1, 2. a) Lande na kakɔtɔ ambeki wa Yeso l’okakandokando? b) Yeso akatɛkɛtaka dikambo dia dinela diakɔna?

AMBEKI waki Yeso wakɔtɔ l’okandokando etena kakandawatɛ ate: “Nyedia washo, nyende, dikambɔ diambɛla dia muna.” Etena kakawende lɛnɛ akaatshumɛ Yeso lonya, vɔ wakɛnyi paka dikambɔ diahatɛlɛ. Ondo vɔ wakayambola ɔnɛ: ‘Dinela diakɔna sɔ?’ ‘Shi ngɔndɔ efula yaakahombe mbeta la ntondo ka dinela ntatɛ?’—Jni. 4:35.

² Koko, Yeso kɔtɛkɛtaka dia dinela dia mɛtɛ mɛtɛ. Nde akakambe la diaaso sɔ dia mbisha ambeki ande wetshelo ehende w’ohomba wendana la dinela dia lo nyuma, mbuta ate nsambisha anto. Naa wetshelo akɔ? Dia sho mbeya wetshelo ɛsɔ, nyɛsɔ tɔsɛdingole ɔkɔndɔ ɔsɔ lo yoho ya lotshimola.

3 . a) Kakɔna ondo kakatshutshuya Yeso dia mbuta ɔnɛ: “Dikambɔ diambɛla dia muna”? (Enda nɔtɛ.) b) Ngande wakashikikɛ Yeso ɛtɛkɛta ande?

³ Sawo dia Yeso nde l’ambeki ande sɔ diakasalema l’ekomelo k’ɔnɔnyi 30 T.D., suke l’osomba wa Sukara wa la Samariya. Etena kakatshu ambeki ande otsha l’osomba, Yeso akatshikala laa ɛtɛkɔ k’ashi lɛnɛ akandayetshaka womoto ɔmɔtshi akambo wa mɛtɛ, ndo womoto ɔsɔ akashihodia esadi eto ohomba wa wetshelo ande. Etena kakakalola ambeki le Yeso, womoto ɔsɔ akasamanya otsha l’osomba wa Sukara dia totɛ anto akina akambo wa diambo wakinde oma la mboka. Kɛnɛ kakandawatɛ kakaangɛnyangɛnya, ndo efula kawɔ wakatshu esadi eto otsha l’ɛtɛkɔ dia tɛnana la Yeso. Ondo lo diaaso sɔ, mbuta ate lam’akandende oma l’etale ndo lam’akandɛnyi olui wa woke w’ase Samariya wayaye, mbakate Yeso ate: “Nyende, dikambɔ diambɛla dia muna.” * Dia mbaokiya diaha dinela dia mɛtɛ mɛtɛ mbakandataka, koko dia lo nyuma, Yeso akakotsha ate: “Amunyi . . . wekɔ lo ntshumanya elowa dikambo dia lɔsɛnɔ la pondjo.”—Jni 4:5-30, 36.

4. a) Naa wetshelo ehende waketsha Yeso lo kɛnɛ kendana la dinela? b) Ambola akɔna wayangaso nsɛdingola?

⁴ Wetshelo akɔna ehende w’ohomba waketsha Yeso lo kɛnɛ kendana la dinela dia lo nyuma sɔ? Wetshelo wa ntondo ele, olimu ɔsɔ pombaka kambema la shamanya. Ɛtɛkɛta wa Yeso w’ɔnɛ “dikambɔ diambɛla dia muna” aki yoho mɔtshi ya ntshutshuya ambeki ande dia vɔ ndjasha lo dinela  aha la ntshimbatshimba. Dia mɛnya ambeki ɔnɛ olimu ɔsɔ pombaka kambema la shamanya y’efula, Yeso akakotsha ate: “Amunyi wamboshila nongola difuto diawɔ.” L’ɛtɛkɛta ekina, dinela sɔ diakashile ntatɛ ndo ɔsɔ komonga etena ka vɔ ndewalewa. Wetshelo wa hende ele, ekambi wekɔ l’ɔngɛnɔngɛnɔ. Yeso akate dia amboki wa woho ndo amunyi ‘wayɔngɛnangɛna kaamɛ.’ (Jni. 4:35b, 36) Oko waki Yeso ndamɛ l’ɔngɛnɔngɛnɔ dia mɛna ‘ase Samariya efula wonga la mbetawɔ le nde,’ mbakahombe ambeki ande ndjonga l’ɔngɛnɔngɛnɔ lo ndjasha l’anima awɔ tshɛ lo dinela. (Jni. 4:39-42) Ɔkɔndɔ wa lo ntambe ka ntondo ɔsɔ wekɔ la kitshimudi ya laande le so, nɛ dia vɔ tɛnyaka kɛnɛ kasalema nshi nyɛ lo dinela dioleki woke dia lo nyuma. Etena kakɔna kakatatɛ dinela dia lo nshi yaso nyɛ? Waa na wayasha lo dinela sɔ? Etombelo akɔna wambonga?

