɔna hatokondja lɔsɛnɔ.”​—Joani 3:36.

12. Aha monga ose andja ɔnɛ kɛdikɛdi na?

¹² Atɛmɔdi wa mɛtɛ kema ase andja ɔnɛ. Etena kakinde lo tuminadi la ntondo ka Pilato, ɔnɔmbɔdi w’ose Rɔmɔ, Yeso akate ate: “Diolelo diami bu dia l’andja ɔnɛ.” (Joani 18:36) Oyadi lo wodja akɔna wasɛnawɔ, ambeki wa mɛtɛ waki Yeso wekɔ ambolami wa Diolelo diande dia l’olongo, diakɔ diewɔ hawoyatambiya kânga yema lo awui wa pɔlitikɛ wa l’andja ɔnɛ. Vɔ hawoyatambiya lo ewanu awɔ. Koko, atɛmɔdi wa Jehowa hawoshimbe anto akina dia vɔ monga lo olui ɔmɔtshi wa pɔlitikɛ, dia vɔ mbidja elungi dia monga owandji kana dia vɔ nsala vɔtɛ. Kânga mbele atɛmɔdi wa mɛtɛ waki Nzambi hawoyatambiya lo awui wa pɔlitikɛ, vɔ nɛmiyaka ɛlɛmbɛ wa wodja. Lande na? Nɛ dia Ɔtɛkɛta wa Nzambi mbadjangɛka dia ‘mbetawɔ awui w’ewandji wa lâdiko.’ (Rɔmɔ 13:1) Koko,  etena kalɔshana kɛnɛ kalɔmba Nzambi la kɛnɛ kalɔmba ewandji wa pɔlitikɛ, atɛmɔdi wa mɛtɛ ndjelaka ɛnyɛlɔ kaki apɔstɔlɔ wakate ɔnɛ: “Sho pombaka nkitanyiya Nzambi oko wende owandji lo dihole dia nkitanyiya anto.”​—Etsha 5:29; Makɔ 12:17.

13. Ngande wɔsa ambeki wa mɛtɛ waki Yeso Diolelo diaki Nzambi, ndo asalawɔ?

¹³ Ambeki wa mɛtɛ waki Yeso sambishaka ɔnɛ Diolelo diaki  Nzambi mbele tshɔi y’elongamelo k’anto. Yeso akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” (Mateo 24:14) Lo dihole dia nkeketsha anto dia mendɛ le mandji y’ana w’anto dia nkandola ekakatanu awɔ, ambeki wa mɛtɛ waki Yeso Kristo mbewoyaka dia Diolelo diaki Nzambi dia l’olongo mbele tshɔi y’elongamelo k’anto. (Osambo 146:3) Yeso akatetsha dia nɔmbaka dikambo dia lowandji lɔsɔ la kokele etena kakandate ate: “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.” (Mateo 6:10) Ɔtɛkɛta wa Nzambi wakatatshi dia Diolelo sɔ dia l’olongo “diayulanya waulelu ako tshe [wa nshi nyɛ], diayâshila ushiki, ku dio diame diayushikikala pundju.”​—Danyɛlɛ 2:44.

14. Ɔtɛmwɛlɔ akɔna wafɔnyayɛ dia vɔ mbakotsha kɛnɛ kalɔmbama dia mbelamɛ ɔtɛmwɛlɔ wa mɛtɛ?

¹⁴ Lo ndjela kɛnɛ komaso la nsɛdingola, yambola wate: ‘Ɔtɛmwɛlɔ akɔna wele wetshelo awɔ tshɛ tombaka paka oma lo Bible ndo weyanya lokombo la Jehowa? Ɔtɛmwɛlɔ akɔna wokana woho wa ngandji katɔlɔmba Nzambi, wele la mbetawɔ le Yeso, wahayatambiya l’awui wa l’andja ɔnɛ ndo wewoya ɔnɛ Diolelo diaki Nzambi mbele tshɔi y’elongamelo ka shikaa le anto? Lo ɛtɛmwɛlɔ tshɛ wa la nkɛtɛ, wakɔna wakotsha akambo asɔ tshɛ?’ Kɛnɛ keta mɛnyaka hwe dia Ɛmɛnyi wa Jehowa mbele ɔtɛmwɛlɔ ɔsɔ.​—Izaya 43:10-12.

15. Lâdiko dia mbetawɔ ɔnɛ Nzambi ekɔ, kakɔna kahombaso nsala?

¹⁵ Dia ngɛnyangɛnya Nzambi, aha paka monga la mbetawɔ keto le nde ko pe. Bible mbutaka dia kânga ɛdiɛngɛ mbetawɔka dia Nzambi ekɔ. (Jakɔba 2:19) Lâsɔ, mbokɛmaka hwe dia vɔ hawosale lolango laki Nzambi ndo hawetawɔma le nde. Dia mbetawɔma le Nzambi, hatohombe tsho mbetawɔ dia nde ekɔ, koko sho pombaka nto nsala lolango lande. Sho pombaka nto ntomba oma lo ɔtɛmwɛlɔ wa kashi ko mbɔtɔ l’ɔtɛmwɛlɔ wa mɛtɛ.

