Le osekaso opandjudi wa Diolelo wa ngandji,

OHƆSA dia wɛ aki ose nkumbo ka Bɛtɛlɛ ka la Brooklyn Lushi la tanu la pindju, Ngɔndɔ ka dikumi 2, 1914. Wɛ mbidjasɛ lo dihole diatoyodjasɛka la mɛsa w’olelo, nyakonga oyelo w’ɔnangɛso Charles Russell. Kema edja, lokuke la luudu l’olelo lambodihɔ ndo ɔnangɛso Russell ambɔtɔ. Nde ambɔlama yema oko wele mbekelo kande, ndo ambosha ase nkumbo ka Bɛtɛlɛ mɔyɔ la wangasanu tshɛ ate: “He mɔyɔ anyu!” Koko lo dihole dia nde mbidjasɛ mbala kakɔ ɔtɔi lo dihole diokondodjasɛka, mbuta ate l’ɔtɛ wa mɛsa, nde amboda losaka ndo ambewoya l’ɔngɛnɔngɛnɔ tshɛ ate: “Etena k’ase Wedja kambokomɛ ndo nkumi yawɔ ya dikanga yambokoma ewo.” Aha la taamu, wɛ akahombe monga l’ɔngɛnɔngɛnɔ w’efula nɛ dia nyambokongɛ dikambo sɔ edja efula. Kaamɛ l’ase nkumbo ka Bɛtɛlɛ akina, nyambɛnya ɔngɛnɔngɛnɔ anyu lo mbida saka edja efula.

 Aya ɛnɔnyi efula wakasha ɔnangɛso Russell diewoyelo dia diambo sɔ. Kakɔna kambosala Diolelo diaki Nzambi ntatɛ oma k’etena kɛsɔ? Diɔ diambosala akambo efula. Oma lo tshimbo yadiɔ, Jehowa ekɔ lo tɛdia ndo ekɔ lo talowanya ekambi ande, ntatɛ lam’akiwɔ weke nunu dingana to lo 1914 polo etena kayawɔ ndekana miliyɔ esambele l’etenyi ɛlɔ kɛnɛ. Wahɔ akɔna wamboyokondja oma l’olowanyelo ɔsɔ?

Ɛlɔ kɛnɛ, anangɛso l’akadiyɛso efula mbutaka ɔnɛ: “Pusupusu ka Jehowa ka l’olongo kekɔ lo tatshu otsha la ntondo” ndo ngasɔ mɛtɛ mbediɔ. Koko kɛnɛ kele mɛtɛ ele, ntatɛ oma ko 1914, pusupusu ka l’olongo kalembetshiya etenyi k’okongamelo wa Jehowa kahɛnama kekɔ lo tatshu esadi esadi otsha la ntondo, oko wayoyɛna lo dibuku nɛ naka wɛ dieka la yambalo tshɛ. Dia nsambisha lokumu l’ɔlɔlɔ l’andja w’otondo, apandjudi wa Diolelo wambokamba la toho efula, mbidja ndo tojurnalɛ, traktɛ, esato wakɛndakɛnda, kartɛ y’esambishelo, fɔnɔ ya l’anya, aradiyo ndo Ɛtɛrnɛtɛ.

Diɛsɛ la woho watshɔkɔla Jehowa olimu aso, tootondja ekanda walembetshiya Bible ɛlɔ kɛnɛ lo ɛtɛkɛta ndekana 670 ndo tekɔ lo kahɛ anto ekanda akɔ ofele. Anangɛso l’akadiyɛso efula wele la yimba ya ndjahombia ndjakimɔka la lolango dia mbika mbalasa ya Diolelo, ya nsanganya ya weke ndo mvudu ya Bɛtɛlɛ, oyadi lo wedja wele l’ekondjelo k’efula kana ka yema tshitshɛ. Ndo etena katomba mpokoso, anangɛso l’akadiyɛso wa ngandji tshɔka esadi eto dia tokimanyiya asekaso ambetawudi wambohomɔ mpokoso, lo mɛnya dia vɔ wekɔ kaamɛ la wɔ, oyadi ‘lo nshi ya paa.’—Tuk. 17:17.

Lo tena dimɔtshi, ewandji w’ɛtɛmwɛlɔ ndo atunyi aso kambaka la ‘ɛlɛmbɛ lo yoho ya kɔlɔ’ dia nshimba olimu aso, koko mbetawɔ kaso keketshamaka dia mɛna dia welo wadjawɔ mbala la mbala dia nshimba olimu aso mbɔtɔka l’ashi, ndo ndjokimanyiyaka dia ‘wahɔ wa Diolelo ntshɔ otsha la ntondo.’—Osam. 94:20; Flpɛ. 1:12.

Oko weso sho tshɛ “anto wa lo luudu” la Nkumekanga, tekɔ l’ɔngɛnɔngɛnɔ dia nkamba kaamɛ la yɛ. Eya dia sho nyokaka nyu tshɛ ngandji k’efula. Tekɔ lo nɔmba Jehowa di’awui wele lo dibuku nɛ kokimanyiya dia wɛ nyomoleka mbɔsa sango diayɛ dia lo nyuma la nɛmɔ di’efula.—Mat. 24:45.

Takokombolɛ ɔngɛnɔngɛnɔ w’efula

Ananyɔ,

Olui-walɔmbɔla w’Ɛmɛnyi wa Jehowa