5. Onto akɔna lalɔmbɔla dinela dia l’andja w’otondo, ndo ngande wɛnya ɛnɛlɔ kakɛnyi Joani di’olimu ɔsɔ pombaka kambema la shamanya?

⁵ Lo ɛnɛlɔ kakandɛnya ɔpɔstɔlɔ Joani, Jehowa akɛnya dia nde akasha Yeso ɔkɛndɛ wa nɔmbɔla olimu wa dinela wa l’andja w’otondo. (Adia Ɛnyɛlɔ 14:14-16.) Lo ɛnɛlɔ kɛsɔ, Yeso ekɔ la dɛmbɔ dia nkoso ndo la lokuwa la mpɛmɔ. Woho wele “dɛmbɔ dia nkoso dia paonyi l’ɔtɛ [wa Yeso]” shikikɛka dia nde ekɔ Nkumekanga koolɛ. “Lokuwa la mpɛmɔ [lele] lo lonya lande” shikikɛka dia nde ekɔ Omunyi a woke. Lo mbuta lo tshimbo ya ondjelo ɔnɛ “diangɔ dia dinela dia la nkɛtɛ diambɛla,” Jehowa akake epole ɔsɛkɛ dia olimu ɔsɔ pombaka kambema la shamanya. Lo mɛtɛ, “wonya wa mina wambokoka,” laasɔ ɔnɛ bu etena ka ndewalewa. Dia nkitanyiya didjango diaki Nzambi di’ɔnɛ “ɔsa lokuwa layɛ,” Yeso akɔshi lokuwa lande ndo akane diangɔ dia la nkɛtɛ, mbuta ate akasambisha anto. Ɛnɛlɔ ka diambo kɛnɛ tooholaka dia “dikambɔ diambɛla [nto] dia muna.” Tɔ tokimanyiyaka nto dia mbeya etena kakatatɛ dinela dia l’andja w’otondo.

6. a) Etena kakɔna kakatatɛ ‘eleko ka dinela’? b) Etena kakɔna kakatatɛ “dinela dia la nkɛtɛ” dia nshi nyɛ? Lembetshiya.

⁶ Lam’ele ɛnɛlɔ ka Joani ka l’Ɛnyɛlɔ tshapita 14 mɛnyaka Yeso lele Omunyi ɔlɔtshi dɛmbɔ dia nkoso (divɛsa 14), ɔsɔnamelo ande oko Nkumekanga lo 1914 wakashile salema. (Dan. 7:13, 14) Yema tshitshɛ oma laasɔ, wakadjangɛ Yeso dia nde ntatɛ dinela (divɛsa 15). Wahɔnelo w’akambo wa woho akɔ waamɛ mɛnamaka lo wɛɛla wa Yeso wendana la dinela di’eponga, lɛnɛ akandate ate: “Dinela ele etena k’ekomelo k’andja.” Ɔnkɔnɛ, eleko ka dinela ndo ekomelo ka dikongɛ nɛ di’akambo diakatatɛ l’etena kakɔ kaamɛ, mbuta ate lo 1914. L’ɔkɔngɔ ‘w’eleko ka dinela kɛsɔ,’ dinela dia nshi nyɛ diakayotatɛ. (Mat. 13:30, 39) Etena kakaloyaso washo l’ɔkɔngɔ, sho mɛnaka dia dinela sɔ diakatatɛ ɛnɔnyi ɛmɔtshi l’ɔkɔngɔ wa Yeso ntatɛ mbolɛ oko Nkumekanga. La ntondo ka dui sɔ salema, Yeso akakambe olimu wa mbɛdia ambeki ande w’akitami ntatɛ lo 1914 polo lo etatelo ka 1919. (Mal. 3:1-3; 1 Pet. 4:17) Oma laasɔ, lo 1919, “dinela dia la nkɛtɛ” diakatatɛ.  Aha la ntshimbatshimba, Yeso akakambe l’ɔhɔmbɔ ande wa kɔlamelo w’oyoyo dia nkimanyiya anangɛso dia vɔ nshihodia di’olimu w’esambishelo pombaka kambema la shamanya. Nyɛsɔ tende woho wakasalema dui sɔ.

