1, 2. Ngande wakashola Jehowa sangwelo diande lo kɛnɛ kendana l’anto?

AMBUTSHI wele la ngandji sawolaka l’anawɔ akambo wa lo nkumbo kaamɛ. Koko, vɔ mongaka la shɛnɔdi lo kɛnɛ kendana la weho w’akambo wasawolawɔ la wɔ. Vɔ sawolaka la wɔ paka akambo wɛnawɔ di’anawɔ wekɔ l’akoka wa mbashihodia.

² Woho akɔ waamɛ mbele, Jehowa ekɔ lo tasholɛ anto sangwelo diande. Koko nde salaka dui sɔ paka etena kɛnande dia ekɔ ohomba. Tɔsɛdingole lo tshena pe woho watashola Jehowa akambo wa mɛtɛ wendana la Diolelo l’edja k’ɔkɔndɔ w’ana w’anto.

3, 4. Onde Jehowa akatakonge la ntondo kɛnɛ kakahombe ndjosalema l’ɔkɔndɔ w’ana w’anto? Lembetshiya.

³ Oma l’etatelo, Diolelo dia Mɛsiya komonga l’atei wa sangwelo dia Jehowa. Lande na? Nɛ dia Jehowa kotakonge la ntondo kɛnɛ kakakoke ndjosalema l’ɔkɔndɔ w’ana w’anto; ndo nto, nde akatonge anto la lotshungɔ la nsɔna kɛnɛ kalangawɔ. Diakɔ diakatɛ Jehowa Adama l’Eva lo kɛnɛ kendana la sangwelo diande lo dikambo di’anto ate: “Nyuyali la diwutshi, nyufulaneli, nyuludia kete, nyuyûleli.” (Etat. 1:28) Jehowa akaalɔmbɛ nto dia vɔ nkitanyiya ɛlɛmbɛ ande wendana la kɛnɛ kele ɔlɔlɔ la kɛnɛ kele kɔlɔ. (Etat. 2:16, 17) Diakɔ diele, Adama l’Eva wakakoke nsɔna dia ntshikala la kɔlamelo le Jehowa. Otondonga vɔ la tokanula tawɔ wakasale dui sɔ, tshike toototonga l’ohomba wa Diolelo dialɔmbwama oma le Kristo dia nkotsha sangwelo diaki Nzambi. Koko keema edja nto, andja w’otondo wayanga ndola l’anto wa kokele wayɔtɛmɔlaka Jehowa.

⁴ Kaanga mbakatɔmbɔkɔ Satana nde l’Adama l’Eva, Jehowa kootshika sangwelo diande dia ndodia nkɛtɛ k’otondo l’anto wa kokele. Kɛnɛ kele mɛtɛ ele, Jehowa akakambe la yoho nkina dia nkotsha sangwelo sɔ. Sangwelo dia Jehowa bu oko kawolo katalawɔ dia nkoma lo dihole dimɔtshi, ko tonganyiyama oma lo mboka katɔ l’ɔtɛ w’ɛkɔkɔ ɛmɔtshi. Koko, naka Jehowa amboshikikɛ sangwelo diande, kete ndooko wolo wa l’andja ɔnɛ wakoka nshimba okotshamelo  adiɔ. (Adia Isaya 55:11.) Ndo naka wekamu ɔmɔtshi wamboyonga, Jehowa kambaka la yoho kina dia dikotsha. * (Etum. 3:14, 15) Etena kɛnande dia dui sɔ diaya ohomba, Jehowa mbewoyaka ekambi ande wa kɔlamelo yoho yayokamba la nde dia nkotsha sangwelo diande.

5. Kakɔna kakasale Jehowa etena kakatombe ɔtɔmbɔkwɛlɔ l’ekambɔ k’Ɛdɛna?

⁵ Dia mbisha okadimwelo lo ɔtɔmbɔkwɛlɔ wakatombe l’ekambɔ k’Ɛdɛna, Jehowa akayodja Diolelo l’atei wa sangwelo diande. (Mat. 25:34) Etena kaki anto lo wodjima lo kɛnɛ kendana la dui sɔ, Jehowa akashola ehomɔ kakandahombe nkamba la tɔ dia nkotsha sangwelo diande lo dikambo di’anto ndo dia nshidiya awui tshɛ wa kɔlɔ wambosalema lo ɛlɔmbwɛlɔ ka Satana. (Etat. 3:14-19) Kaanga mbakidiɔ ngasɔ, Jehowa kombisholɛ anto oseka kiambokambo tshɛ yendana la Diolelo sɔ mbala kakɔ ɔtɔi.

