OHƆSA dia wɛ ekɔ lo ndjalɔngɔsɔla dia ntshɔ l’esambishelo lushi layɛ la vakashi. Wɛ ekɔ lo nanga momuya l’ɔtɛ weyɛ l’ɔlɛmbɛlɔ. Koko, l’ɔkɔngɔ wa wɛ nɔmba Jehowa, wɛ ambɔsa yɛdikɔ ya ntshɔ l’esambishelo. Wɛ ambotomba l’ɔnangɛso kana kadiyɛso k’opalanga kele la kɔlamelo, ndo wɛ ambonandema oma lo ekikelo ndo oma ɔlɔlɔ ande. Etena katanyasambisha lo luudu la luudu, wɛ ambohɔ di’anangɛso l’akadiyɛso wa l’andja w’otondo wekɔ lo nsambisha losango lakɔ laamɛ, wekɔ lo nkamba l’ekanda akɔ waamɛ ndo anto tshɛ wekɔ lo nkondja wahɔ oma lo wetshelo akɔ waamɛ. Etena kamboyokalola la ngelo, wɛ amboka dia wɛ aya la wolo w’efula. Shi wɛ ayɔngɛnangɛna lo woho wahayatshikadi la ngelo?

Ɛlɔ kɛnɛ, olimu w’esambishelo ekɔ olimu woleki woke wa lo Diolelo diaki Nzambi. Yeso akatatshi dia olimu w’esambishelo wayokambema efula lo nshi y’ekomelo. (Mat. 24:14) Ngande wambokotshama prɔfɛsiya kande kɛsɔ? Lo etenyi kɛnɛ, tayɔtɛkɛta di’esambisha, dia toho ndo dia dihomɔ di’ohomba diakamba la so l’esambishelo diakimanyiya miliyɔ y’anto wa l’andja ɔnɛ dia vɔ mɛna ohomba wa Diolelo.