7. a) Ɔsɛdingwelo akɔna wakakimanyiya anangɛso dia mɛna ɔnɛ olimu w’esambishelo pombaka kambema la shamanya? b) Kakɔna kakakeketshama anangɛso dia nsala?

⁷ Lo Ngɔndɔ k’esambele 1920, Tshoto y’Etangelo mɔtshi (Angɛlɛ) yakate ɔnɛ: “Oma l’ɔsɛdingwelo wa dimɛna w’Afundelo, tambɛna dia tekɔ la diɛsɛ dia woke dia mbewoya losango la diolelo.” Ɛnyɛlɔ, prɔfɛsiya k’Isaya kakakimanyiya anangɛso dia vɔ mɛna dia losango la Diolelo pombaka sambishama l’andja w’otondo. (Is. 49:6; 52:7; 61:1-3) Vɔ kombeyaka woho wakahombe olimu ɔsɔ ndjokambema, koko vɔ wakayaɛkɛ le Jehowa dia nde mbalɔmbɔla. (Adia Isaya 59:1.) Etombelo wakonge oma lo woho wakashihodia anangɛso di’olimu w’esambishelo pombaka kambema la shamanya ele, vɔ wakaleke ndjasha tshɛ l’olimu ɔsɔ. Etombelo akɔna wakonge?

8. Lo 1921, akambo akɔna ahende wendana l’olimu w’esambishelo wakashihodia anangɛso?

⁸ Lo Ngɔndɔ ka dikumi l’ahende 1921, Tshoto y’Etangelo mɔtshi (Angɛlɛ) yakewoya ɔnɛ: “Ɔsɔ mbaki ɔnɔnyi woleki dimɛna tshɛ. Anto efula wakoke losango l’akambo wa mɛtɛ lo 1921 oleki ɛnɔnyi ekina wa ntondo.” Periodikɛ kakɔ kakakotsha ɔnɛ: “Olimu w’efula wa nsala wekekɔ. . . . Nyɛsɔ tookambe l’ɔngɛnɔngɛnɔ tshɛ.” Tolembete di’anangɛso wakashihodia akambo akɔ ahende wendana l’olimu w’esambishelo wakatɛ Yeso apɔstɔlɔ ande ate: Olimu ɔsɔ pombaka kambema la shamanya, ndo ɔnɛ ekambi wekɔ l’ɔngɛnɔngɛnɔ.

9. a) Lo 1955, kakɔna kakate Tshoto y’Etangelo mɔtshi lo kɛnɛ kendana l’olimu wa dinela, ndo lande na? b) Ohamelo akɔna wa l’andja w’otondo w’apandjudi wakasalema lo ɛnɔnyi 50 wetshi? (Enda kiombo yele l’ɔtɛ a dui ɔnɛ: “ Ehamelo wakasalema l’andja w’otondo.”)