6. Kakɔna kakalake Jehowa, ko kakɔna kakinde kombisholɛ anto?

⁶ Lo prɔfɛsiya ka ntondo ka lo Bible, Jehowa akalake dia nde ayotondja “kanula” yakahombe ndjominola olui. (Adia Etatelu 3:15.) Koko, kanula shɔ ndo kanula y’olui kombeyama l’etena kɛsɔ. Jehowa akayosha elembetshielo efula wendana la dui sɔ paka l’ɔkɔngɔ w’ɛnɔnyi 2 000. *

7. Lande na kakasɔnɛ Jehowa Abrahama, ndo wetshelo akɔna wakondjaso lo dikambo sɔ?

⁷ L’ɔkɔngɔ diko, Jehowa akayɔsɔna Abrahama dia kanula yakalakema ntomba oma l’ɔlɔndji ande. Jehowa akasɔnɛ Abrahama nɛ dia nde ‘akakitanyiyaka dui diande.’ (Etat. 22:18) Wetshelo w’ohomba wakondjaso oma lo dui sɔ ele, Jehowa mbisholaka sangwelo diande paka le wanɛ wawoka wɔma wɔsɔhanyemi la dilɛmiɛlɔ.—Adia Osambu 25:14.

8, 9. Awui akɔna wendana la kanula yakalakema wakasholɛ Jehowa Abrahama nde la Jakɔbɔ?

⁸ Etena kakandatɛkɛtaka la Abrahama w’ɔngɛnyi ande lo tshimbo ya ondjelo, Jehowa akawosholɛ mbala ka ntondo dui di’ohomba diendana la kanula yakalakema shɔ ate: Nde ayonga onto. (Etat. 22:15-17; Jak. 2:23) Ko ngande wakahombe kanula shɔ ndjominola olui? Aaki olui ɔsɔ? Awui akina wakayoshɔma wakahombe ndjosha ekadimwelo lo ambola asɔ.

⁹ Jehowa akashikikɛ dia kanula yakalakema yayotomba oma le Jakɔbɔ y’okana w’Abrahama, ɔnɛ laki la mbetawɔ ka wolo le Nzambi. (Etat. 28:13-22) Lo tshimbo ya Jakɔbɔ, Jehowa akashola dia kanula shɔ yakahombe ndjotomba oma le Juda y’ɔnaki Jakɔbɔ. Jakɔbɔ akatatshi dia kanula ya Juda shɔ yakahombe ndjolongola “danga,” dialembetshiya lowandji ndo ehomɔ ‘kakahombe akanga w’okitanyiya ndjokondja wahɔ oma lɔkɔ.’ (Etat. 49:1, 10) Oma lo prɔfɛsiya kɛsɔ, Jehowa akɛnya dia Kanula yakalakema shɔ yakahombe ndjonga ɔnɔmbɔdi, mbuta ate nkumekanga.

10, 11. Lande na kakasholɛ Jehowa Davidɛ ndo Danyɛlɛ sangwelo diande?

¹⁰ Ɛnɔnyi oko 650 l’ɔkɔngɔ diko, Jehowa akashola akambo efula wendana la sangwelo diande le nkumekanga  Davidɛ laki kanula ya Juda. Jehowa akate lo dikambo dia Davidɛ ate: ‘Nde ekɔ onto lalangami.’ (1 Sam. 13:14; 17:12; Ets. 13:22) Lam’ele Davidɛ akokaka Nzambi wɔma wɔsɔhanyemi la dilɛmiɛlɔ, Jehowa akadje la nde sheke, lo mbolaka ɔnɛ kanula yande mɔtshi yayoyɔlɔmbɔla pondjo.—2 Sam. 7:8, 12-16.

¹¹ Ɛnɔnyi oko 500 l’ɔkɔngɔ, Jehowa akakambe l’omvutshi Danyɛlɛ dia mbisholɛ anto ɔnɔnyi shikaa wakahombe Okitami w’esɔ ɔsɔ, kana Mɛsiya mɛnama la nkɛtɛ. (Dan. 9:25) Jehowa akɔsaka Danyɛlɛ ‘la nɛmɔ di’efula.’ Lande na? Nɛ dia Danyɛlɛ akalɛmiyaka Jehowa efula ndo akookambɛka l’etete.—Dan. 6:16; 9:22, 23.

