WEKELO 01
Ngande wakoka Bible kokimanyiya?
Suke la sho tshɛ tekɔ la ambola wendana la lɔsɛnɔ, asui, nyɔi ndo la nshi yayaye. Sho ndjakiyanyaka nto di’akambo wa lushi la lushi wele oko, woho wa ndjasɛnya ndo wa monga la nkumbo k’ɔngɛnɔngɛnɔ. Anto efula mɛnaka dia Bible mbashaka ekadimwelo lo ambola wa weke wa lo lɔsɛnɔ ndo tɔ mbashaka nto alako w’ohomba wendana la lɔsɛnɔ la lushi la lushi. Onde wɛ mbɔsaka di’onto tshɛ koka nkondja wahɔ oma lo Bible?
1. Naa ambola amɔtshi wakadimola Bible?
Bible kadimolaka lo ambola w’ohomba anɛ: Ngande wakatatɛ lɔsɛnɔ? Naa oyango wa lɔsɛnɔ? Lande na kasowa anto waha l’onongo? Ngande wayala onto etena kavɔnde? Naka onto tshɛ nangaka wɔladi, ko lande na kalɔɔma ata? Ngande wayoyala nkɛtɛ lo nshi yayaye? Bible tokeketshaka dia nyanga ekadimwelo lo ambola asɔ ndo miliyɔ y’anto mɛnaka di’ekadimwelo washatɔ wekɔ amɛna efula.
2. Ngande wakoka Bible tokimanyiya dia ngɛnangɛna la lɔsɛnɔ laso la lushi la lushi?
Bible toshaka alako w’amɛna. Ɛnyɛlɔ, tɔ mbetshaka waa nkumbo woho wakokayɔ mɛtɛ monga l’ɔngɛnɔngɛnɔ. Tɔ mbishaka alako lo woho wa ndɔshana l’ekiyanu ndo woho wa ngɛnangɛna olimu. Wɛ ayeya kɛnɛ ketsha Bible l’akambo asɔ ndo l’akambo akina efula etena kayoteka awui wele lo dibuku nɛ kaamɛ. Wɛ ayokoka mbetawɔ dia “Afundelo tshɛ [kɛnɛ tshɛ kele lo Bible] wekɔ . . . ohomba.”—2 Timɔte 3:16.
Dibuku nɛ hadiɔhɛnɛ Bible. Koko diɔ kokeketshaka dia wɛmɛ nsɛdingola Bible. Ɔnkɔnɛ, tambokokeketsha dia mbadia avɛsa tshɛ wele lo wekelo tshɛ ndo mbɛdika avɛsa akɔ la kɛnɛ kekayɛ.
NYOMOTSHIMOLA
Eka woho wakakimanyiya Bible anto, woho wakokayɛ ngɛnangɛna wadielo atɔ ndo lande na kele ekɔ ohomba di’onto kokimanyiya dia wɛ kishihodia.
3. Bible koka tɔlɔmbɔla
Bible kekɔ oko osase wa woke. Bible koka tokimanyiya dia mbɔsa tɛdikɔ t’amɛna ndo dia mbeya kɛnɛ kayosalema lo nshi yayaye.
Nyadia Osambo 119:105, ndo oma laasɔ, nyɔkɛtshanya ambola anɛ:
-
Ngande wakɔsaka ofundji w’osambo ɔnɛ Bible?
-
Ngande wɔsayɛ Bible?
4. Bible koka mbisha ekadimwelo lo ambola aso
Womoto ɔmɔtshi akɛnyi woho wakakadimola Bible lo ambola wakotshindjaka wɔɔngɔ l’edja k’ɛnɔnyi efula. Nyende VIDƐO, ndo oma laasɔ, nyɔkɛtshanya ambola wayela anɛ:
-
Lo ndjela vidɛo nyɛ, ambola akɔna waki la womoto ongo?
-
Ngande wakokimanyiya wekelo wa Bible?
Bible tokeketshaka dia mboka ambola. Nyadia Mateo 7:7, ndo oma laasɔ, nyɔkɛtshanya dimbola diayela nɛ:
-
Ambola akɔna wele layɛ wakoka Bible kosha ekadimwelo?
5. Wɛ koka ngɛnangɛna wadielo wa Bible
Anto efula ngɛnangɛnaka wadielo wa Bible ndo wekɔ lo nkondja wahɔ oma lɔkɔ. Nyende VIDƐO, ndo oma laasɔ, nyɔkɛtshanya ambola wayela anɛ:
-
Lo ndjela vidɛo nyɛ, naa kanyi yaki l’ɛlɔngɔlɔngɔ l’esekaseka engo lo kɛnɛ kendana la wadielo?
-
Kaanga mbakiwɔ konangaka wadielo, lande na kowolanga mbadia Bible?
Bible mbutaka dia tɔ koka tosha alako watosamba ndo watosha elongamelo. Nyadia Rɔmɔ 15:4, ndo oma laasɔ, nyɔkɛtshanya dimbola nɛ:
-
Onde daka diasha Bible dia tosamba ndo tosha elongamelo kɔngɛnyangɛnyaka?
6. Anto akina koka tokimanyiya dia nshihodia Bible
Laadiko dia vɔ mbadia Bible lo vɔamɛ, anto efula wakɛnyi dia kikɛtshanya l’anto akina kimanyiyaka efula. Nyadia Etsha 8:26-31, ndo oma laasɔ, nyɔkɛtshanya dimbola nɛ:
-
Ngande wakokaso nshihodia Bible?—Enda divɛsa 30 ndo 31.
Pami k’ose Etiyɔpiya aki l’ohomba w’ekimanyielo dia shihodia Afundelo. Anto efula ɛlɔ kɛnɛ mɛnaka dia vɔ kimanyiyamaka efula lo nkɛtshanya Bible l’anto akina
ANTO AMƆTSHI MBUTAKA ƆNƐ: “Mbeka Bible ekɔ wetshelo wa wenya.”
-
Kakɔna kayoyota? Lande na?
LO TSHENA PE
Bible mbishaka alako wendana la lɔsɛnɔ la lushi la lushi, kadimolaka lo ambola w’ohomba, sambaka anto ndo mbashaka elongamelo.
Ovuswelo
-
Alako wa ngande wakokaso ntana lo Bible?
-
Naa ambola amɔtshi washa Bible ekadimwelo?
-
Kakɔna kayolanga mbeka oma lo Bible?
SALA EYANGELO
Enda woho wele alako wa lo Bible ohomba le so ɛlɔ kɛnɛ.
“Wetshelo wa lo Bible—Lomba latshikala pondjo” (Tshoto y’Etangelo No. 1 2018)
Enda woho wakakimanyiya Bible pami kɛmɔtshi kakalɔshanaka l’okakatanu ɔmɔtshi oma ko dikɛnda.
Sɛdingola dako di’ohomba diasha Bible dikambo dia lɔsɛnɔ la nkumbo.
Eka woho wakalɔngɔsɔla Bible tokanyi ta kɔlɔ taki l’anto lo kɛnɛ kendana l’onto mɛtɛ lalɔmbɔla andja.
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