⁹ Lo ɛnɔnyi 1930, l’ɔkɔngɔ w’anangɛso nshihodia dia leemba la woke l’ɛkɔkɔ ekina wayoyetawɔ losango la Diolelo, vɔ wakaleke ndjasha l’olimu ɔsɔ. (Is. 55:5; Jni. 10:16; Ɛny. 7:9) Etombelo akɔna wakonge la dui sɔ? Lofulo l’esambisha wa Diolelo laki 41 000 lo 1934 lakadɛ lo 500 000 lo 1953. Tshoto y’Etangelo ya Ngɔndɔ ka tanu 1, 1955 yakate hwe ɔnɛ: “Ɔnɛ ekɔ paka nyuma ka Jehowa ndo wolo w’Ɔtɛkɛta ande mambokotsha dinela dia woke dia l’andja w’otondo nɛ.” *—Zek. 4:6.

10, 11. Lo wɛɛla wa lɔtɔngɔ la mutardɛ, akambo akɔna wendana la wolelo alɔ watɔtɔmiyama?

¹⁰ Lo wɛɛla ande wendana la Diolelo, Yeso akatɛnyisha lo ɛtɛkɛta wokɛma hwe etombelo w’oma l’olimu wa dinela. Nyɛsɔ tɔsɛdingole wɛɛla wendana la lɔtɔngɔ la mutardɛ ndo la wodoya. Tayoleka ntɛkɛta woho wambokotshama wɛɛla ɛsɔ lo nshi y’ekomelo nyɛ.

¹¹ Wɛɛla wa lɔtɔngɔ la mutardɛ. Pami kɛmɔtshi akonɛ lɔtɔngɔ la mutardɛ. Lɔ lakakome osongo wa woke waahema tofudu lo ntahe yawɔ. (Adia Mateo 13:31, 32.) Akambo akɔna wendana la wolelo wa lɔtɔngɔ wɔtɔtɔmiyami lo wɛɛla ɔnɛ? 1) Wolelo wa lɔtɔngɔ ekɔ dui dia diambo. “Lɔtɔngɔ loleki tshitshɛ” lakakome osongo wele la “ntahe ya weke.” (Makɔ 4:31, 32) 2) Wolelo wa lɔtɔngɔ lɔsɔ ekɔ dui di’eshikikelo. ‘Etena konɛma lɔtɔngɔ, lɔ tombaka.’ Yeso kombuta ɔnɛ “lɔ koka ntomba,” koko nde akate ate: “Lɔ tombaka.” Wolelo alɔ hakoke memadiema. 3) Wolelo w’osongo ɔsɔ kotolaka angɛndangɛnda ndo mbashaka dihole dia momuya. ‘Tofudu ta l’olongo ndjaka’ ndo ‘ndjodjasɛka lo dɛdi diawɔ.’ Ngande wendana akambo asato asɔ la dinela dia lo nyuma diasalema nshi nyɛ?

12. Ngande wendana wɛɛla wa lɔtɔngɔ la mutardɛ la dinela dia lo nshi yaso nyɛ? (Enda ndo tablo kele l’ɔtɛ a dui ɔnɛ: “ Woho wakadɛ lofulo l’Ambeki wa Bible.”)

¹² 1) Wolelo wa lɔtɔngɔ: Wɛɛla ɔsɔ tɔtɔmiyaka ohamelo wa losango la Diolelo ndo w’etshumanelo k’Akristo. Ntatɛ lo 1919, ekambi wele l’ohetoheto asɔ wekɔ lo tshumanyema l’etshumanelo k’Akristo. L’etena kɛsɔ, lofulo l’ekambi laki yema tshitshɛ, koko lɔ lakadɛ esadi eto. Ekɔ dui diambo lo menda woho waki ekambi ɛsɔ yema tshitshɛ l’etatelo k’ɛnɔnyi 1900 la woho wayawɔ ɛlɔ kɛnɛ. (Is. 60:22) 2) Eshikikelo: Ohamelo w’etshumanelo k’Akristo hakoke memadiema. Oyadi kɛnɛ tshɛ kakasale atunyi waki Nzambi diaha etshumanelo kɛsɔ mpama, tɔ kekɔ lo tatetemala mpama, kaanga la ntondo k’ɛlɔshamelo wa wolo. (Is. 54:17) 3) Dihole dia momuya: “Tofudu ta l’olongo” taahema lo ntahe y’osongo nembetshiyaka miliyɔ y’anto w’etema ɛlɔlɔ w’oma lo wedja oko 240 wetawɔ losango la Diolelo, lo monga lo etshumanelo k’Akristo. (Ezek. 17:23) Lɔkɔ, vɔ nongolaka mbo ya ndɛ ya lo nyuma, ekeketshelo ndo ekokelo.—Is. 32:1, 2; 54:13.