16. Ahombaso nsala diaha ndjatambiya l’ɔtɛmwɛlɔ wa kashi?

 ¹⁶ Ɔpɔstɔlɔ Pɔɔlɔ akɛnya dia sho hatohombe ndjatambiya l’ɔtɛmwɛlɔ wa kashi. Nde akafunde ate: “‘Nyotombe oma l’atei awɔ ndo nyokakitɔne la wɔ,’ mbata Jehowa, ‘ndo tanyonandake ɛngɔ ka mindo,’ ‘ko dimi layonyolongola.’” (2 Kɔrɛtɔ 6:17; Izaya 52:11) Ɔnkɔnɛ, Akristo wa mɛtɛ mbewɔka dikambo tshɛ diɔtɔnɛ l’ɔtɛmwɛlɔ wa kashi.

17, 18. Ele “Babilɔna ka Woke,” ndo lande na kahombama ‘ntomba oma l’atei atɔ’ esadi esadi?

¹⁷ Bible mɛnyaka dia weho w’ɛtɛmwɛlɔ wa kashi efula wekɔ l’atei wa “Babilɔna ka Woke.” * (Ɛnyɛlɔ 17:5) Lokombo lɔsɔ toholaka osomba w’edjedja wa Babilɔna, lɛnɛ akamɛ ɔtɛmwɛlɔ wa kashi l’ɔkɔngɔ wa Mvula k’elola. Wetshelo ndo ditshelo efula diele ɛlɔ kɛnɛ l’ɛtɛmwɛlɔ wa kashi diakatatɛ edja efula oma la Babilɔna. Ɛnyɛlɔ, ase Babilɔna wakatɛmɔlaka Losato l’osanto kana osanga wa nzambi shato. Ɛlɔ kɛnɛ, Losato l’osanto ekɔ wetshelo w’ohomba l’ɛtɛmwɛlɔ efula. Koko Bible mbetshaka hwe dia Jehowa oto mbele Nzambi ɔtɔi ka mɛtɛ ndo Yeso Kristo ekɔ Ɔnande. (Joani 17:3) Ase Babilɔna waketawɔka nto di’anto wekɔ l’anima wahavu, watshikala la lɔsɛnɔ l’ɔkɔngɔ wa nyɔi ka demba ndo wakoka nsowa lo dihole di’asui. Ɛlɔ kɛnɛ, ɛtɛmwɛlɔ efula wekɔ lo mbetsha dietawɔ di’ɔnɛ anima kana nyuma kahavu koka nsowa lo ifɛrnɔ wa dja.

¹⁸ Lam’ele ɔtɛmwɛlɔ w’ase Babilɔna k’edjedja wakadiangana l’andja w’otondo, Babilɔna ka Woke ka nshi nyɛ koka mbɔsama mɛtɛ oko tshunda di’ɛtɛmwɛlɔ wa kashi wa l’andja w’otondo. Ndo Nzambi akate dia tshunda sɔ di’ɛtɛmwɛlɔ wa kashi diayolanyema la shashimoya. (Ɛnyɛlɔ 18:8) Onde wɛ ambɛna lande na kele ekɔ ohomba ntomba oma lo Babilɔna ka Woke? Jehowa Nzambi nangaka wɛ ‘ntomba oma l’atei atɔ’ esadi esadi kam’eke etena.​—Ɛnyɛlɔ 18:4.

19. Kakɔna kayoyokondja lo kambɛ Jehowa?

 ¹⁹ Etena kayoyɔsa yɛdikɔ ya mpembola losambi tshɛ la ɛtɛmwɛlɔ wa kashi, anto amɔtshi wayotona mbekesanɛ la yɛ. Koko naka wɛ kambɛ Jehowa l’ɔnɔngɔ w’ekambi ande, kete kɛnɛ kayoyokondja ayoleka kɛnɛ kayoyoshisha la fwa. Lo ɛnyɛlɔ k’ambeki waki Yeso wa ntondo wakatshike diangɔ tshɛ dia mboyela, wɛ ayonga l’ananyɔ ndo l’akadiyɔ efula wa lo nyuma. Wɛ ayonga l’atei wa nkumbo ka woke ka l’andja w’otondo kokengami la miliyɔ y’Akristo wa mɛtɛ wokana ngandji k’oshika. Ndo wɛ ayonga l’elongamelo ka diambo ka lɔsɛnɔ la pondjo “l’andja wayaye.” (Makɔ 10:28-30) Ondo l’edjedja ka wonya, wanɛ wakatone dia mbekesanɛ la yɛ l’ɔtɛ w’awui wetawɔyɛ wayoyɔsɛdingola kɛnɛ ketsha Bible ko ndjokoma atɛmɔdi waki Jehowa.

20. Kakɔna kakongɛ wanɛ wele l’ɔtɛmwɛlɔ wa mɛtɛ lo nshi yayaye?

²⁰ Bible mbetshaka dia kem’edja, Nzambi ayanga nkomiya andja ɔnɛ wa kɔlɔ ko mbela andja w’oyoyo wa losembwe wayonga l’ɛse k’ɛlɔmbwɛlɔ ka Diolelo diande. (2 Petero 3:9, 13) Ɔsɔ ayonga andja wa diambo efula mɛtɛ! Ndo l’andja w’oyoyo wa losembwe ɔsɔ, ayonga paka ɔtɛmwɛlɔ ɔtɔi, mbuta ate ɔtɛmwɛlɔ wa mɛtɛ. Shi ayonga dui dia lomba le yɛ dia mbɔsa tɛdikɔ tahombama dia monga kâmɛ l’atɛmɔdi wa mɛtɛ oma ko kakianɛ?