12. Kakɔna kakadjangɛ Jehowa Danyɛlɛ, ndo lande na?

¹² Kaanga mbakakambe Jehowa la amvutshi wa kɔlamelo wele oko Danyɛlɛ dia mfunda awui efula wendana la kanula yakalakema, mbuta ate Mɛsiya, ɔsɔ komonga etena kakahombe ekambi wa Jehowa nshihodia kitshimudi y’akambo wakandaasambiya dia mfunda asɔ. Ɛnyɛlɔ, l’ɔkɔngɔ wa nde mbɛɛnya lo ɛnɛlɔ oshikimadielo wa Diolelo diaki Nzambi, Jehowa akatɛ Danyɛlɛ dia nde mbishɛ awui wa lo prɔfɛsiya kɛsɔ polo lo etena kakandashikikɛ. Koko lo nshi y’otsha la ntondo, ewo ka mɛtɛ kakahombe ‘ndjofulanɛ.’—Dan. 12:4.

13. a) Aaki kanula yakalakema? b) Elembetshielo akɔna wendana la prɔfɛsiya kele lo Etatelu 3:15 wakasha Yeso?

¹³ Jehowa akɛnya hwe dia Yeso mbaki kanula yakalakema, mbuta ate kanula ya Davidɛ yakahombe ndjolɛ oko Nkumekanga. (Luka 1:30-33; 3:21, 22) Etena kakatatɛ Yeso olimu ande, aki oko osase mbakayahɛtɛka anto wa l’andja lo kɛnɛ kendana la sangwelo dia Nzambi. (Mat. 4:13-17) Ɛnyɛlɔ, Yeso akashidiya taamu tshɛ tendana la “ului” wɔtɛkɛtami lo Etatelu 3:14, 15, welamɛ ɔnɛ Diabolo, lele “ondjakanyi” ndo “she kashi.” (Jni. 8:44) Lo ɛnɛlɔ kakandɛnya Joani kɛsɔ, Yeso akɛnya dia ‘olui w’edjedja ɔsɔ’ ekɔ “Diabolo ndo Satana.” * (Adia Ɛnyɛlɔ 1:1; 12:9.) Lo ɛnɛlɔ kakɔ kaamɛ, Yeso akɛnya woho wakandahombe ndjominola Satana, dia nkotsha prɔfɛsiya kakatatami l’ekambɔ k’Ɛdɛna.—Ɛny. 20:7-10.

14-16. Onde ambeki wa Yeso wa lo ntambe ka ntondo wakashihodiaka tena tshɛ akambo wa mɛtɛ wakandawasholɛka? Lembetshiya.

¹⁴ Oko wakatadiɛnyi loTshapita 1 ya dibuku nɛ, Yeso akatɛkɛta efula lo kɛnɛ kendana la Diolelo. Koko, nde kombisholɛ ambeki ande oseka kiambokambo tshɛ yakawakombolaka mbeya. Ndo kaanga etena kakawasha Yeso elembetshielo wa shikaa, paka l’ɔkɔngɔ diko, mbuta ate l’ɔkɔngɔ w’ɛnɔnyi nkama, mbakayoshihodiaka ambeki ande akambo wa mɛtɛ wakandawaetsha. Nyɛsɔ tɔsɛdingole bɛnyɛlɔ dimɔtshi.

¹⁵ L’ɔnɔnyi wa 33 T.D., Yeso akɛnya hwe dia anto wayotolɛ kaamɛ la nde lo Diolelo diaki Nzambi wayɔsama oma la nkɛtɛ ndo wayotɔsɛna oko ditongami dia lo nyuma l’olongo. Koko ambeki ande koshihodia dui sɔ mbala kakɔ ɔtɔi. (Dan. 7:18; Jni. 14:2-5) Paka l’ɔnɔnyi akɔ waamɛ, Yeso akɛnya lo  tshimbo ya bɛnyɛlɔ ɔnɛ Diolelo diakahombe ndjoshikikɛma paka edja efula l’ɔkɔngɔ wa nde mbudɛ l’olongo. (Mat. 25:14, 19; Luka 19:11, 12) Ambeki waki Yeso koshihodia dui di’ohomba sɔ ndo wakayowombola l’ɔkɔngɔ wa eolwelo kande vate: “Onde wɛ ayanga mbololɛ Isariyɛlɛ diolelo l’etena kɛnɛ?” Koko Yeso akɛnyi ohomba diaha mbasholɛ akambo efula l’etena kɛsɔ. (Ets. 1:6, 7) Ndo nto, Yeso aketsha dia ekɔ “ɛkɔkɔ ekina” wele bu l’atei wa “lemba la tshitshɛ l’ɛkɔkɔ” wayotolɛ kaamɛ la nde. (Jni. 10:16; Luka 12:32) Ambeki wa Kristo koshihodia dimɛna kɛnɛ kakandawatɛ lo dikambo di’elui ehende ɛsɔ, ndo paka l’ɔkɔngɔ wa Diolelo shikikɛma lo 1914 mbakawayokishihodia.