13. Akambo akɔna wendana la wodelo wa wodoya watɔtɔmiyama lo wɛɛla ɔnɛ?

¹³ Wɛɛla wa wodoya. L’ɔkɔngɔ wa womoto ɔmɔtshi mbidja yema ya wodoya l’okuna, wodoya wakafudia okuna tshɛ. (Adia Mateo 13:33.) Akambo akɔna wendana la wolelo wa lɔtɔngɔ wɔtɔtɔmiyami lo wɛɛla ɔnɛ? Nyɛsɔ tɔsɛdingole akambo ahende. 1) Wodoya salaka otshikitanu. Wodoya wakadiangana “polo ndo lam’akade okuna tshɛ wakandasɔhanya.” 2) Wodoya kokanɛka. Wodoya mbidiyaka “tɛdikɔ tosato ta weke t’okuna,” mbuta ate okuna tshɛ. Ngande wendana akambo ahende asɔ la dinela dia lo nyuma dia nshi nyɛ?

14. Ngande wendana wɛɛla wa wodoya la dinela dia nshi nyɛ?

 ¹⁴ 1) Otshikitanu: Wodoya nembetshiyaka losango la Diolelo, ndo okuna nembetshiyaka anto. Oko watshikitanya wodoya okuna l’ɔkɔngɔ wa vɔ mbasɔhanya, mbele ndo losango la Diolelo tshikitanyaka etema w’anto l’ɔkɔngɔ wa vɔ lietawɔ. (Rɔmɔ 12:2) 2) Okokanelo: Okokanelo wa wodoya nembetshiyaka odianganelo wa losango la Diolelo. Wodoya ɔsɔ mbidoyaka okuna tshɛ. Woho akɔ waamɛ mbele, losango la Diolelo lambodiangana “l’ahole woleki etale wa lo nkɛtɛ.” (Ets. 1:8) Dui sɔ nto mɛnyaka dia oyadi l’ahole wamboshimbama olimu aso, losango la Diolelo layodiangana ndo esambishelo ka lo bɛtshi dia nkɛtɛ sɔ koka salema aha l’anto mbeya.

15. Ngande wakotshama ɛtɛkɛta wa lo Isaya 60:5, 22? (Enda ndo kiombo yele l’ɔtɛ a dui ɔnɛ: “ Jehowa mbakasale dui sɔ,” ndo kina yele l’ɔtɛ a dui ɔnɛ: “ Ɔnɛ lele tshitshɛ aya wodja wa wolo,”)

¹⁵ Ɛnɔnyi oko 800 la ntondo ka Yeso ntɛkɛta dia wɛɛla ɛsɔ, Jehowa akatatshi lo tshimbo y’Isaya lo ɛtɛkɛta wa didjidji dia olimu wa dinela wayoyokambema efula lo nshi yaso nyɛ ndo ɔnɛ olimu ɔsɔ wayela ɔngɛnɔngɛnɔ. * Jehowa ekɔ lo mɛnya woho wahongumɔ anto ‘w’oma l’ahole tshɛ’ l’okongamelo ande. Jehowa akatɛ “womoto” lalembetshiya akitami weke lanɛ la nkɛtɛ ate: “Lam’ayuyena dikambu ne, we ayongenangena. Utema aye ayulimbolimbo l’ongenongeno, ne  dia engonyi wa lu ashi a waki wayukadimo le ye, la ekundji a wedja wayuya le ye.” (Is. 60:1, 4, 5, 9) Ɛtɛkɛta ɛsɔ wekɔ lo kotshama mɛtɛ nshi nyɛ. Ɛlɔ kɛnɛ, ekambi waki Jehowa wambookambɛ edja wekɔ l’ɔngɛnɔngɛnɔ etena kɛnawɔ woho wambodɛ lofulo l’apandjudi wa Diolelo oma lo yema tshitshɛ otsha lo nunu.

16, 17. L’ɔtɛ w’ɔkɔkɔ akɔna wahomba ‘ɔnɛ lonɛ ndo ɔnɛ lana ngɛnangɛna kaamɛ’? (Enda ndo kiombo yele l’ɔtɛ a dui ɔnɛ: “ Woho wakananda traktɛ hiende etema w’anto ahende wa l’Amazone.”)

¹⁶ Ondo wɛ mbohɔka kɛnɛ kakatɛ Yeso apɔstɔlɔ ande ate: “Amunyi . . . wekɔ lo ntshumanya elowa dikambo dia lɔsɛnɔ la pondjo, dia ɔnɛ lonɛ la ɔnɛ lana ngɛnangɛna kaamɛ.” (Jni. 4:36) Ngande ‘wangɛnangɛnaso kaamɛ’ lo dinela dia l’andja w’otondo? Sho ngɛnangɛnaka lo toho efula. Nyɛsɔ tɔsɛdingole toho tosato l’atei atɔ.

¹⁷ Ntondotondo, sho ngɛnanangɛnaka lo menda kɛnɛ kasala Jehowa lo olimu wa dinela. Etena kasambishaso losango la Diolelo, sho monɛka ntɔngɔ. (Mat. 13:18, 19) Etena kakimanyiyaso onto ɔmɔtshi dia nde nkoma ombeki wa Kristo, sho munaka. Ndo sho tshɛ mongaka l’ɔngɛnɔngɛnɔ w’efula etena kɛnaso woho wakimanyiya Jehowa dia lɔtɔngɔ la Diolelo ‘ntomba ndo mbola.’ (Makɔ 4:27, 28) Ntɔngɔ mɔtshi yonɛso ndjotombaka l’ɔkɔngɔ ndo ndjonamaka oma le anto akina. Ondo wɛ lawɔ ambohomanaka la dui diakahomana la kadiyɛso Joan ladjasɛ lo wodja wa Grande-Bretagne kambobatizama aya ɛnɔnyi 60. Nde akate ate: “Lakahomana l’anto amɔtshi wakambutɛ dia lakaasambisha akambo wa mɛtɛ ambeta ɛnɔnyi efula. Aha la dimi mbeya, Ɛmɛnyi wa Jehowa ekina wakateekaka la wɔ Bible ndo wakaakimanyiya dia vɔ nkoma ekambi waki Jehowa. Lekɔ l’ɔngɛnɔngɛnɔ dia mɛna dia lɔtɔngɔ lakamonɛ lakoole ndo lakanama.”—Adia 1 Kɔrɛtɔ 3:6, 7.

18. Ɔkɔkɔ akɔna wele lo 1 Kɔrɛtɔ 3:8 watotshutshuya dia monga l’ɔngɛnɔngɛnɔ?

¹⁸ Yoho ya hende ele, sho tetemalaka monga ekambi wele l’ɔngɛnɔngɛnɔ l’ɔtɛ wa kɛnɛ kakate Pɔɔlɔ ɔnɛ: “Onto l’onto ayolongola difuto diande lo ndjela olimu ande hita.” (1 Kɔr. 3:8) Onto l’onto ayolongola difuto lo ndjela olimu ande, koko aha oma l’etombelo wakondjande oma l’olimu akɔ. Ande ekeketshelo kakondja wanɛ wasambisha lo bɛtshi dia nkɛtɛ diahaleke anto mbetawɔ losango la Diolelo lee! Lo washo wa Nzambi, Ɔmɛnyi ande tshɛ wayasha l’otema ɔtɔi l’olimu wa monɛ ntɔngɔ ekɔ lo “ntɔ elowa efula,” ndo ekɔ l’ɔkɔkɔ wa ngɛnangɛna.—Jni. 15:8; Mat. 13:23.

19. a) Ngande wɛnya prɔfɛsiya ka Yeso ka lo Mateo 24:14 ɔngɛnɔngɛnɔ wele la so? b) Kakɔna kahombaso namaka lo yimba oyadi hatokondja etombelo w’amɛna l’olimu wa mbetɛ anto ambeki?