¹⁶ Yeso aki l’awui efula wa mbutɛ ambeki ande etena kakinde kaamɛ la wɔ la nkɛtɛ, koko nde akeyaka dia vɔ komonga l’akoka wa mbashihodia tshɛ. (Jni. 16:12) Eelo mɛtɛ, akambo efula wa mɛtɛ wendana la Diolelo wakashɔma lo ntambe ka ntondo. Koko, ɔsɔ komonga etena kakahombe ewo ka mɛtɛ kɛsɔ fulanɛ.

17. Kakɔna kahombaso nsala dia nshihodia akambo wa mɛtɛ wendana la Diolelo, ko kakɔna nto kele ohomba?

¹⁷ Jehowa akatɛ Danyɛlɛ ate lo “etena k’ekumelu,” anto “wayulawolawo lene la lene” ndo ‘ewo ka mɛtɛ’ kendana la sangwelo diaki Nzambi kayofulanɛ. (Dan. 12:4) Wanɛ walanga nkondja ewo kɛsɔ pombaka mbidja welo dia kikondja. Dibuku dimɔtshi mɛnyaka dia etelo ka lo Hɛbɛru kokadimɔmi ɔnɛ ‘ndawɔlawɔ lɛnɛ la lɛnɛ’ mbelaka kanyi y’onto lasɛdingola dibuku dimɔtshi la yambalo tshɛ. Ndooko dui dia lo Bible diendana la Diolelo diakokaso nshihodia tshɛ lo tshɛ naka aha oma l’ekimanyielo ka Jehowa.—Adia Mateo 13:11.

18. Ngande wakɛnɛmɔla wanɛ woka Jehowa wɔma mbetawɔ ndo okitshakitsha?

 ¹⁸ Oko wakatasholɛka Jehowa ekambi ande akambo wa mɛtɛ wendana la Diolelo la ntondo ka 1914, mbatandatetemala nsala ndo lo nshi y’ekomelo nyɛ. Oko wayodiɛnya Tshapita 4 ndo 5 ya dibuku nɛ, aya ɛnɔnyi ndekana 100 wele ekambi waki Nzambi wambotshikitanya eokelo kawɔ k’akambo wa mɛtɛ lo waaso efula. Onde kɛsɔ mɛnyaka dia Jehowa haasukɛ? Keema! Nde ekɔ lo mbasukɛ. Lande na? Nɛ dia vɔ kɛnɛmɔlaka waonga ahende wɔɔngɛnyangɛnya, mbuta ate mbetawɔ ndo okitshakitsha. (Hɛb. 11:6; Jak. 4:6) Ekambi waki Jehowa wekɔ la mbetawɔ ɔnɛ alaka ande tshɛ wayokotshama. Ndo vɔ kɛnɛmɔlaka okitshakitsha etena ketawɔwɔ ɔnɛ vɔ wakayakese lo tena dimɔtshi lo kɛnɛ kendana la woho wahomba alaka asɔ kotshama. Dionga di’okitshakitsha sɔ diakɛnyama lo Tshoto y’Etangelo ya Ngɔndɔ ka sato 1, 1925, lo sawo diakataka ɔnɛ: “Sho mbeyaka dia Nkumadiɔndjɔ mbele okimanyedi aso, nde ayolembetshiya ekambi ande Ɔtɛkɛta ande lo yoho yɛnande dimɛna ndo l’etena kɛnande ohomba.”

19. Kakɔna katokimanyiya Jehowa dia sho nshihodia ɛlɔ kɛnɛ, ndo lande na?

¹⁹ Etena kakashikikɛma Diolelo lo 1914, ekambi waki Nzambi waki paka la yema y’ewo tshitshɛ lo kɛnɛ kendana la woho wakahombe prɔfɛsiya yendana la Diolelo kotshama. (1 Kɔr. 13:9, 10, 12) Woho walomɔlomɔso dia mɛna ekotshamelo k’alaka waki Nzambi ndjotokonyaka dia ndjakesa lo tena dimɔtshi. Aya ɛnɔnyi efula wele mɛtɛ k’ɛtɛkɛta wa lo Tshoto y’Etangelo yoshidiso la diko ndjo wambɛnama hwe. Sawo diakɔ diaamɛ diakate nto ɔnɛ: “Dui di’ohomba diahombaso mbeya ele, hatokoke nshihodia prɔfɛsiya paka l’etena kayotokotshama kana ketɔ lo takotshama.” Oko wambotoleka nyɔngɔmɛ lo etena k’ekomelo, prɔfɛsiya efula yendana la Diolelo yamboshila kotshama ndo yekɔ lo takotshama. Lam’ele ekambi waki Nzambi wekɔ l’okitshakitsha ndo mbetawɔka mingɔma, Jehowa ekɔ lo tokimanyiya dia sho monga la  eokelo k’oshika ka sangwelo diande. Lo mɛtɛ, ewo ka mɛtɛ kambofulanɛ.

20, 21. Shɛngiya yakɔna yakonge la otshikitanu wa eokelo ka sangwelo dia Nzambi le Akristo wa lo ntambe ka ntondo?

²⁰ Etena katshikitanya Jehowa eokelo kaso k’akambo wa mɛtɛ, mbetawɔ kaso mbɔtɔka l’ohemba. Ko onde mbetawɔ ndo okitshakitsha wayototshutshuya dia sho mbetawɔ etshikitanu ɛsɔ? Akristo wakasɛnaka lo ntambe ka ntondo waki la ntondo k’ohemba wa ngasɔ. Ɛnyɛlɔ, ohɔsa dia wɛ aki Okristo w’ose Juda wakasɛnaka l’etena kɛsɔ. Wɛ ekɔ lo nkitanyiya Ɛlɛmbɛ wa Mɔsɛ ndo ekɔ l’ofunu w’efula l’ɔtɛ wa sango dia wodja ayɛ. Koko, wɛ ambolongola mikanda wakasambiyama oma le ɔpɔstɔlɔ Pɔɔlɔ wɛnya dia Ɛlɛmbɛ wa Mɔsɛ waya bu ohomba, ndo ɔnɛ Jehowa ambɔsɛka Isariyɛlɛ wa lo demba ndo ootshumanya Isariyɛlɛ wa lo nyuma wokengami l’ase Juda ndo l’ase Wedja. (Rɔmɔ 10:12; 11:17-24; Ngal. 6:15, 16; Kɔl. 2:13, 14) Kakɔna kotoyosala?

²¹ Akristo waki l’okitshakitsha waketawɔ elembetshielo wakasambiyama w’oma le Pɔɔlɔ ndo wakatshɔkwama oma le Jehowa. (Ets. 13:48) Akina wakatone mingɔma ndo wakatetemala nsala akambo lo ndjela eokelo kawɔ hita. (Ngal. 5:7-12) Otondonga Akristo wa kɔlamelo asɔ kotshikitanya ekanelo kawɔ, tshike ndo vɔ lawɔ wotohandja diɛsɛ diawɔ dia monga ekitɔ kaamɛ la Kristo.—2 Pet. 2:1.

22. Ngande wayaokayɛ lo kɛnɛ kendana l’etshikitanu wa eokelo ka sangwelo diaki Nzambi watasalema?

²² Lo ɛnɔnyi akumi weke kambeta ɛnɛ, Jehowa ambɔlɔngɔsɔla eokelo kaso k’akambo wendana la Diolelo. Ɛnyɛlɔ, nde ambotokimanyiya dia sho nshihodia dimɛna etena shikaa kayokakitɔna ambolami wa Diolelo la anto wa kɔlɔ oko ɛkɔkɔ la mbudi. Nde ambotetsha nto etena kayokoka lofulo l’anto 144 000, kɛnɛ kalembetshiya bɛnyɛlɔ diendana la Diolelo diakakambe la Yeso ndo etena kayodɛ Okristo w’ekomelo w’okitami dia tɔsɛnal’olongo. * Ngande wayaokayɛ lo kɛnɛ kendana l’elembetshielo ɛsɔ? Onde mbetawɔ kayɛ keketshamaka? Onde wɛ mbɔsaka elembetshielo ɛsɔ oko djembetelo yɛnya dia Jehowa ekɔ lo ntetemala mbetsha ekambi ande wele l’okitshakitsha? Naka ngasɔ mbediɔ, kete awui wa lo dibuku nɛ wayokeketsha dietawɔ diayɛ di’ɔnɛ Jehowa ekɔ lo tasholɛ ekambi ande wawoka wɔma sangwelo diande.