¹⁹ Yoho ya sato ele, sho ngɛnangɛnaka nɛ dia olimu aso wekɔ lo nkotsha prɔfɛsiya. Tɔsɛdingole okadimwelo wakasha Yeso apɔstɔlɔ ande etena kakawawombola ɔnɛ: “Djembetelo yakɔna yayɛnya woongelo ayɛ ndo etena k’ekomelo k’andja?” Nde akawatɛ dia dui dimɔtshi diendana la djembetelo ya woongelo ɔsɔ ele esambishelo ka l’andja w’otondo. Onde nde  akatɛkɛta di’olimu wa mbetɛ anto ambeki? Ndooko. Nde akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi.” (Mat. 24:3, 14) Ɔnkɔnɛ, esambishelo ka Diolelo ekɔ dui dimɔtshi di’ohomba dia lo djembetelo shɔ. Etena kasambishaso lokumu l’ɔlɔlɔ la Diolelo, sho namaka lo yimba dia oyadi kaanga hatotondoyisha lo mbetɛ anto ambeki, tekɔ lo ‘nsambisha.’ * Diakɔ diele, oyadi woho akɔna wayokadimola anto lo losango laso, tekɔ lo mbisha lonya lo okotshamelo wa prɔfɛsiya ka Yeso ndo tekɔ la diɛsɛ dia monga “ekambi kaamɛ la Nzambi.” (1 Kɔr. 3:9) Ɔsɔ ekɔ ɔkɔkɔ w’oshika wahombaso ngɛnangɛna.

20, 21. a) Ngande wakotshama ɛtɛkɛta wele lo Malaki 1:11? b) Lo kɛnɛ kendana l’olimu wa dinela, yɛdikɔ yakɔna yamboyɔsa, ndo lande na?

²⁰ Lo ntambe ka ntondo, Yeso akakimanyiya apɔstɔlɔ ande dia vɔ nshihodia di’olimu wa dinela wakahombe kambema la shamanya. Ntatɛ oma ko 1919, Yeso ekɔ lo nkimanyiya ambeki ande wa nshi nyɛ dia vɔ nshihodia dui dia mɛtɛ sɔ. Dia nkitanyiya didjango sɔ, ekambi waki Nzambi wamboleka ndjasha l’esambishelo. Lo mɛtɛ, olimu wa dinela ɔsɔ wambɛnama dia hawemalaki. Oko wakatatshi omvutshi Malaki, olimu w’esambishelo wekɔ lo kambema nshi nyɛ “uma l’ehutwelu ka unya pulu ndu l’edjelu kawo.” (Mal. 1:11) Eelo, oma l’ehotwelo polo ndo l’edjelo, mbuta ate oma lo ɛstɛ polo ndo lo owɛstɛ ndo l’ahole tshɛ wewɔ la nkɛtɛ, wanɛ wonɛ ndo wanɛ wana wekɔ lo nkamba ndo wekɔ lo ngɛnangɛna kaamɛ. Ndo oma l’ehotwelo polo ndo l’edjelo, mbuta ate oma ko pindju polo ndo dikɔlɔ, kana nshi tshɛ, tekɔ lo nkamba olimu ɔsɔ la shamanya.

²¹ Etena kakaloyaso washo l’ɔkɔngɔ lo ɛnɔnyi 100 wambeta ɛnɛ ndo kɛnaso woho wambofula djui ya tshitshɛ y’ekambi waki Nzambi ndo wambowokoma ‘wodja wa woke,’ etema aso ‘ndolaka tɔɔ l’ɔngɛnɔngɛnɔ.’ (Is. 60:5, 22) Ɔnkɔnɛ, nyɛsɔ tetawɔ di’ɔngɛnɔngɛnɔ ɔsɔ ndo ngandji kokaso Jehowa lele “Owandji wa dinela,” totshutshuya dia sho ntetemala ndjasha lo dinela dioleki woke dia lo tena tshɛ sɔ.—Luka 10:2.